Vientiane Times Lao
6 ເດືອນຕົ້ນປີ ປກສ ແຂວງເຊກອງ ສາມາດມ້າງຄະດີຢາເສບຕິດໄດ້ 46 ຄະດີ

6 ເດືອນຕົ້ນປີ ປກສ ແຂວງເຊກອງ ສາມາດມ້າງຄະດີຢາເສບຕິດໄດ້ 46 ຄະດີ

ພາຍຫຼັງ ພັກ-ລັດຖະບານໄດ້ກຳນົດເອົາການແກ້ໄຂຢາເສບຕິດເປັນໜຶ່ງໃນສອງວາລະແຫ່ງຊາດ ນັບແຕ່ປີ 2021ເປັນຕົ້ນມາ. ຄະນະພັກ-ຄະນະນຳກອງບັນຊາການ ປກສ ແຂວງ ກໍໄດ້ສຸມໃສ່ນຳພາ ຊີ້ນຳ ເຈົ້າໜ້າທີ່ໃນແຕ່ລະຂັ້ນ ໃຫ້ປະຕິບັດວາລະດັ່ງກ່າວດ້ວຍຄວາມຮັບຜິດຊອບສູງ ຈົນສາມາດມ້າງຄະດີຢາເສບຕິດໄດ້ຫຼາຍຄະດີ.

ໃນກອງປະຊຸມສະຫຼຸບວຽກງານ ປ້ອງກັນຊາດ ປ້ອງກັນຄວາມສະຫງົບ ຢູ່ແຂວງເຊກອງ ປະຈຳ 6 ເດືອນຕົ້ນປີ 2022 ເມື່ອວັນທີ 21 ມິຖຸນາທີ່ຜ່ານມານີ້,  ທ່ານ ພົວ ສົມໄຊ ພູລະຄຳມະນີ ຫົວໜ້າກອງບັນຊາການ ປກສ ແຂວງເຊກອງໄດ້ລາຍງານໃຫ້ຮູ້ວ່າ: ໃນໄລຍະ 6 ເດືອນຕົ້ນປີ 2022, ເຈົ້າໜ້າທີ່ ປກສ ແຂວງເຊກອງ ສາມາດເລີກຮື້ ແລະ ມ້າງທຳລາຍຄະດີຢາເສບຕິດໄດ້ 46 ເລື່ອງ, ຈັບຜູ້ຕ້ອງຫາໄດ້ 54 ຄົນ, ຢຶດຢາບ້າ 68.615 ເມັດ, ລົດໃຫຍ່ (ຍີ່ຫໍ້ ຮຸນໃດ)1 ຄັນ, ລົດຈັກ 24 ຄັນ, ໂທລະສັບ 35 ໜ່ວຍ, ໂມງ 1 ໜ່ວຍ , ປືນດັດແປງ 2 ກະບອກ, ປືນແກັບ 2 ກະບອກ, ເງິນກີບ 14 ລ້ານກວ່າກີບ, ເງິນໂດລາ 5 ໂດລາ, ເງິນດົ່ງ 3.000 ດົ່ງ ແລະ ວັດຖຸສາຍຄໍຄ້າຍຄືຄຳ 1 ເສັ້ນ. ພ້ອມນີ້ ຍັງໄດ້ເອົາໃຈໃສ່ເຄື່ອນໄຫວເກັບກຳ ຂໍ້ມູນ ແລະ ຂຶ້ນບັນຊີເປົ້າໝາຍ ຄ້າຂາຍຢາເສບຕິດມີ 212 ຄົນ, ຍິງ 8 ຄົນ. ຂຶ້ນບັນຊີເປົ້າໝາຍເສບຢາເສບ ຕິດ 992 ຄົນ, ຍິງ 19 ຄົນ; ສຶກສາ ອົບຮົມຜູ້ເສບ ແລະ ມົ້ວສຸມຢາເສບຕິດ 148 ຄົນ, ຍິງ 6 ຄົນ; ກວດນໍ້າປັດສະວະຊອກຫາສານເສບຕິດໄດ້ 463 ຄົນ ຍິງ 47 ຄົນ, ພົບສານເສບຕິດ 3 ຄົນ ແລະ ນຳສົ່ງຜູ້ຕິດຢາເສບຕິດໄປປິ່ນປົວບຳບັດ ຟື້ນຟູສຸຂະພາບຕາມສູນຕ່າງໆຈຳນວນ 6 ຄົນ ຍິງ 2 ຄົນ.

ທ່ານ ບົວສົມ ສີບຸນມະນີ ກ່າວຕື່ມອີກວ່າ: ປັດຈຸບັນ ບັນຫາຢາເສບຕິດຢູ່ແຂວງເຊກອງ ເຫັນວ່າຍັງສືບຕໍ່ເພີ່ມທະວີແຜ່ຂະຫຍາຍຫຼາຍຂຶ້ນ. ຊຶ່ງໄດ້ເບື່ອເມົາທຸກຊັ້ນຄົນໃນສັງຄົມ ແລະ ກໍ່ໃຫ້ເກີດມີປະກົດການຫຍໍ້ທໍ້ຕາງໆໃນສັງຄົມເຊັ່ນ: ບັນຫາຂີ້ລັກ, ງັດແງະ, ຄ້າຂາຍເຖື່ອນ, ຂົ່ມຂືນທຳສຳເລົາ ແລະ ອື່ນໆ. ແຕ່ແນວໃດກໍຕາມ, ຖ້າຫາກວ່າບັນດາຂະແໜງການຕ່າງໆຂັ້ນແຂວງ, ເມືອງ, ອົງການປົກຄອງບ້ານ ແລະ ສະຖາບັນຄອບຄົວ ເປັນເຈົ້າການພ້ອມກັນຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຮ່ວມມືກັບເຈົ້າໜ້າທີ່ ປກສ, ບັນຫາປະກົດການຫຍໍ້ທໍ້ຕ່າງໆເຫຼົ່ານີ້ ກໍຈະ ນັບມື້ຫຼຸດໜ້ອຍຖອຍລົງເປັນກ້າວໆ.

ຂໍ້ມູນ: ໂທລະພາບແຂວງເຊກອງ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ