ເກີດເຫດລົດຂົນສົ່ງສິນຄ້າລະເບີດແບບບໍ່ຮູ້ສາເຫດ ແລະ ໄດ້ເຮັດໃຫ້ໄຟຟົ້ງໄປໄໝ້ລົດບັນທຸກສິນຄ້າອີກຫຼາຍຄັນ ໃນມື້ເຊົ້າວັນທີ 3 ທັນວາ 2020 ນີ້ ເວລາ 9 ໂມງ 00 ທີ່ດ່ານສາກົນແດນສະຫວັນ-ລາວບາວ (ຊາຍແດນລາວ-ຫວຽດນາມ) ຢູ່ເບື້ອງຝັ່ງລາວ ທີ່ບ້ານແດນສະຫວັນ ເມືອງເຊໂປນ ແຂວງສະຫວັນນະເຂດ, ຮອດປັດຈຸບັນນີ້ເວລາປະມານ 10 ໂມງ 20 ນາທີຍັງບໍ່ສາມາດຄວບຄຸມໄຟໄໝ້ດັ່ງກ່າວໄດ້ ຍ້ອນຍັງມີສຽງລະເບີດຄ້າຍຄືສຽງໝາກກະໂພກ ແຕກເປັນໄລຍະໆ ແລະ ມີໄຟລຸກຖ້ວມລົດບັນທຸກຈໍານວນຫຼາຍຄັນ.
ຫຼັງຈາກເກີດເຫດໄຟໄໝ້ປະມານ 40 ນາທີ ເຈົ້າໜ້າທີ່ພ້ອມດ້ວຍລົດດັບເພີງໄດ້ມາຮອດສະຖານທີ່ເກີດເຫດແຕ່ບໍ່ສາມາດເຂົ້າໄປໃກ້ສະຖານທີ່ໄຟ ໄໝ້ໄດ້ຍ້ອນຍັງມີຖັງນໍ້າມັນຊຶ່ງອາດຈະເກີດລະເບີດໄດ້ທຸກເວລາ ຍ້ອນຄວາມຮ້ອນ. ສ່ວນຄວາມຄືບໜ້າຂອງການເກີດເຫດລະເບີດໃນຄັ້ງນີ້ ແລະ ຜົນເສຍຫາຍ ຫຼື ອາດມີຜູ້ບາດເຈັບຈະລາຍງານຕາມພາຍຫຼັງ.
ຂ່າວ: ວຽງຈັນທາຍ
