ປະຈຸບັນ ສະພາບການຮຽນ-ການສອນ ອອນລາຍ ຢູ່ແຂວງສາລະວັນ ຍັງມີຄວາມຫຍຸ້ງຍາກ, ຍັງຂາດອຸປະກອນ, ບາງໂຮງຮຽນ ການຮັບສັນຍານອິນເຕີເນັດ ຍັງບໍ່ທົ່ວເຖີງ ແລະ ການເຂົ້າເຖີງໂທລະພາບ ຊ່ອງທາງການຮຽນຮູ້ຕ່າງໆຈາກກະຊວງ ຍັງຈຳກັດ.
ຕໍ່ສະພາບດັ່ງກ່າວ, ພະແນກສືກສາ ແລະ ກິລາ ແຂວງສາລະວັນ ກໍໄດ້ຈັດກອງປະຊຸມຜູ້ບໍລິຫານການສືກສາ ແລະ ກິລາ ທົ່ວແຂວງສາລະວັນ ຜ່ານລະບົບກອງປະຊຸມທາງໄກ ເມື່ອບໍ່ດົນມານີ້, ໂດຍການເຂົ້າຮ່ວມຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງຜູ້ຊີ້ນໍາວຽກງານວັດທະນະທໍາ-ສັງຄົມ, ພາຍໃຕ້ການເປັນປະທານຂອງ ທ່ານ ສິລິສັກ ຖະໜອມຮັກ ຫົວໜ້າພະແນກສຶກສາທິການ ແລະ ກິລາແຂວງ.
ກອງປະຊຸມຄັ້ງນີ້ ໄດ້ຕີລາຄາການຈັດຕັ້ງປະຕິບັດແຜນພັດທະນາການສືກສາ ແລະ ກິລາປະຈໍາສົກຮຽນ 2020-2021 ໃນໄລຍະເລີ່ມຕົ້ນ, ໂດຍສະເພາະໄລຍະການແຜ່ລະບາດຂອງພະຍາດໂຄວິດ-19 ແມ່ນໄດ້ເຮັດໃຫ້ລະບົບການຮຽນ-ການສອນ ບໍ່ເປັນປົກກະຕິ ເປັນຕົ້ນ: ກິດຈະກຳ ແລະ ວຽກງານຈຸດສຸມຕ່າງໆ ມີຄວາມຫຼ້າຊ້າ, ບາງກິດຈະກໍາການຮຽນ-ການສອນໄດ້ໂຈະ ຫຼື ເລື່ອນເວລາອອກໄປ ເຮັດໃຫ້ການຮຽນ-ການສອນ ບໍ່ໄປຕາມຫຼັກສູດການຮຽນທີ່ວາງໄວ້, ເຊີ່ງເປັນສິ່ງທ້າທາຍຢ່າງໃຫຍ່ຫຼວງ ຕໍ່ກັບການຍົກຄຸນນະພາບການຮຽນ-ການສອນ ທຸກຂັ້ນທຸກຊັ້ນຮຽນ.
ນອກນັ້ນ ດ້ານບຸກຄະລາກອນ ຍັງມີຄວາມຮູ້ຈຳກັດ, ຂາດຄວາມຊຳນິຊຳນານໃນການໃຊ້ລະບົບ ICT ເຕັກໂນໂລຊີການສື່ສານຂໍ້ມູນຂ່າວສານ, ນັກຮຽນໃນບາງທ້ອງຖີ່ນ ຍັງບໍ່ທັນຄຸ້ນເຄີຍກັບການຮຽນອອນລາຍ, ການຮ່ຳຮຽນບໍ່ຕິດພັນຄືນັ່ງຮຽນໃນຫ້ອງຮຽນ ຫຼື ໃກ້ຊິດກັບຄູອາຈານ.
ຂໍ້ມູນ: ແຂວງສາລະວັນ
