Vientiane Times Lao
ໜໍ່ແໜງຄວາມບໍ່ສະຫງົບໄດ້ຮັບການແກ້ໄຂຢ່າງຕັ້ງໜ້າຢູ່ແຂວງໄຊສົມບູນ

ໜໍ່ແໜງຄວາມບໍ່ສະຫງົບໄດ້ຮັບການແກ້ໄຂຢ່າງຕັ້ງໜ້າຢູ່ແຂວງໄຊສົມບູນ

ສະຫາຍ ພົນຕີ ຄໍາລຽງ ອຸທະໄກສອນ ເລຂາພັກແຂວງ ເຈົ້າແຂວງໄຊສົມບູນໄດ້ລາຍງານສະພາບລວມ ຢູ່ແຂວງໄຊສົມບູນທີ່ກອງປະຊຸມໃຫຍ່ ຄັ້ງທີ XI ຂອງພັກທີ່ໄດ້ຈັດຂຶ້ນເມື່ອບໍ່ດົນມານີ້ໂດຍມີເນື້ອໃນບາງຕອນທີ່ສໍາຄັນໃຫ້ຮູ້ວ່າ: ໃນໄລຍະ 5 ປີທີ່ຜ່ານມາການຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຕິດພັນກັບການພັດທະນາເສດຖະກິດ-ສັງຄົມ ຢູ່ແຂວງໄຊສົມບູນ ເຫັນວ່າ ບັນດາໜໍ່ແໜງຄວາມບໍ່ສະຫງົບໄດ້ຮັບການແກ້ໄຂຢ່າງຕັ້ງໜ້າ, ເຮັດໃຫ້ທົ່ວແຂວງ ນັບມື້ມີຄວາມສະຫງົບປອດໄພດີຂຶ້ນເທື່ອລະກ້າວ, ຖ້າທຽບໃສ່ຊຸມປີທີ່ຜ່ານມາ, ອັນພົ້ນເດັ່ນ ແມ່ນການຢັ້ງຢືນເຖິງຄວາມສະຫງົບ, ຄວາມປອດໄພຂອງແຂວງໄຊສົມບູນ ຊຶ່ງໃນປີ 2020 ໄດ້ມີການຈັດຕັ້ງຫຼາຍງານທີ່ສຳຄັນຂອງພັກ, ຂອງຊາດຢູ່ແຂວງ ເປັນຕົ້ນ: ການກະກຽມ ແລະ ການດໍາເນີນກອງປະຊຸມໃຫຍ່ ຄັ້ງທີ I ຂອງອົງຄະນະພັກແຂວງ, ງານສະເຫຼີມສະຫລອງ 2 ວັນປະຫວັດສາດ, ບັນດາກິດຈະກໍາຍາດເອົາໄຊຊະນະທ້າຍປີ 2020, ຂະບວນຄະລາວານພິຊິດຈອມພູເບ້ຍ ແລະ ກອງປະຊຸມທາບທາມເນື້ອໃນ ແລະ ບຸກຄະລາກອນຂອງກອງປະຊຸມໃຫຍ່ຄັ້ງທີ XI ຂອງພັກ, ເຊິງໄດ້ເຮັດໃຫ້ກອງປະຊຸມສໍາຄັນຕ່າງໆ ມີຄວາມສະຫງົບປອດໄພ 100%; ພວກເຮົາສາມາດຂື້ນຢືນຢູ່ຈອມພູເບ້ຍ ແລະ ແກວ່ງສະບັດທຸງຊາດ, ທຸງພັກ ເປັນການປະກາດໄຊຊະນະ ຢ່າງສະຫງ່າຜ່າເຜີຍ.  

ສະຫາຍ ພົນຕີ ຄໍາລຽງ ໄດ້ລາຍງານຕື່ມວ່າ: ແຕ່ເຖິງຢ່າງໃດກໍຕາມ ຄຽງຄູ່ກັບຜົນສຳເລັດພາຍໃນແຂວງໄຊສົມບູນຍັງມີຈຸດອ່ອນ ແລະ ຂໍ້ຄົງຄ້າງຈຳນວນໜຶ່ງ ເປັນຕົ້ນ : ສະຕິຕື່ນຕົວ ແລະ ຄວາມເປັນເຈົ້າການເຂົ້າຮ່ວມວຽກງານງານປ້ອງກັນຊາດ-ປ້ອງກັນຄວາມສະຫງົບ ຂອງພະນັກງານ ແລະ ປະຊາຊົນຈຳນວນໜຶ່ງບໍ່ທັນສູງ, ໜໍ່ແໜງຄວາມບໍ່ສະຫງົບຍັງແອບແຝງລີ້ຊ້ອນຢູ່ພາຍໃນຍັງມີຢູ່, ເສດຖະກິດ ດ້ານມະຫາພາກເຖິງວ່າຂະຫຍາຍຕົວດີ ແຕ່ຍັງບໍ່ທັນເຂັ້ມແຂງ, ພື້ນຖານໂຄງລ່າງດ້ານເສດຖະກິດ-ສັງຄົມບໍ່ທັນຕອບສະໜອງກັບຄວາມຮຽກຮ້ອງຕ້ອງການຂອງການພັດທະນາ ໂດຍສະເພາະ ແມ່ນບັນຫາເສັ້ນທາງຄົມມະນາຄົມບໍ່ທັນສະດວກດີ, ໂຮງຮຽນ, ໂຮງໝໍ, ນ້ຳປະປາ, ສຳນັກງານ, ຫ້ອງການເຮັດວຽກບໍ່ພຽງພໍ, ຄວາມຮຽກຮ້ອງຕ້ອງການພັດທະນາມີຫຼາຍ ແຕ່ການສະໜອງທຶນຍັງຈຳກັດ, ການຜະລິດ ເປັນສິນຄ້າຂອງປະຊາຊົນເຖິງວ່າມີໜໍ່ແໜງຂະຫຍາຍຕົວແຕ່ບໍ່ທັນເປັນຂະບວນກວ້າງຂວາງ ແລະ ອື່ນໆ ຊຶ່ງບັນດາຈຸດອ່ອນ ແລະ ຂໍ້ຄົງຄ້າງດັ່ງກ່າວຈະເລັ່ງແກ້ໄຂໃນອະນາຄົດ. 

ຂ່າວ: ວຽງຈັນທາຍ
ພາບ: galatouriste.asia

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ