Vientiane Times Lao
4,300 ຄົນຈະເຂົ້າຮ່ວມແລ່ນຮາບມາລາທອນ ນາໆຊາດ ຄັ້ງທີ l

4,300 ຄົນຈະເຂົ້າຮ່ວມແລ່ນຮາບມາລາທອນ ນາໆຊາດ ຄັ້ງທີ l

ແລ່ນຮາບມາລາທອນ ນາໆຊາດ ຄັ້ງທີ l ປະຈຳປີ 2019 ຄາດວ່າຈະມີນັກກິລາທັງພາຍໃນ ແລະ ຕ່າງປະເທດເຂົ້າຮ່ວມ 4,300 ຄົນຢູ່ນະຄອນຫຼວງວຽງຈັນ.

ສະຫະພັນແລ່ນ-ລານແຫ່ງຊາດລາວ ຮ່ວມກັບ ວິສາຫະກິດສ່ວນບຸກຄົນ ອີເວັນຟໍກູດ ຈະເປີດການແຂ່ງຂັນກິລາແລ່ນ ວຽງຈັນ ຮາມາລາທອນ ນາໆຊາດ ຄັ້ງທຳອິດ ປະຈຳປີ 2019 ໃນ 4 ໄລຍະທາງ ພາຍໃຕ້ຄຳຂວັນ “A Unique City Tour Run” ໃນວັນທີ 8 ທັນວານີ້ເພື່ອເປັນການສົ່ງເສີມການອອກກຳລັງກາຍເພື່ອ ສຸຂະພາບ ແລະ ມິດຕະພາບ ລະຫວ່າງນັກກິລາດ້ວຍກັນ ພ້ອມທັງເປັນການສົ່ງເສີມການທ່ອງທ່ຽວ ສປປ ລາວ ໃຫ້ເຕີບໃຫຍ່ຂະຫຍາຍຕົວຂຶ້ນເລື້ອຍໆ.

ພິທີຖະແຫຼງຂ່າວການ ແຂ່ງຂັນກິລາແລ່ນ ວຽງຈັນ ຮາມາລາທອນ ນາໆຊາດ ຄັ້ງທຳອິດ ປະຈຳປີ 2019 ໄດ້ມີຂຶ້ນ ໃນຕອນບ່າຍຂອງວັນທີ 21 ພະຈິກ 2019 ທີ່ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ກະເສມ ອິນທະລາ ຮອງປະທານຄະນະກຳມະການໂອແລມປິກແຫ່ງຊາດລາວ, ທ່ານ ຈັນດີ ພົມມະບຸດ ປະທານສະຫະພັນແລ່ນ-ລານແຫ່ງຊາດລາວ, ມີທ່ານ ສິດທິໄຊ ສັກປະເສີດ ເລຂາທິການສະຫະພັນແລ່ນ-ລານແຫ່ງຊາດລາວ ແລະ ທ່ານ ບຸນທະແສງ ສິລິສັກ ຜູ້ຈັດການອາວຸໂສຜະລິດຕະພັນນ້ຳດື່ມກາຫົວເສືອ ບໍລິສັດ ເບຍລາວ ຈຳກັດ ພ້ອມດ້ວຍຄະນະບໍລິຫານງານ ສະຫະພັນ, ຜູ້ໃຫ້ການສະໜັບສະໜູນ, ຄູຝຶກ ແລະ ນັກກິລາ ຕະຫຼອດຮອດສື່ມວນຊົນທຸກຂະແໜງການເຂົ້າຮ່ວມ.

ທ່ານ ຈັນດີ ພົມມະບຸດ ກ່າວວ່າ: ການແຂ່ງຂັນຄັ້ງນີ້ຈັດຂຶ້ນ ເພື່ອເປັນການສົ່ງເສີມການອອກກຳລັງກາຍສຸຂະພາບ ແລະ ມິດຕະພາບ ລະຫວ່າງນັກກິລາແລ່ນດ້ວຍກັນ ນອກນັ້ນ ຍັງເປັນການສົ່ງເສີມການທ່ອງທ່ຽວລາວ ໃຫ້ມີຄວາມຄືກຄັື້ນ ຜ່ານກິດຈະກຳນີ້ ສ່ວນເສັ້ນທາງແລ່ນ ແມ່ນຈະຈັດຂຶ້ນພາຍໃນນະຄອນຫຼວງວຽງຈັນ ເຊິ່ງຈະມີຄວາມໜ້າສົນໃຈຫຼາຍ ແລະ ມີເອກກະລັກ ເພາະແລ່ນຜ່ານຈຸດທ່ອງທ່ຽວວັດທະນະທຳທີ່ເປັນສັນຍາລັກຂອງລາວເຮົາ ແລະ ເສັ້ນທາງແຄມຂອງທີ່ມີທິວທັດສວຍງາມ ສາມາດດຶງດູດນັກທ່ອງທ່ຽວໄດ້ໃນທົ່ວໂລກ ລາຍການນີ້ ຄາດຄະເນວ່າຈະມີນັກກິລາເຂົ້າຮ່ວມ 4,300 ຄົນ ເຊິ່ງຈະມີການຊິງໄຊກັນທັງໝົດ 4 ໄລຍະທາງ ປະກອບມີ 42 ກິໂລແມັດ ມີ 300 ຄົນ, 21 ກິໂລແມັດ ມີ 700 ຄົນ, 10 ກິໂລແມັດ ມີ 2,500 ຄົນ ແລະ 5 ກິໂລແມັດ ມີ 800 ຄົນ.

ຂ່າວ:  ສົງການ

ພາບ: ສີພອນ ຈັນທະດາລາ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ