ໃນ 6 ເດືອນ ຕົ້ນປີ, ແຂວງ ສະຫວັນນະເຂດ ມີອຸບັດເຫດບົນທ້ອງຖະໜົນ ເກີດຂຶ້ນທັງໝົດ 329 ກໍລະນີ ແລະ ມີຜູ້ເສຍຊີວິດແລ້ວ 57 ຄົນ, ຊຶ່ງອຸບັດເຫດໃນແຕ່ລະຄັ້ງ ເຮັດໃຫ້ມີພາຫະນະເປ່ເພທັງໝົດ 567 ຄັນ ແລະ ມີຄົນໄດ້ຮັບບາດເຈັບທັງໝົດ 497.
ອີງຕາມການລາຍງານສະພາບການເກີດອຸບັດເຫດ ຂອງພະແນກຕຳຫຼວດຈະລາຈອນ ປກສ ແຂວງ ສະຫວັນນະເຂດ: ປະຈຸບັນ ການເກີດອຸບັດເຫດຢູ່ຕາມສາຍທາງຕ່າງໆພາຍໃນແຂວງ, ສ່ວນໃຫຍ່ແມ່ນເກີດ ຍ້ອນນັກຂັບຂີ່ບໍ່ເຄົາລົບກົດລະບຽບຈະລາຈອນ ໂດຍສະເພາະ ລ່ວງໄຟແດງ, ຂັບຂີ່ໄວເກີນກຳນົດ, ບໍ່ໃຫ້ກຽດກັບຜູ້ໃຊ້ເສັ້ນທາງຮ່ວມກັນ ແຊງຊ້າຍ-ຂວາບໍ່ຮັບປະກັນ ແລະ ອື່ນໆ, ຮ້າຍແຮງໄປກ່ວານັ້ນ ຜູ້ຂັບຂີ່ຍັງດື່ມສິ່ງມຶນເມົາ, ຂັບຂີ່ລົດໄວ ອັນເປັນສາຍເຫດຂອງການເກີດອຸບັດເຫດຕາມທ້ອງຖະໜົນ.
ເພື່ອຫຼຸດຜ່ອນການເກີດອຸບັດເຫດ ທາງເຈົ້າໜ້າທີ່ຕຳຫຼວດຈະລາຈອນ ປກສ ແຂວງ ໄດ້ສຶບຕໍ່ໂຄສະນາເຜີຍແຜ່ລະບຽບການສັນຈອນ ໂດຍສະເພາະຮຽກຮ້ອງມາຍັງຜູ້ທີ່ໃຊ້ລົດໃຊ້ຖະໜົນຕ້ອງຮ່ວມໃຈກັນປະຕິບັດກົດລະບຽບການສັນຈອນທາງບົກໃຫ້ເຄັ່ງຄັດ, ມີສະຕິໃນການຂັບຂີ່ແຕ່ລະຄັ້ງ ແລະ ກວດກາສະພາບລົດໃຫ້ມີຄວາມພ້ອມ ແລ້ວຈຶ່ງອອກເດີນທາງ ບັນຫາການເກີດອຸບັດເຫດມັນຈຶ່ງຈະຫຼຸດລົງ.
ຂ່າວ: ວຽງຈັນທາຍ
ຮູບ: ໜ່ວຍກູ້ໄພ