Vientiane Times Lao
ສຸດມ່ວນ! ມວຍຄູ່ເອກພິກລັອກລາຍການ ເສິກນະຄອນຫຼວງ-ກໍກຽດແດນຈຳປາ ປະຈຳປີ 2019

ສຸດມ່ວນ! ມວຍຄູ່ເອກພິກລັອກລາຍການ ເສິກນະຄອນຫຼວງ-ກໍກຽດແດນຈຳປາ ປະຈຳປີ 2019

ສຸດມັນສຸດມ່ວນ ການແຂ່ງຂັນກິລາມວຍ ລາຍການ ເສິກນະຄອນຫຼວງ-ກໍກຽດແດນຈຳປາ ປະຈຳປີ 2019 ເມື່ອທ້າຍອາທິດ ທີ່ຜ່ານມາ ມວຍຄູ່ເອກ ຮຸ່ນນໍ້າໜັກ 64 ກິໂລກຣາມ ຂຸນພົນນ້ອຍ ສະໂມສອນ ຄຳເສັງ ຖືກສອກ ກ້ອງຊາຍແດນ ຈາກແຂວງເຊກອງ ເລືອດແຕກອາບໜ້າ ໃນຍົກທີ 3 ກ່ອນຈະໃຈຂຶ້ນເລັ່ງເຄື່ອງອອກອາວຸດໜັກໆ ດັກຈັງຫວະສອງສວນມັດອັນໜັກໜ່ວງຖືກປາຍຄາງ ກ້ອງຊາຍແດນ ຫລັບກາງອາກາດ ກຳມະການກາງເວທີ ນັບ 10 ບໍ່ລຸກ ພ້ອມຍົກມືໃຫ້ ຂຸນພົນນ້ອຍ ເປັນຝ່າຍເອົາຊະນະນ໋ອກ ທັນທີ່. 

ການແຂ່ງຂັນກິລາມວຍລາວ ລາຍການດັ່ງກ່າວ ໄດ້ຈັດຂຶ້ນ ເປັນປົກກະຕິ ທຸກໆອາທິດ ເພື່ອເປັນ ການສົ່ງເສີມນັກຊົກລຸ້ນ ໃໝ່ກ້າວສູ່ລາງວັນເງິນ ລ້ານ ພ້ອມທັງເປີດໂອກາດໃຫ້ນັກຊົກດັ່ງກ່າວ ທີ່ມີສີມືດີ ສາມາດຜ່ານການຄັດເລືອກກຽມສົ່ງ ເຂົ້າຮ່ວມລ່າຫຼຽນຄຳ ຊຽງຂວາງເກມ 2020.

ການແຂ່ງຂັນມວຍດັ່ງກ່າວໄດ້ຈັດຂຶ້ນໃນຄືນວັນ ເສົາ ທີ 21 ທັນວາ ທີ່ສະໂມສອນໃນຮົ່ມຂອງສະ ຫະພັນມວຍລາວ ນະຄອນຫຼວງວຽງຈັນ ພະແນກສຶກສາທິການ ແລະ ກິລາ ນະຄອນ ຫຼວງວຽງຈັນ. ລາຍການດັ່ງກ່າວ ມີການແຂ່ງຂັນ 7 ຄູ່ ເພີ່ມ 1 ຄູ່ ໂດຍສະເພາະມວຍຄູ່ເອກ ຮຸ່ນໃຫຍ່ຂຸນພົນນ້ອຍ ສະໂມສອນ ຄໍາເສັງ ແຊ໋ມມວຍລາວທັງພາຍໃນ ແລະ ຕ່າງປະເທດ ຮັບການມາຢາມຂອງ ນັກມວຍສີມືດີກ້ອງຊາຍ ແດນ ແຂວງເຊກອງ ໃນຮຸ່ນນໍ້າໜັກ 64 ກິໂລກ ຣາມ.

ການແຂ່ງຂັນມວຍຄູ່ເອກ ຄູ່ດັ່ງກ່າວ ຂຶ້ນຊົກກັນ ຢ່າງສົມນໍ້າສົມເນື້ອໄດ້ໃຈກອງເຊຍແຟນມວຍ ລາວ ແລະ ຕ່າງປະເທດທີ່ໄປຊົມ ແລະ ເຊຍກັນ ຢ່າງສະໜັ່ນຫວັ່ນໄຫວ ໂດຍສະເພາະ ກ້ອງຊາຍແດນ ແຂວງເຂກອງ ຕີຢ່າງສະຫຼາດ ບໍ່ປະມາດຄູ່ຊົກ ພ້ອມທັງອາໃສຈັງຫວະຕີວົງໃນ ຟັນສອກເຂົ້າໃສ່ ຂຸນພົນນ້ອຍຫຼາຍຄັ້ງ ສົ່ງຜົນ ໃຫ້ຫົວຂຸນພົນນ້ອຍ ແຕກເລືອດອາບໜ້າໃນ ຍົກທີ 3 ຕ້ອງໄດ້ໃຫ້ແພດກວດເຊັກອາການ ແລະ ເຊັດຄາບເລືອດອອກກ່ອນທີ່ຂຸນພົນນ້ອຍ ຈະເກີດອາລົມຮ້ອນ ກໍຄືເລືອດຂຶ້ນໜ້າຍ່າງໃສ່ ເປັນຝ່າຍດຽວເຂົ້າຕີ ທັງວົງໃນ ແລະ ວົງນອກ ອອກອາວຸດຢ່າງໜັກໜ່ວງໃສ່ຄູ່ແຂ່ງຢ່າງຕໍ່ເນື່ອງ ພ້ອມກັບດັກຈັງຫວະສອງຍິງມັດຂວາທີ່ໜັກ ແໜ້ນເຂົ້າປາຍຄາງຂອງ ກ້ອງຊາຍແດນ ພໍດີ ລົງໄປນອນກອງກັບພື້ນເວທີ ໃຫ້ກຳມະການນັບ 10 ບໍ່ລຸກ ກ່ອນຈະຍົກມື ຂຸນພົນນ້ອຍ ເປັນຝ່າຍ ເອົາຊະນະນ໋ອກ ໃນຍົກທີ 4 ໄດ້ໃຈກອງເຊຍ ຢ່າງສຸດມ່ວນ.

ສ່ວນຜົນຄູ່ອື່ນໆມີ ຄູ່ທີ 1 ນ້ອງບີ້ ສິດສະຫຼາມ ບຸກ ຊະນະຄະແນນ ຊ້າງເຜືອກ ສິດໂຕ້ພາລຸງ ໃນຮຸ່ນນໍ້າໜັກ 45 ກິໂລກຣາມ, ຄູ່ທີ 2 ຄອມ ມົງໂດນ ເພັດນະຄອນ ເສຍຄະແນນໃຫ້ ເພັດສາຍຟ້າ ແຂວງເຊກອງ ຮຸ່ນນໍ້າໜັກ 47 ກິໂລກຣາມ, ຄູ່ທີ 3 ມວຍຮອງຄູ່ເອກ ຂຸນເຫຼັກ ສະໂມສອນຄຳເສັງ ຊະນະນ໊ອກ ເພັດສີໝອກ ຍົກ 1 ຮຸ່ນນໍ້າໜັກ 59 ກິໂລກຣາມ, ຄູ່ທີ 5 ລີໂອ ເພັດນະຄອນ ຊະນະນ໊ອກ ອານັນທະໄຊ ສໍຈະເລີນສິງ ຍົກ 1 ຮຸ່ນນໍ້າໜັກ 56 ກິໂລກຣາມ, ຄູ່ທີ 6 ນ້ອງປິ່ນຄໍາ ສິດຈານຕູ່ ຊະນະຄະແນນ ນ້ອງໂຄເຫຼັກ ແຂວງເຊກອງ ຮຸ່ນນໍ້າໜັກ 46 ກິໂລກຣາມຍິງ ແລະ ຄູ່ທີ 7 ເພັດສາຍຝົນ ສໍຈະເລີນສິງ ເສຍຄະແນນໃຫ້ ເພັດຈຳປາ ແຂວງເຊກອງ ຮຸ່ນນໍ້າໜັກ 51 ກິໂລກຣາມ. 

 

ຂ່າວ: ສົງການ

ພາບ: ຫຼ້າ

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ