Vientiane Times Lao
ອີກ 8ມື້ຄົນເຈັບຄົນລາວທີ່ທ່ານໝໍໄທລະດົມທຶນຊ່ວຍຊີວິດ ຈະໄດ້ກັບບ້ານແລ້ວ

ອີກ 8ມື້ຄົນເຈັບຄົນລາວທີ່ທ່ານໝໍໄທລະດົມທຶນຊ່ວຍຊີວິດ ຈະໄດ້ກັບບ້ານແລ້ວ

ທ່ານໝໍຢູ່ໂຮງໝໍ ມຸກດາຫານ, ປະເທດໄທ ໄດ້ອອກເງິນມາຮັກສາຄົນເຈັບຄົນລາວທີ່ເປັນພະຍາດ ເມລີອອຍ (Melioidosis ຫຼື ພະຍາດປອດບວມ) ທີ່ໄດ້ໄປປິ່ນປົວຢູ່ໂຮງໝໍ ມຸກດາຫານ ແຕ່ວັນທີ 2 ພະຈິກ 2019 ຫຼັງຈາກທີ່ຮັກສາຢູ່ໂຮງໝໍແຂວງສະຫວັນນະເຂດບໍ່ເຊົາ, ຄົນເຈັບດັ່ງກກ່າວ ຊື່ ທ້າວ ສຸກກີ ພະສະຫວັດ ອາຍຸ 44 ປີ ປະຊາຊົນບ້ານ ໜອງແສງ ນະຄອນໄກສອນ ພົມວິຫານ ແຂວງສະຫວັນນະເຂດ ຫຼັງຈາກທີ່ມາຮັກສາຢູ່ໂຮງໝໍດັ່ງກ່າວແຕ່ເງິນໝົດ ແລະ ຂໍກັບໄປຕາຍທີ່ບ້ານເກີດ ຢູ່ ແຂວງສະຫວັນນະເຂດ ປະເທດລາວ ເພາະຍັງເງິນພຽງແຕ່ 200 ບາດ ຈ່າຍຄ່າລົດກັບບ້ານຍັງບໍ່ພໍ, ທ່ານໝໍຢູ່ໂຮງໝໍມຸກດາຫານ ຈຶ່ງໄດ້ລະດົມທຶນຈາກໝູ່ທ່ານໝໍນໍາກັນ ມາຊ່ວຍຮັກສາ ແລະ ສາມາດຊ່ວຍຊີວິດໄວ້ໄດ້.
ທ່ານໝໍ ລາຊັນ ຈັນອ່ອນ (ราชันย็ จันทร็อ่อน) ທ່ານໝໍ ໂຮງໝໍ ມຸກດາຫານ ໜຶ່ງໃນສີ່ທ່ານໝໍ ທີ່ໄດ້ປິ່ນປົວຄົນເຈັບຄົນລາວໄດ້ໃຫ້ຂໍ້ມູນກັບທີມຂ່າວວຽງຈັນທາຍມື້ເຊົ້ານີ້ 15 ພະຈິກ 2019 ວ່າ : ອາກາດຄົນເຈັບ ແມ່ນມີຄວາມປອດໄພແລ້ວ 90% ແລະ ສາມາດເວົ້າໄດ້ວ່າບໍ່ເສຍຊີວິດແລ້ວ ບໍ່ມີໄຂ້, ກວດເລືອດບໍ່ພົບພະຍາດ ເມລີອອຍ ແຕ່ຍັງໃຫ້ຍານອນຫຼັບຄົນເຈັບ ເພາະຖ້າໃຫ້ຕື່ນເຂົາຈະຕໍ່ຕ້ານເຄື່ອງຊ່ວຍຊີວິດ ເມື່ອຟື້ນຂຶ້ນມາຈະເປັນຄົນປົກກະຕິ ບໍ່ພິການ ແລະ ບໍ່ເປັນອຳມະພາດ ແຕ່ຕ້ອງໃຫ້ຢາຂ້າເຊື້ອອີກ 8 ມື້.
ທ່ານໝໍ ລາຊັນ ໄດ້ກ່າວຕື່ມວ່າ : ອີກປະມານ 8-9 ມື້ ຄົນເຈັບກໍ່ສາມາດອອກໂຮງໝໍ ແລະ ສາມາດກັບບ້ານໄດ້ແລ້ວ ແຕ່ຕ້ອງເອົາຢາໄປກິນຕື່ມອີກປະມານ 5 ເດືອນຈຶ່ງຈະສາມາດຫາຍຂາດໄດ້, ລວມຄ່າຮັກສາ ແລະ ຄ່າຢາ ທັງໝົດກໍ່ເກືອບ 200, 000 ບາດ ທາງໝໍໄທໄດ້ຈ່າຍໃຫ້ໝົດ.
ນາງ ນ້ອຍ ພະສະຫວັດ ເມຍຄົນເຈັບໄດ້ເວົ້າວ່າ : ຂໍຂອບໃຈທາງທ່ານໝໍລາຊັນ ແລະ ທີມງານເພິ່ນທຸກຄົນຢູ່ໂຮງໝໍມຸກດາຫານທີ່ໄດ້ອອກເງິນຊ່ວຍເຫຼືອປິ່ນປົວຜົວຂອງລາວຈົນລອດຊີວິດ.
ສາເຫດທີ່ຢາກເອົາຜົວກັບໄປຕາຍທີ່ບ້ານເກີດຍ້ອນບໍ່ມີເງິນຮັກສາແລ້ວ ຄອບຄົວມີຖານະທຸກຍາກ ຫາເຊົ້າກິນຄໍ່າ ມີລູກນຳກັນ 3 ຄົນ ສ່ວນເງິນທີ່ມາຮັກສາກໍ່ໄດ້ຢືມພີ່ນ້ອງມາ ແລະ ໄດ້ຈ່າຍໄປແລ້ວ 38,000 ບາດ ຍັງເຫຼືອເງິນແຕ່ 200 ບາດຕິດຕົວ.
ຂ່າວ : ສົມພາວັນ
ພາບ : ລາຊັນ

Related Articles

Leave a Reply