ລັດຖະບານລາວ ອະນຸຍາດໃຫ້ 2 ບໍລິສັດຄື: ບໍລິສັດ ລາວອໍແກນນິກການກະເສດສະອາດ ຈໍາກັດ ແລະ ບໍລິສັດ ສຸກສໍາລານການຄ້າ ແລະ ບໍແຮ່ ຈໍາກັດຜູ້ດຽວ ຮ່ວມກັນລົງທຶນປູກພືດປໍແກ້ວ ເພື່ອນໍາໃຊ້ທາງການແພດ ແລະ ເປັນສິນຄ້າ (ໄລຍະທົດລອງ) ຢູ່ເຂດບ້ານຫ້ວຍສຽດ ບ້ານນາຈິກ ເມືອງປາກຊັນ ແລະ ບ້ານນາໂອ ເມືອງບໍລິຄັນ ແຂວງບໍລິຄໍາໄຊໃນເນື້ອທີ 13 ເຮັກຕາ.
ພິທີລົງນາມເຊັນສັນຍາວ່າດ້ວຍການລົງທຶນປູກພືດດັ່ງກ່າວໄດ້ຈັດຂຶ້ນເມື່ອມໍ່ໆມານີ້ ທີ່ກະຊວງແຜນການ ແລະ ການລົງທຶນ ຕາງໜ້າລັດຖະບານລາວ ເຊັນໂດຍທ່ານ ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ແລະ ການ ລົງທຶນ ແລະ ຝ່າຍບໍລິສັດ ລົງນາມໂດຍ ທ່ານ ອຸດົມ ມະນີວົງ ຜູ້ອໍານວຍການບໍລິສັດ ລາວອໍແກນນິກການກະເສດສະອາດ ຈໍາກັດ ແລະ ທ່ານ ປະກາຍສິດ ອາໄພຍະສານ ປະທານບໍລິສັດ ສຸກສໍາລານການຄ້າ ແລະ ບໍແຮ່ ຈໍາກັດຜູ້ດຽວ.
.
ໃນສັນຍາສໍາປະທານ, ລັດຖະບານລາວຕາງໜ້າໂດຍກະຊວງ ແຜນການ ແລະ ການລົງທຶນ ມີຄວາມຕ້ອງການພັດທະນາເສດ ຖະກິດ-ສັງຄົມຂອງລາວ ຕາມທິດຍືນຍົງ ແລະ ສີຂຽວໂດຍສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດ ແລະ ເປົ້າໜາຍແຫ່ງການພັດທະນາທີ່ຍືນຍົງ “ SDGs” ທີ່ລາວເຮົາ ເປັນພາຄີ ເວົ້າລວມ ເວົ້າສະເພາະແມ່ນການດຶງດູດ ແລະ ເສີມການພັດທະນາການປູກພຶດເປັນຢາ (ຊະນິດພືດປໍແກ້ວ) ໂດຍຜ່ານຂະບວນການອະນຸຍາດລົງ ທຶນປູກພືດປໍແກ້ວ ເພື່ອຈໍາໜ່າຍພາຍໃນ ແລະ ສົ່ງອອກຕ່າງປະເທດ ແລະ ພາກສ່ວນບໍລິສັດ ໂດຍມີບໍລິສັດ ລາວອໍແກນນິກການກະເສດສະອາດ ຈໍາກັດ ມີສໍານັກງານຕັ້ງຢູ່ບ້ານຫາດດອນຄູນ ເມືອງບໍລິຄໍາໄຊ ແຂວງບໍລິຄໍາໄຊ ແລະ ບໍລິສັດ ສຸກສໍາລານການຄ້າ ແລະ ບໍ່ແຮ່ ຈໍາກັດຜູ້ດຽວ ມີສໍານັກງານຕັ້ງຢູ່ບ້ານໄຊສະຖານ ເມືອງສີສັດຕະນາກ ນະຄອນຫຼວງ ວຽງຈັນ ມີຄວາມຕ້ອງການໄດ້ຮັບຜົນປະໂຫຍດທີ່ເໜາະສົມຈາກການນໍາໃຊ້ທ່າແຮງບົ່ມຊ້ອນພາຍໃນຂອງປະເທດ ໂດຍສະເພາະແມ່ນການນໍາໃຊ້ທີ່ດິນ ແລະ ເງື່ອນໄຂທໍາມະຊາດທີ່ເອື້ອອໍານວຍຕໍ່ການພັດທະນາການປູກພືດເປັນຢາ ແລະ ເພື່ອສະນັບສະໜູນການພັດທະນາທ້ອງຖິ່ນ ການສ້າງວຽກເຮັດງານທໍາໃຫ້ປະຊາຊົນ ແລະ ສົ່ງເສີມທຸ ລະກິດພາຍໃນ.
ຂ່າວ: ສົມສະຫວັນ
