ທ່ານ ຮສ. ດຣ. ພູທອນ ເມືອງປາກຮອງລັດຖະມົນຕີ, ກະຊວງສາທາລະນະສຸກ, ຜູ້ປະຈຳການຄະນະສະເພາະກິດເພື່ອປ້ອງກັັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໄດ້ຖະແຫຼງຂ່າວ ຕອນແລງຂອງມື້ວັນທີ 24 ກໍລະກົດວ່າ: ໄດ້ພົບຜູ້ຕິດເຊື້ອ COVID-19 ໃໝ່ ຈໍານວນ 1 ຄົນ ຢູ່ລາວ ທີ່ເດີນທາງມາແຕ່ ສ ເກົາຫຼີ, ເປັນເພດຊາຍ ອາຍຸ 32 ປີ, ສັນຊາດເກົາຫຼີ, ພະນັກ ງານໄຟຟ້າໂຄງການນໍ້າງຽບແຕ່ ຍັງບໍ່ທັນໄດ້ໄປໂຄງການເພາະຍັງຢູ່ໄລຍະກັກໂຕ 14 ວັນຢູ່ໃນໂຮງແຮມ (Crown Plaza Hotel) ຢູ່ນະຄອນຫຼວງວຽງຈັນ.
ຊາຍໜຸ່ມດັ່ງກ່າວໄດ້ເດີນທາງມາຈາກປະເທດຍີ່ປຸ່ນ (ໂອສະກາ-ໂຕກຽວ) ມາຜ່ານ ສ ເກົາຫຼີ (ອິນຊອນ) ມາ ສປປ ລາວໃນວັນທີ 18 ກໍລະກົດທີ່ຜ່ານມາ ໂດຍຜ່ານສະໜາມບິນສາກົນ ວັດໄຕ ຜູ້ກ່ຽວເດີນທາງມາກັບກຸ່ມໝູ່ 04 ຄົນ, ໃນຖ້ຽວບິນ QV922A ມີຜູ້ໂດຍສານ 109 ຄົນ.
ໃນວັນທີ 22 ກໍລະກົດທີ່ຜ່ານມາ ທີມງານສູນວິເຄາະ ແລະ ລະບາດວິທະຍາ ຮ່ວມກັບພະແນກສາທາລະນະສຸກນະຄອນຫຼວງ ແລະ ຫ້ອງການສາທາລະນະສຸກເມືອງສີໂຄດຕະບອງ ໄດ້ໄປເກັບຕົວຢ່າງຜູ້ກ່ຽວຢູ່ໂຮງແຮມ ແລະ ໃນວັນທີ 23 ກໍລະກົດ ເວລາ 21 ໂມງ 00 ຜົນກວດອອກມາວ່າພົບເຊື້ອ ໂຄວິດ-19. ປັດຈຸບັນນີ້ຊາຍຄົນດັ່ງກ່າວທາງທີມງານແພດໜໍໄດ້ນໍາໄປປິ່ນປົວຢູ່ໂຮງໝໍມິດຕະພາບແລ້ວ. ສໍາລັບຜູ້ຢູ່ໃກ້ຊິດກັບຜູ້ກ່ຽວມີ 17 ຄົນ.
ຫຼັງຈາກຮອດໂຮງແຮມກັກຕົວ ນັບແຕ່ວັນທີ່ 18 ຫາ 23 ກໍລະກົດ, ຜູ້ກ່ຽວບໍ່ໄດ້ເດີນທາງອອກຈາກຫ້ອງ, ກິນເຂົ້າ-ນໍ້າຢູ່ໃນຫ້ອງໂດຍມີພະນັກງານໂຮງແຮມເອົາມາສົ່ງປະໄວ້ຢູ່ໜ້າຫ້ອງ ແລະ ບໍ່ມີພະນັກງານໂຮງແຮມເຂົ້າໄປໃນຫ້ອງ ແລະ ເຮັດອະນາໄມໃນຫ້ອງເພາະເປັນກົດລະບຽບຂອງໂຮງແຮມຜູ້ກ່ຽວຕ້ອງຮັບຜິດຊອບເອງໃນໄລຍະກັກຕົວ, ທາງໂຮງແຮມໄດ້ມີການວັດແທກອຸນຫະພູມ ເຊົ້າ-ແລງ ຊຶ່ງຜົນການວັດແທກຜູ້ກ່ຽວມີອຸນຫະພູມສະເລ່ຍປະມານ 36,3-36,6 ອົງສາເຊ, ນອກນັ້ນທາງໂຮງແຮມໄດ້ຈັດກຽມອຸປະກອນທີ່ຈໍາເປັນໄວ້ຫ້ອງພັກໃຫ້ແກ່ຜູ້ກ່ຽວຕາມກໍານົດ 14 ວັນ.
ປະຈຸບັນນີ້ທົ່ວປະເທດລາວ ມີສູນຈໍາກັດບໍລິເວນ ທັງໝົດ 55 ສູນ, ມີຜູ້ຖືກຈຳກັດບໍລິເວນຢູ່ສູນ 2.585 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ພົບຜູ້ຕິດເຊື້ອ. ປະຈຸບັນນີ້, ມີຄົນເຈັບຜູ້ຕິດເຊື້ອພະຍາດ COVID-19 ໃໝ່ ໄດ້ນອນປີ່ນປົວຢູ່ໂຮງໝໍມິດຕະພາບ ຈຳນວນ 01 ຄົນ, ສ່ວນຄົນເຈັບ 19 ຄົນແມ່ນໄດ້ປິ່ນປົວຫາຍດີແລ້ວ ແລະອອກໂຮງໝໍໝົດທຸກຄົນ.
ຂ່າວ: ວຽງຈັນທາຍ
