ສະມາຄົມນັກຂ່າວ ແຫ່ງ ສປປ ລາວ ແລະ ສະມາຄົມນັກຂ່າວ ແຂວງຢຸນນານ ແລະ ສະມາຄົມນັກຂ່າວ ແຫ່ງປະເທດ ຈີນ ຈະສືບຕໍ່ເພີ່ມການຮ່ວມມືຢ່າງໃກ້ຊິດໃນການພັດທະນາສື່ມວນຊົນ ແລະ ຊຸກຍູ້ສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ ແລະ ຈີນ ໂດຍຜ່ານສື່ມວນຊົນລາວ ເພາະສື່ມວນຊົນລາວ ມີບົດບາດສຳຄັນ ເພື່ອເຮັດໃຫ້ຄວາມເຂົ້າໃຈຂອງປະຊາຊົນ ເລິກເຊິ່ງກ່ຽວກັບສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ຈີນ.
ທ່ານ ຣັດສະໝີ ດວງສັດຈະ, ເລຂາທິການບໍລິຫານງານຂອງສະມາຄົມນັກຂ່າວ ແຫ່ງສປປ ລາວ ໄດ້ໃຫ້ສຳພາດ ກັບສື່ມວນຊົນລາວ ພາຍຫຼັງພິທີປິດກອງປະຊຸມສຳມະນາ ແລະ ທັດສະນະສຶກສາ ເພື່ອປຶກສາຫາລື ກ່ຽວກັບການສ້າງຄູ່ຮ່ວມມືທີ່ໄດ້ວາງໄວ້ໃນອະນາຄົດ ແລະ ສະຫຼຸບປະເມີນຜົນສຳເລັດຂອງການຮ່ວມມືໃນໄລຍະຜ່ານມາ ລວມທັງຍົກລະດັບສີມືແຮງງານໃຫ້ນັກຂ່າວລາວ ແລະ ປັບປຸງບົດລາຍງານກ່ຽວກັບການຮ່ວມມືລາວ-ຈີນ ພາຍໃຕ້ຫົວຂໍ້ “ມິດຕະພາບລາວ-ຈີນກັບການເປີດທາງລົດໄຟລາວ-ຈີນ”, ຊຶ່ງງານດັ່ງກ່າວ ໄດ້ຈັດຂຶ້ນໂດຍ ສະມາຄົມນັກຂ່າວ ແຫ່ງປະເທດ ຈີນ ແລະ ສະມາຄົມນັກຂ່າວແຂວງຢຸນນານ ເມຶ່ຶອອາທິດຜ່ານມານີ້ ທີ່ຫຼວງພະບາງ.
ທ່ານ ຣັດສະໝີ ດວງສັດຈະ ໄດ້ກ່າວວ່າ: ການຈັດສຳມະນາ-ທັດສະນະສຶກສາ ໂດຍການຮ່ວມມືລະຫວ່າງສະມາຄົມນັກຂ່າວແຫ່ງ ສປປ ລາວ ແລະ ສະມາຄົມນັກຂ່າວປະເທດຈີນ ກໍ່ຄືສະມາຄົມນັກຂ່າວແຂວງຢຸນນານ ໄດ້ເຮັດໃຫ້ພວກເຮົາເຂົ້າໃຈແຈ້ງໃນການເພີ່ມຄວາມຮັບຮູ້ ຄວາມສາມາດຂອງນັກຂ່າວລາວ ແລະ ເຂົ້າໃຈຢ່າງເລິກເຊິ່ງ ຕໍ່ສາຍພົວພັນ-ຮ່ວມມືມິດຕະພາບໃນຖານະຄູ່ຮ່ວມຊາຕາກຳສັງຄົມນິຍົມ ລາວ-ຈີນ.
ກອງປະຊຸມສຳມະນາແລະທັດສະນະສຶກສາຄັ້ງນີ້ ຍັງໄດ້ເພີ່ມຄວາມຮູ້ໃນດ້ານວຽກງານສື່ມວນຊົນໃຫ້ເຫັນແຈ້ງ ຕໍ່ຂໍ້ລິເລີ່ມໜຶ່ງແລວໜຶ່ງເສັ້ນທາງ ໂດຍສະເພາະຜົນປະໂຫຍດຈາກການນຳໃຊ້ລົດໄຟຄວາມໄວສູງ ລາວ-ຈີນ ຊຶ່ງມີຜົນດີແກ່ປະຊາຊົນທັງ 2 ຊາດລາວ-ຈີນ ໃນການສົ່ງອອກ-ນຳເຂົ້າສິນຄ້າ, ການທ່ອງທ່ຽວ… ຊຶ່ງຈະສົ່ງຜົນເຮັດໃຫ້ GDP ຂອງ ສປປ ລາວ ເພີ່ມສູງ ຂຶ້ນຢ່າງແນ່ນອນ. ຂະນະດຽວກັນ, ໃນຕໍ່ໜ້າ ບັນດາປະເທດໃນອາຊີອາຄະເນ ລວມທັງ ສປ ຈີນ ທີ່ມີປະຊາກອນລວມກັນ 2.000 ລ້ານຄົນ ກໍ່ຈະໄດ້ຮັບຜົນປະໂຫຍດຈາກໂຄງ ການເສັ້ນທາງລົດໄຟຄວາມໄວສູງດັ່ງກ່າວ.
ໃນໂອກາດນີ້, ທ່ານ ຣັດສະໝີ ດວງສັດຈະ, ຕາງໜ້າສະມາຄົມນັກຂ່າວແຫ່ງ ສປປ ລາວ ກໍ່ຄືໃນນາມຫົວໜ້າຄະນະນຳພານັກຂ່າວລາວເດີນທາງທັດສະນະສຶກສາ ບົນເສັ້ນທາງລົດໄຟ ລາວ-ຈີນ ຍັງໄດ້ສະແດງຄວາມຂອບໃຈຢ່າງຈິງໃຈ ມາຍັງສະມາຄົມນັກຂ່າວປະເທດຈີນ ກໍ່ຄືສະມາຄົມນັກຂ່າວ ແຂວງຢຸນນານ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອອັນລ້ຳຄ່າ ອັນໄດ້ເຮັດໃຫ້ຊຸດສຳມະນາ ແລະ ທັດສະນະສຶກສາຕະຫຼອດ 5 ວັນ ບັນລຸຜົນຢ່າງຈົບງາມ ແລະ ໃນຕໍ່ໜ້າ 2 ສະມາຄົມນັກຂ່າວ ລາວ-ຈີນ ຍັງສືບຕໍ່ມີການຮັດແໜ້ນການຮ່ວມມືໃຫ້ຂະຫຍາຍຕົວຍິ່ງໆຂຶ້ນ.
ພ້ອມກັນນັ້ນ, ພວກເຮົາຢືນຢັນຈະສືບຕໍ່ມີການຮ່ວມມືທີ່ດີໃນທຸກຂົງເຂດລະຫວ່າງ ລາວ ແລະ ຈີນ ໂດຍຜ່ານສື່ມວນຊົນລາວ ເພາະວ່າບົດບາດຂອງສື່ມວນຊົນລາວ ແລະ ຈີນແມ່ນພື້ນຖານເພື່ອເຮັດໃຫ້ຄວາມເຂົ້າໃຈຂອງປະຊາຊົນເລິກເຊິ່ງກ່ຽວກັບຄວາມຈຳເປັນ ເພື່ອຊຸກຍູ້ສາຍພົວພັນມິດຕະພາບ ແລະ ການຮ່ວມມືກັບປະເທດຕ່າງໆໃນຂົງເຂດພາກພື້ນ ແລະ ທົ່ວໂລກ.
ຂ່າວ: ເພັດໂພໄຊ
