Vientiane Times Lao
10 ຂໍ້ຄົງຄ້າງທີ່ລັດຖະບານ ຈະເລັ່ງແກ້ໄຂໃນປີ 2020

10 ຂໍ້ຄົງຄ້າງທີ່ລັດຖະບານ ຈະເລັ່ງແກ້ໄຂໃນປີ 2020

ລັດຖະບານຈະສຸມໄສ່ທຸກຄວາມພະຍາຍາມ ໃນການແກ້ໄຂໜ້າວຽກຕ່າງ ໃນໄລຍະທີ່ຜ່ານມາເຊິ່ງມີຫຼາຍໜ້າວຽກທີ່ໄດ້ສຳເລັດ ແລະ ກໍ່ຍັງມີຫຼາຍວຽກທີ່ຍັງຈະສືບຕໍ່.

ແຕ່ເຖິງຢ່າງໃດກໍ່ ຕາມ ລັດຖະບານຈະຕ້ອງໄດ້ສືບຕໍ່ເຮັດເພື່ອໃຫ້ ສຳເລັດຕາມແຜນທີ່ວາງໄວ້ ອັນນີ້ກໍ່ເພື່ອເຮັດໃຫ້ ການພັດທະນາເສດຖະກິດ-ສັງຄົມດຳເນີນໄປຕາມແຜນທີ່ທາງລັດຖະບານໄດ້ກຳນົດໄວ້. 

ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ສະເໜີຕໍ່ສະມາຊິກສະພາໃນກອງ ປະຊຸມສະໄໝສາມັນເທື່ອທີ 8 ຂອງສະພາແຫ່ງ ຊາດ ຊຸດທີ VIII ທີ່ໄດ້ເປີດຢ່າງເປັນທາງການ ວັນພະຫັດ ວັນທີ 7 ພະຈິກ 2019 ກ່ຽວກັບ ການແກ້ໄຂຂໍ້ຄົງຄ້າງທີ່ຈະຕ້ອງແກ້ໄຂຢ່າງຮີບດ່ວນວ່າ : ປີ2020 ຈະສືບຕໍ່ຊຸກຍູ້ທຸກຂະແໜງການເພື່ອໃຫ້ເສດຖະກິດມີການຂະຫຍາຍຕົວຢ່າງຕໍ່ເນື່ອງ, ຈະເຮັດໃຫ້ສະມັດຕະພາບຂອງການຜະລິດສູງຂື້ນທັງປະລິມານ ແລະ ຄຸນນະພາບ ສາມາດແຂ່ງຂັນກັບສີນຄ້ານຳເຂົ້າ, ຈະເລັ່ງປັບປຸງລັດວິສາຫະກິດ ເປັນວຽກງານທີ່ລັດຖະບານໃຫ້ຄວາມສຳຄັນ ທັງໄດ້ກຳນົດເປົ້າໝາຍບໍລິສັດທີ່ຈະປັບປຸງຊັດເຈນ ແຕ່ໃນພາກປະຕິບັດຍັງມີຄວາມຄືບໜ້າຊ້າ ຍ້ອນມີບັນຫາສະສົມຊຳເຮື້ອມາດົນ ແຕ່ຊອກຫາຊ່ອງທາງແກ້ໄຂນັ້ນຍັງບໍ່ຕໍ່ເນື່ອງ ຊັກຊ້າ ແກ່ຍາວ, ແກ້ໄຂບັນຫາສະພາບແວດລ້ອມ ຂັ້ນຂອດ ຄວາມປົ່ງໃສໃນການລົງທືນ ແລະ ດຳເນີນທຸລະກິດ, ປັບປຸງ ແລະ ສົ່ງເສີມການທ່ອງທ່ຽວຖືເປັນບຸລິມະສິດທີ່ສຳຄັນ ຂອງລັດຖະບານ, ການແກ້ໄຂບັນຫາການເກັບລາຍຮັບ ແລະ ການຄຸ້ມຄອງສີນຄ້າ, ແກ້ໄຂສະຖຽນລະພາບທາງດ້ານການເງິນ ເປັນຕົ້ນສະພາບອັດຕາແລກປ່ຽນມີການເໜັງຕິງແຮງ ສ່ວນຕ່າງລະຫວ່າງອັດຕາແລກປ່ຽນຕະຫຼາດ ແລະ ທະນາຄານຍັງຮ່າງກັນຫຼາຍ ແລະ ຕ້ອງໄດ້ແກ້ໄຂຢ່າງຂາດໂຕ, ລະດັບຄັງສຳຮອງເງິນຕາຕ່າງປະເທດຍັງມີຈຳກັດ ແລະ ໂຄງປະກອບຂອງຄັງສຳຮອງເງິນຕາຕ່າງປະເທດຍັງບໍ່ທັນຫຼາກຫຼາຍຕ້ອງໄດ້ແກ້ໄຂ, ເລັ່ງພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ ແລະ ແກ້ໄຂຄວາມແຕກໂຕນຂອງການພັດທະນາລະຫວ່າງຕົວເມືອງ ແລະ ຊົນນະບົດ, ປັບປຸງການບໍລິຫານລັດ, ເລັ່ງແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນແມ່ນການຫຼິ້ນກິນຟຸມເຟື່ອຍ ບັນຫາຢາເສບຕິດ ການປຸ້ນຈີ້ ຂີ້ລັກງັດແງະ ອຸປະຕິເຫດ ແລະ ໄພສັງຄົມອື່ນໆ. 

ທ່ານ ທອງລຸນ ສີສຸລິດໄດ້ກ່າວຕື່ມວ່າ : ບັນດາຂໍ້ຄົງຄ້າງທີ່ກ່າວມານັ້ນແມ່ນການສັງລວມໂດຍສັງເຂບ ເພື່ອຍັກໃຫ້ເຫັນບັນຫາທີ່ລັດຖະບານຈະຕ້ອງໄດ້ເອົາໄຈໃສ່ແກ້ໄຂເພື່ອໃຫ້ການພັດທະນາເສດຖະກິດ-ສັງຄົມດຳເນີນໄປຕາມແຜນການທີ່ໄດ້ກຳນົດໄວ້.

ຂ່າວ: ສົມພາວັນ

ພາບ: ຄຳພັນ

Related Articles

Leave a Reply