Vientiane Times Lao
19 ຄອບຄົວ ໄດ້ຮັບຄ່າຊົດເຊີຍ 4,6 ຕື້ກີບ

19 ຄອບຄົວ ໄດ້ຮັບຄ່າຊົດເຊີຍ 4,6 ຕື້ກີບ

ໂຄງການກໍ່ສ້າງທາງດ່ວນນະຄອນຫຼວງວຽງຈັນ ໝາຍເລກ 1 ​​ຈ່າຍ​ເງີິນ ຄ່າຊົດເຊີຍ ແລະ ທົດແທນຄ່າເສຍຫາຍ ຈຳນວນ 4,6 ຕື້​ກີບ​ ໃຫ້​ 19 ຄອບຄົວທີ່ມີສ່ວນຮ່ວມໃນໂຄງການ​ໄປ​ແລ້ວ​ໃນ​ມື້ວັນທີ 19 ​ເດືອນ​ພະຈິກ.

​​ພິທີມອບ-ຮັບເງິນຊົດເຊີຍຄັ້ງທີ 1 ​​ໄດ້​ຈັດ​ຂຶ້ນ​ ຢູ່ສະ​ໂມ​ສອນ ​ເມືອງ ​ໄຊ​ທາ​ນີ ​ໂດຍ​​ເປັນ​ກຽດ​ເຂົ້າຮ່ວມ​ ຂອງ​ທ່ານ ພູ​ຂົງ ບັນນະ​ວົງ ຮອງ​ເຈົ້າ​ຄອງ ນະຄອນ ຫຼວງ​ວຽງ​ຈັນ ທັງ​ເປັນ ຫົວໜ້າ​ພະ​ແນກ​ແຜນການ ​ແລະ ການ​ລົງທຶນ ນະຄອນຫຼວງ​ວຽງ​ຈັນ.

​​ຄອບຄົວທີ່​ໄດ້​ຮັບ​ເງິນ​ໃນຄັ້ງ​ນີ້​ ເປັນ​ເຈົ້າ​ຂອງດິນ 19​ ຕອນ ຢູ່​ ​​ເມືອງ ​ໄຊ​ທານີ ​ແລະ ເມືອງ​ ໄຊ​ເສດ​ຖາ ທີ່​​ນອນ​ຢູ່​ໃນ​ເຂດໂຄງການກໍ່​ສ້າງ​ທາງດັ່ງກ່າວ. ​​ເນື້ອ​ທີ່ດິນ ທີ່​ໄດ້​ຮັບ​ການ​ຊົດ​ເຊີຍ​ໃນ​ຄັ້ງ​ທີ 1 ນີ້​ ມີ​ຈຳນວນ 41.209 ຕາ​ແມັດ ຫຼື 4,12 ​ເຮັກຕາ.​

ການ​ມອບ-​ຮັບ​ເງີ​ນ​ໃຫ້​ເຈົ້າ​ຂອງ​ດິນ19 ​ຕອນ​ນີ້ເປັນ​ພຽງສ່ວນ​ໜຶ່ງ​ຂອງ​ຄອບ ຄົວທັງ​ທີ່​ຖືກ​ຜົນ​ກະທົບ​ຈາກ​ໂຄງການ​ດັ່ງກ່າວ.

​ທ່າ​ນ ບຸນ​ທຳ ພຸດ​ທະ​ວົງສາ ຫົວໜ້າ​ພະ​ແນ​ກ ຊັບພະຍາກອນ​ນໍ້າ ​ແລະ ສິ່ງ​ແວດ​ລ້ອມ ນະຄອນຫຼວງ​ວຽງ​ຈັນ ​ໄດ້​ກ່າວ​ຕໍ່​ພິທີ​ດັ່ງກ່າວວ່າ: ​ໂຄງການກໍ່ສ້າງທາງດວ່ນ ນະຄອນຫຼວງວຽງຈັນ ໝາຍເລກ 1 ມີ​ຄວາມ​ຍາວ​ 15,9 ກິ​ໂລ​ແມັດ ​ໄດ້ກວມ​ເອົາ 535​ ຕອນ​ດິນຢູ່ 14 ​ບ້ານ ຂອງ​ເມື​ອງ​ ໄຊ​ເສດ​ຖາ ​ແລະ 333 ຕອນ​ດີິນຢູ່​ 7 ບ້ານ ຂອງ ເມືອງ​ ໄຊ​ທານີ ລວມ​​ຕອນ ​ດິນ​ທັງ​ໝົດ​ໃນ​ສອງ​ເມືອງ​ມີ​ 838 ຕອນ. ຈຳນວນ​ສິ່ງ​ປຸກ​ສ້າງ​ທັງ​ໝົດ​ມີ 160​ ຫຼັງ ​ໃນ​ນີ້ ຢູ່​ເມືອງ ​ໄຊ​ເສດຖາ ມີຈຳນວນ 134 ຫຼັງ ​ແລະ 26 ຫຼັງ​ ຢູ່​ເມືອງ ​ໄຊ​ທານີ. 

ມູນ​ຄ່າ​ຊົດ​ເຊີຍ​ທັງ​ໝົດ​ຂອງ​ໂຄງການ​ ປະ​ມານ 353,2 ຕື້​ກີບ ຫຼື 41,2 ລ້ານ​ໂດ​ລາ​ສະຫະລັດ​ ອາ​ເມ​ລິ​ກາ.

​​ການ​ຊົດ​ເຊີຍ​ທັງ​ໝົດ​ຄາດ​ວ່າ​ຈະ​ໃຫ້​ສຳ​ເລັດ​ພາຍ​ໃນ ວັນ​ທີ 30 ເດືອນ​ທັນວາ ປີ 2019 ນັບ​ແຕ່​ວັນ​ທີ 18 ​​ເດືອນ​ພະຈິກປີ​ນີ້​ເປັນ​ຕົ້ນ​​ໄປ ​ເພືື່ອ​ໃຫ້ການ​ກໍ່ສ້າງ ​ສາມາດ​​ດຳ​ເນີນ​ໄປ​ໄດ້ ​ໃນ​ຕົ້ນ​ ເດືອນ​ມັງກອນ ​ປີ 2020.

ໂຄງການກໍ່ສ້າງທາງດວ່ນ ນະຄອນຫຼວງວຽງຈັນ ໝາຍເລກ 1 ​ແມ່ນ ​ນອນ​ໃນ​ແຜນ​ຍຸດ​ທະ​ສາດ​ຂອງ​ການ​ພັດທະນາ​ຂອງ​ ນະຄອນຫຼວວຽງ​ຈັນ.

ທ່ານ  ພູ​ຂົງ ບັນນະ​ວົງ ຮອງ​ເຈົ້າ​ຄອງ ນະຄອນຫຼວງ​ວຽງ​ຈັນ ທັງ​ເປັນ ຫົວໜ້າ​ ພະ​ແນກ​ແຜນການ ​ແລະ ການ​ລົງທຶນ ນະຄອນຫຼວງ​ວຽງ​ຈັນ ​ໄດ້​ສະ​ແດງ​ຄວາມ​ຂອບ​ໃຈ​ ຕໍ່​ພໍ່​ແມ່​ປະຊາຊົນ​ ຜູ້ທີ່​ສະໜັບສະໜູນ​ ​ແລະ ອໍານວຍ​ຄວາມ​ສະດວກ ຕໍ່ການ​ພັນທະນາ​ ຂອງໂຄງການ​ນີ້.

ທ່ານ ສິນ ທຳ​ມະ​ວົງສາ ອາ​ໄສ​ຢູ່ ​ບ້ານ​ ໂພນ​ທັນ ​ເມືອງ​ ສີ​ສັດຕະ​ນາກ ນະຄອນຫຼວງ​ວຽງ​ຈັນ ​ເປັນ​ຜູ້​ໜຶ່ງ​ໃນ 19 ຄອບຄົວ​ທີ່ມີ​ດິນ​ຢູ່ ບ້ານ​ນາ​ແຄ ​ເມຶື​ອງ ​ໄຊ​ທານີ ​ໄດ້​ມາ​ຮັບ​ເອົາ​ຄ່າ​ຊົດ​ເຊີຍ​ເຊັ່ນ​ກັນ. ທ່ານ​ ກ່າວ​ວ່າ: ລາວ​ ມີ​ດິນ​ໜຶ່ງ​ຕອນ​ຢູ່ບ້າ​ນ ນາ​ແຄ ມີ​ເນື້ອ​ທີ່ 3 ​ເຮັກຕາ ​ແຕ່​ມີ​ພຽງ 400 ຕາ​ແມັດ​ ຖືກ​ກະທົບ​ຈາກ​ໂຄງການ. ​ເພີ່​ນ​ເວົ້າ​ວ່າ: ລາວ​ກະ​ຮູ້ສຶກ​ດີ​ໃຈ​ທີ່​ສຸດທີ​່ໄດ້​ຮັບ​ຜົນ ​ຕອບ​ແທນ​ທີ່​ໜ້າ​ເພິ່ງພໍ​ໃຈ​ຈາກ​ໂຄງການ ​ແລະ ການ​ເສຍສະຫຼະ​ເນື້ອ​ທີ່​ ດິນ​ຂອງ​ເພີ່ນ ​ເປັນ​ການ​ປະກອບສ່ວນ​ຕໍ່​ການ​ພັດທະນາ.

ທ່ານ ບຸນ​ຈັນ ຈາ​ຊົວກ້າວ ຮອງ​ເຈົ້າ​ເມືອງ ​ເມືອງ ​ໄຊ​ທາ​ນີ ​ເວົ້າ​ວ່າ: ​ໃນ​ຈຳນວນ 19 ​ຄອບຄົວ​ທີ່​ມາ​ຮັບ​ຄ່າ​ຊົດ​ເຊີຍ​ນີ້ ມີ​ຈຳນວນ 13​ ຄອບຄົວ​ ແມ່ນ​ຢູ່​ເມືອງ ​ໄຊ​ທາ​ນີ ​ແລະ ສ່ວນ​ທີ​່ເຫຼືອ​ແມ່ນ​​ຢູ່ ​ເມືອງ ​ໄຊ​ເສດ​ຖາ.

ການ​ກໍ່ສ້າງໂຄງການທາງດ່ວນ ນະຄອນຫຼວງວຽງຈັນ ໝາຍເລກ 1 ຈະດຳເນີນໂດຍ ບໍລິສັດທາງດ່ວນ ໝາຍເລກ 1 ນະຄອນຫຼວງວຽງ ຈັນຈຳກັດຜູ້ດຽວ.

ຈຸດເລີ່ມຕົ້ນຂອງໂຄງການນີ້ ແມ່ນຢູ່ເຂດເສຖະກິດພິເສດບຶງທາດຫຼວງ ຜ່ານບ້ານຕ່າງໆຂອງ ເມືອງ ໄຊເສດຖາ ໄປສິ້ນສຸດຢູ່ ເຂດດົງໝາກຄາຍ ເມືອງ ໄຊທານີ.

ໂຄງການນີ້ ຄາດວ່າຈະຊ່ວຍຫຼຸດຜ່ອນຄວາມແອອັດຂອງການສັນຈອນຕາມ ເສັ້ນທາງ ໄກສອນ ພົມວິຫານ.

ຂ່າວ: ມະນີຈັນ

ພາບ: ຕ້ອມ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ