ກອງປະຊຸມສຸດຍອດແມ່ນໍ້າຂອງ-ສ. ເກົາຫລີຄັ້ງປະຖົມມະລຶກ ທີ່ໄດ້ຈັດຂຶ້ນໃນມື້ນີ້ ວັນທີ 27 ພະຈິກ 2019 ທີ່ນະຄອນປູຊານ, ສ.ເກົາຫລີ ແມ່ນເປັນຂີດໝາຍປະຫວັດສາດອັນສໍາຄັນ ໃນການຍົກລະດັບກົນໄກການຮ່ວມມື ຂຶ້ນສູ່ລະດັບສູງສຸດ ພ້ອມທັງ ເປັນໂອກາດອັນດີໃນການຮ່ວມກັນ ວາງທິດທາງແຜນການຮ່ວມມືໃນຕໍ່ໜ້າ ສໍາລັບຂອບການ ຮ່ວມມືແມ່ນໍ້າຂອງ-ສ.ເກົາຫລີ ເພື່ອກະຕຸກຊຸກຍູ້ການເຕີບໂຕ ທາງດ້ານເສດຖະກິດໃນພາກພື້ນແມ່ນໍ້າຂອງ.
ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາ ຄະນະຜູ້ແທນ ຈາກ ສປປ ລາວ ເຂົ້າຮ່ວມກອງປະຊຸມດັ່ງກ່າວ ຊຶ່ງມີບັນດາຜູ້ນຳ ຈາກປະເທດສະມາຊິກ ແມ່ນໍ້າຂອງ–ສ.ເກົາຫລີ ເຂົ້າຮ່ວມຢ່າງພ້ອມພຽງ. ກອງປະຊຸມໄດ້ດຳເນີນໄປພາຍໃຕ້ການເປັນປະທານຮ່ວມ ຂອງ ທ່ານ ປະທານາທິບໍດີ ສ.ເກົາຫລີ ແລະ ທ່ານ ນາຍົກລັດຖະມົນຕີ ແຫ່ງ ຣາຊະອານາຈັກໄທ.
ຂອບການຮ່ວມມືແມ່ນໍ້າຂອງ-ສ.ເກົາຫລີ ໄດ້ຖືກສ້າງຕັ້ງຂຶ້ນໃນປີ 2011 ໂດຍມີປະເທດສະມາຊິກທັງໝົດ 6 ປະເທດຄື: ກໍາປູເຈຍ, ລາວ, ມຽນມາ, ໄທ, ຫວຽດນາມ ແລະ ສ. ເກົາຫລີ. ຈຸດປະສົງ ຂອງການສ້າງຕັ້ງກົນໄກການຮ່ວມມືດັ່ງກ່າວແມ່ນເພື່ອ ຮັດແໜ້ນການພົວພັນ ແລະ ຮ່ວມມືທາງດ້ານເສດຖະກິດ ລະຫວ່າງ ບັນດາປະເທດແມ່ນໍ້າຂອງ ກັບ ສ. ເກົາຫລີ ກໍ່ຄື ເພີ່ມທະວີການຮ່ວມມື ລະຫວ່າງ ອາຊຽນ ແລະ ສ.ເກົາຫລີ ແລະ ຢູ່ໃນກອງປະຊຸມລັດຖະມົນຕີຕ່າງປະເທດຄັ້ງທີ 8 ໃນປີ 2018 ຜ່ານມາ, ໄດ້ຕົກລົງຍົກລະດັບກົນໄກການຮ່ວມມືໄປສູ່ ລະດັບສຸດຍອດ ຊຶ່ງ ສ.ເກົາຫລີ ໄດ້ຮັບເປັນເຈົ້າພາບຈັດກອງປະຊຸມຄັ້ງປະຖົມມະລຶກໃນຄັ້ງນີ້.
ກອງປະຊຸມສຸດຍອດແມ່ນໍ້າຂອງ-ສ. ເກົາຫລີ ຄັ້ງປະຖົມມະລຶກ ໃນປີນີ້ ຍັງໄດ້ສະແດງຄວາມຊົມເຊີຍຕໍ່ຜົນສຳເລັດ ຂອງກອງປະຊຸມລັດຖະມົນຕີຕ່າງປະເທດແມ່ນ້ຳຂອງ–ສ.ເກົາຫລີ ຄັ້ງທີ 9 ຊຶ່ງໄດ້ຈັດຂຶ້ນໃນເດືອນ ສິງຫາ 2019 ທີ່ຜ່ານມາ. ກອງປະຊຸມ ໄດ້ທົບທວນຄືນຄວາມຄືບໜ້າຂອງການຈັດຕັ້ງ ປະຕິບັດວຽກງານຕ່າງໆພາຍໃຕ້ຂອບການຮ່ວມມືດັ່ງກ່າວ ໃນໄລຍະ 1 ປີຜ່ານມາ ໂດຍສະເພາະ ການຈັດຕັ້ງປະຕິບັດ ແຜນປະຕິບັດງານ 3 ປີ ແມ່ນໍ້າຂອງ-ສ. ເກົາຫລີ (2017-2020) ແລະ ຖະແຫຼງການຮ່ວມຂອງກອງປະຊຸມລັດຖະມົນຕີຕ່າງ ປະເທດແມ່ນໍ້າຂອງ-ສ. ເກົາຫລີ ຄັ້ງທີ 8, ຊຶ່ງບັນດາຜູ້ນໍາແມ່ນໍ້າ ຂອງ-ສ. ເກົາຫລີ ໄດ້ສະແດງຄວາມຊົມເຊີຍຕໍ່ໝາກຜົນຂອງການ ຮ່ວມມືໃນໄລຍະຜ່ານມາ ແລະ ເຫັນວ່າ ຂອບການຮ່ວມມືດັ່ງກ່າວມີການຂະຫຍາຍຕົວຢ່າງຕໍ່ເນື່ອງ, ໂຄງການຕ່າງໆ ພາຍໃຕ້ກອງທຶນຮ່ວມມືແມ່ນໍ້າຂອງ-ສ.ເກົາຫລີ ໄດ້ຮັບການຈັດຕັ້ງປະຕິບັດຢູ່ໃນບັນດາປະເທດສະມາຊິກຢ່າງເປັນຮູບປະທໍາ ແລະ ໄດ້ປະກອບສ່ວນຢ່າງສໍາຄັນເຂົ້າໃນການພັດ ທະນາເສດຖະກິດ-ສັງຄົມ ຢູ່ໃນພາກພື້ນແມ່ນໍ້າຂອງ. ໃນນັ້ນ, ລວມມີ 3 ໂຄງການ ທີ່ກໍາລັງຈັດຕັ້ງປະຕິບັດຢູ່ ສປປ ລາວ ຄື:
1. ໂຄງການເພີ່ມຄວາມອາດສາມາດຂອງປະຊາຊົນ ແລະ ບັນດາເມືອງທຸກຍາກ ຂອງ ສປປ ລາວ ໃນການເຂົ້າເຖິງ ນິຕິກໍາ ຂອງຂະແໜງອຸດສາຫະກໍາ ແລະ ການຄ້າ ເພື່ອເປັນການກະກຽມໃຫ້ແກ່ການເຊື່ອມໂຍງ, ການຮ່ວມມືເສດຖະກິດ, ສະຖາບັນ ແລະ ການເປີດກວ້າງທາງດ້ານການຄ້າ; 2. ໂຄງການສ້າງແຜນແມ່ບົດ ແລະ ຄວາມອາດສາມາດ ເພື່ອພັດທະນາພື້ນຖານໂຄງລ່າງ ດ້ານອຸຕຸນິຍົມ ແລະ ອຸທົກກະສາດ ໃນອ່າງແມ່ນໍ້າຂອງ ຢູ່ ສປປ ລາວ ໃຫ້ທັນສະໄໝ ແລະ 3. ໂຄງການພັດທະນາ ລະບົບຕິດຕາມການຈັດຕັ້ງປະຕິບັດໂຄງການ ໃນຂົງເຂດພາກພື້ນແມ່ນໍ້າຂອງ. ທັງ 3 ໂຄງການລວມມູນຄ່າທັງໝົດ ແມ່ນ ຫຼາຍກວ່າ 1,2 ລ້ານໂດລາ.
ພ້ອມດຽວກັນນັ້ນ, ບັນດາຜູ້ນໍາປະເທດແມ່ນໍ້າຂອງ ຍັງໄດ້ສະແດງຄວາມຊົມເຊີຍ ແລະ ຂອບໃຈ ຕໍ່ ສ. ເກົາຫລີ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນຂອບການຮ່ວມມືດັ່ງກ່າວ ໂດຍສະເພາະ ການເພີ່ມງົບປະມານຊ່ວຍເຫຼືອເຂົ້າໃນກອງ ທຶນຮ່ວມມືແມ່ນໍ້າຂອງ-ສ.ເກົາຫລີ ຈາກ 1,12 ລ້ານໂດລາ ໃນປີ 2018 ມາເປັນ 2 ລ້ານໂດລາ ໃນປີ 2019 ແລະ ມີແຜນຈະເພີ່ມ ຂຶ້ນເປັນ 3 ລ້ານໂດລາ ໃນປີ 2020.
ຜູ້ນໍາ ສ. ເກົາຫລີ ກໍ່ໄດ້ຢໍ້າຄືນເຖິງ ນະໂຍບາຍຫັນສູ່ທິດໃຕ້ໃໝ່ ຂອງ ສ.ເກົາຫລີ ຊຶ່ງຖືເປັນຂໍ້ລິເລີ່ມໜຶ່ງ ທີ່ຖືກກັບກາລະໂອກາດ ແຫ່ງ ການສົ່ງເສີມການຮ່ວມມື ເພື່ອການພັດທະນາ ດ້ານເສດຖະກິດ ບົນຫຼັກການຕ່າງຝ່າຍ ຕ່າງມີຜົນປະໂຫຍດ.
ກອງປະຊຸມ ໄດ້ຮັບຮອງເອົາເອກະສານສໍາຄັນ ຈໍານວນ 1 ສະບັບຄື: ຖະແຫຼງການ ແມ່ນໍ້າຂອງ-ແມ່ນໍ້າຮັນ ວ່າດ້ວຍ ການສ້າງຄູ່ຮ່ວມມື ເພື່ອປະຊາຊົນ, ວັດທະນາຖາວອນ ແລະ ສັນຕິພາບ (Mekong-Han River Declaration For Establishing Partnership for People, Prosperity and Peace) ຊຶ່ງປະກອບມີ 3 ເສົ້າຄໍ້າ ຄື: 1. ປະຊາຊົນ ໃນສັງຄົມທີ່ມີສ່ວນຮ່ວມ (People for Inclusive Society); 2. ຄວາມວັດທະນາຖາວອນ ຈາກການແບ່ງປັນປະສົບການ (Prosperity by Sharing Experience) ແລະ 3. ສັນຕິພາບ ເພື່ອການພັດທະນາທີ່ຍືນຍົງ (Peace for Sustainable Development).
ຂ່າວ: ວຽງັນທາຍ
ພາບ: ກົມຂ່າວ