ຈາກກໍລະນີທີ່ດິນໄດ້ຍຸບທັບປະຊາຊົນເມືອງພູກູດ ແຂວງຊຽງຂວາງ 7 ຄົນ (ຍິງ 1 ຄົນ) ເມື່ອວັນທີ 18 ກໍລະກົດ 2021 ທີ່ຜ່ານມາ ຍ້ອນໄປລັກລອບຂຸດຄົ້ນແຮ່ຄຳ ຢູ່ພູສູນ ບ້ານໄລທອງ ເມືອງພູກູດນັ້ນ ຮອດປັດຈຸບັນນິ້ຍັງບໍ່ຮູ້ຊາຕາກຳ ຍ້ອນວ່າບໍ່ສາມາດຂຸດຄົ້ນຫາໄດ້ເພາະສະຖານທີ່ບໍ່ເອື້ອອຳນວຍ.
ທ່ານສຸລິຊາ ຈັນທະປັນຍາ ກຳມະການພັກເມືອງພູກູດ ແຂວງຊຽງຂວາງໄດ້ລາຍງານກ່ຽວກັບເຫດການດັ່ງກ່າວເມື່ອມໍ່ໆມານີ້ວ່າ: ເຫດການດິນຍຸບດັ່ງກ່າວເກີດຂຶ້ນເວລາປະມານ 14 ໂມງຂອງວັນທີ 18 ກໍລະກົດ 2021 ທີ່ຜ່ານມາໂດຍມີປະຊາຊົນ 7 ຄົນຖືກດິນຍຸບທັບ ຊຶ່ງ 5 ຄົນແມ່ນປະຊາຊົນບ້ານໂຈຍ, ບ້ານບົງ 1 ຄົນ ແລະ ບ້ານເມືອງສິງ 1 ຄົນ, ພາຍຫຼັງທີ່ເກີດເຫດດັ່ງກ່າວ, ຄອບຄົວຜູ້ສູນຫາຍໄດ້ສະເໝີໃຫ້ອຳນາດການປົກຄອງເມືອງພູກູດຊ່ວຍຂຸດຄົ້ນຫາຜູ້ສູນຫາຍດັ່ງກ່າວ ແລະ ອຳນາດການປົກຄອງເມືອງພູກູດ ແລະ ພະແນກການທີ່ກ່ຽວຂ້ອງໄດ້ຈັດກອງປະຊຸມປຶກສາຫາລືຫຼາຍຄັ້ງແບບກົງໄກກົງມາ ພ້ອມທັງທິດຊີ້ນຳຂອງອຳນາດການປົກຄອງແຂວງ ແລະ ໄດ້ມີການລົງປະເມີນຢູ່ສະຖານທີ່ທີ່ເກີດດິນຍູບ ຊຶ່ງຄາດວ່າຈະບໍ່ສາມາດຂຸດຄົ້ນຫາຜູ້ສູນຫາຍໄດ້ ຍ້ອນວ່າສະພາບຂອງພື້ນທີ່ດັ່ງກ່າວເປັນພື້ນທີ່ສູງ (ເທິງຈອມພູ) ພາຫະນະຂຸດເຈາະບໍ່ສາມາດຂຶ້ນໄປໄດ້ ແລະ ດິນຍູບເປັນບໍລິເວນກວ້າງມີຄວາມສ່ຽງສູງທີ່ຈະເກີດອຸບັດເຫດ ແລະ ຍັງຈະສົ່ງຜົນກະທົບຕໍ່ທຳມະຊາດ ແລະ ສິ່ງແວດລ້ອມ ເປັນຕົ້ນໃກ້ບ່ອນທຳການຜະລິດຂອງປະຊາຊົນ.
ທ່ານສຸລິຊາ ໃຫ້ຮູ້ຕື່ມວ່າ: ແຮ່ຄຳແມ່ນຊັບສົມບັດລວມຂອງຊາດທີ່ກົດໝາຍໄດ້ຮອງຮັບ ໃນໄລຍະທີ່ຜ່ານມາອຳນາດການປົກຄອງແຂວງຊຽງຂວາງ ໄດ້ເອົາໃຈໃສ່ປົກປັກຮັກສາ ແຕ່ຍັງມີປະຊາຊົນຈຳນວນໜຶ່ງຍັງມີການລັກລອບຂຸດຄົ້ນຊຶ່ງກາຍເປັນປະກົດການຫຍໍ້ທໍ້ໜຶ່ງຢູ່ແຂວງຊຽງຂວາງໂດຍສະເພາະຢູ່ເມືອງພູກູດ ມີການແກ່ຍາວມາດົນສົມຄວນເຖິງແມ່ນວ່າຈະມີກົດໝາຍບັງຄັບ ແລະ ໄດ້ສຶກສາອົບຮົມແນວຄິດຂອງປະຊາຊົນກ່ຽວກັບການຂຸດຄົ້ນແຮ່ຄຳກໍ່ຕາມແຕ່ກໍ່ຍັງມີປະກົດການລັກລອບ. ຮຽກຮ້ອງໃຫ້ປະຊາຊົນຢຸດເຊົາລັກລອບຂູດຄົ້ນດັ່ງກ່າວ ເພື່ອບໍ່ໃຫ້ເກີດເຫດການແບບນີ້ອີກ ທັງເປັນການກະທຳຜິດຕໍ່ກົດໝາຍບ້ານເມືອງ.
ຂໍ້ມູນ: ໂທລະພາບແຂວງຊຽງຂວາງ
