Vientiane Times Lao
75 ຄົນເສຍຊີວິດຍ້ອນອຸບັດເຫດ ໃນທົ່ວປະເທດ

75 ຄົນເສຍຊີວິດຍ້ອນອຸບັດເຫດ ໃນທົ່ວປະເທດ

ໃນເດືອນກໍລະກົດຜ່ານມາ, ໄດ້ເກີດອຸບັດເຫດບົນທ້ອງຖະໜົນທັງໝົດ 518 ກໍລະ­ນີ, ມີຜູ້ເສຍຊີວິດ 75 ຄົນ ໃນທົ່ວປະເທດ, ທຽບ­ໃສ່​ເດືອນ​ມິຖຸນາ ເພີ່ມຂຶ້ນ 65 ກໍລະນີ ແລະ ຜູ້​ເສຍ​ຊີ­ວິດຫຼຸດລົງ 30 ຄົນ.

ພະແນກ​ຕຳ­ຫຼວດ​ຈະ­ລາ­ຈອນ ກົມ​ໃຫຍ່​ຕຳ­ຫຼວດ ກະ­ຊວງ​ປ້ອງ​ກັນ​ຄວາມ​ສະ­ຫງົບ ໄດ້ລາຍງານໃຫ້ຮູ້ວາ່: ສໍາລັບ ການເກີດອຸປະຕິເຫດໃນເດືອນກໍລະກົດຜ່ານມາ, ມີ​ຜູ້​ໄດ້​ຮັບ​ບາດ­ເຈັບ​ທັງ​ໝົດ 708 ຄົນ ແລະ ພາ­ຫະ­ນະ​ເປ່​ເພ​ທັງ​ໝົດ 941 ຄັນ, ຊຶ່ງການ​ເກີດ​ອຸ­ບັດ­ເຫດ​ຢູ່​ຕາມ​ສາຍ​ທາງ​ຕ່າງໆ​ໃນ​ທົ່ວ​ປະ­ເທດ ສ່ວນ​ໃຫຍ່​ແມ່ນ​ເກີດ ​ຍ້ອນ​ນັກ​ຂັບຂີ່​ແຊງ​ຊ້າຍ-ຂວາ​ບໍ່​ຮັບ­ປະ­ກັນ, ລ່ວງປ້າຍຫ້າມ, ຂັບຂີ່​ບໍ່​ເຄົາ­ລົບ​ກົດ​ລະ­ບຽບ​ຈະ­ລາ­ຈອນ ໂດຍສະເພາະ ເມົາ​ແລ້ວ​ຂັບ, ຂັບ​ຂີ່​ໄວ​ເກີນ​ກຳ­ນົດ, ບໍ່​ໃຫ້​ກຽດ​​ກັບ​ຜູ້​ໃຊ້​ເສັ້ນ­ທາງ​ຮ່ວມ​ກັນ, ແຊງ​ຊ້າຍ-ຂວາ​ບໍ່​ຮັບ­ປະ­ກັນ ແລະ ອື່ນໆ.

ເຈົ້າໜ້າທີ່ພະແນກ​ຕຳ­ຫຼວດ​ຈະ­ລາ­ຈອນ ຍັງໄດ້ຮຽກ​ຮ້ອງ​ມາ​ຍັງ​ ​ອົງ​ການ​ຈັດ​ຕັ້ງ​​ທັງ​ພາກ​ລັດ ແລະ ເອ​ກະ​ຊົນນຳ​ເອົາ​ກົດຈະ​ລາ​ຈອນ ແລະ ການ​ຂັບ​ຂີ່​ປອດ​ໄພ​​ໄປ​ເຜີຍ​ແຜ່​ໃຫ້​ທຸກ​ຄົນ​ໃນ​ສຳ​ນັກ​ງານ​ອົງ​ການ​ຂອງ​ຕົນ​ໃຫ້​ຮັບ​ຮູ້​, ​ເຂົ້າ​ໃຈ​ , ພ້ອມ​ກັນ​ຈັດ​ຕັ້ງ​ປະ​ຕິ​ບັດ​ໃຫ້​ຖືກ​ຕ້ອງ ແລະ ຢ່າງເຂັ້ມ​ງວດ.

ຮຽກ​ຮ້ອງ​ມາ​ຍັງ​ພໍ່​ແມ່​ປະ​ຊາ​ຊົນ​ທຸກ​ພາກ​ສ່ວນ​ຈົ່ງ​ມີ​ສະ​ຕິ​ຕື່ນ​ຕົວ​ເປັນ​ເຈົ້າ​ການ​ໃນ​ການ​ປະ​ຕິ​ບັດ​ລະ​ບຽບ​ກົດ​ໝາຍ​ໂດຍ​ສະ​ເພາະ​ແມ່ນ​ການ​ປະ​ຕິ​ບັດ​ກົດ​ຈະ​ລາ​ຈອນ, ​ການ​ຂັບ​ຂີ່​ປອດ​ໄພຢ່າງຖືກ​ຕ້ອງ ​ແລະ​ ເຄັ່ງຄັດ.

ພ້ອມທັງຮຽກ​ຮ້ອງໃຫ້​ເຈົ້າ​ຫນ້າ​ທີ່​ຕຳຫຼວດ​ຈະ​ລາ​ຈອນຕ້ອງ​ເຮັດ​ໜ້າທີ່​ຢ່າງ​ຂະ​ຫຍັນ​ຂັນ​ແຂງ​ເດັດ​ຂາດ​ຕໍ່​ຜູ້​ທີ່​ຝ່າຝືນ​ລະ​ເມີດ​ລະ​ບຽບ​ກົດ​ໝາຍຢ່າງຍຸຕິ​ທຳ​ສັດ​ຊື່​ບໍ​ລິ​ສຸດ​ໂປ່ງ​ໃສ​ຂາວ​ສະ​ອາດ.

ຂ່າວ: ວຽງຈັນທາຍ

 

Related Articles

Leave a Reply

error: ສົນໃຈຂໍ້ມູນ ກະລຸນາຕິດຕໍ່ກອງບັນນາທິການ