ອົງການອາຫານ ແລະ ການກະເສດແຫ່ງສະຫະປະຊາຊາດ (FAO) ໄດ້ສືບຕໍ່ສະໜັບສະໜູນລັດຖະບານລາວເພື່ອເສີມສ້າງຄວາມເຂັ້ມແຂງໃນຂະແໜງສຸຂະພາບສັດເພື່ອໂຕ້ຕອບ ແລະ ຄວບຄຸມພະຍາດອະຫິວາໝູອາຟຣິກາທີ່ພົບໃນປະຊາກອນໝູຢູ່ປະເທດລາວ ໂດຍມີການເປີດໂຄງການຊ່ວຍເຫຼືອດັ່ງກ່າວໃນວັນທີ 3 ກຸມພາ 2022 ນີ້ທີ່ນະຄອນຫຼວງວຽງຈັນ.
ຈຸດປະສົງຂອງໂຄງການແມ່ນເພື່ອຫຼຸດຜ່ອນຄວາມສ່ຽງທີ່ອາດເປັນໄປໄດ້ໃນການນໍາເອົາ ແລະ ການແຜ່ລະບາດ ພ້ອມທັງຜົນກະທົບຈາກພະຍາດດັ່ງກ່າວ ແລະ ບັນດາພະຍາດສັດຂ້າມແດນທີ່ກໍ່ໃຫ້ເກີດຜົນກະທົບຮ້າຍແຮງອື່ນໆໃນປະເທດລາວ ຊຶ່ງໂຄງການຈະສຸມໃສ່ ພັດທະນາ ແລະ ຈັດຕັ້ງປະຕິບັດບັນດາຍຸດທະສາດ ແລະ ເສີມສ້າງບັນດາຄວາມສາມາດເພື່ອປ້ອງກັນ, ຄົ້ນຫາ, ແລະ ຄວບຄຸມພະຍາດດັ່ງກ່າວໃນລະດັບປະເທດ, ຂັ້ນແຂວງ ແລະ ຂັ້ນເມືອງ ແລະ ເສີມສ້າງຄວາມສາມາດຂອງຫ້ອງວິໄຈແຫ່ງຊາດເພື່ອຄົ້ນຫາພະຍາດດັ່ງກ່າວ.
ທ່ານ ນາຊາຣ໌ ຮາຢັດ ຕາງໜ້າອົງການ FAO ປະຈຳ ສປປ ລາວ ໄດ້ສະແດງຄວາມເປັນຫ່ວງກ່ຽວກັບ ພະຍາດອະຫິວາໝູອາຟຣິກາໃນປະຊາກອນໝູຂອງລາວຍ້ອນວ່າຍັງບໍ່ມີຢາວັກຊິນກັນພະຍາດອະຫິວາໝູອາຟຣິກາ ແລະ ບໍ່ທັນມີຢາປົວເມື່ອສັດຕິດເຊື້ອ, ການປ້ອງກັນໂດຍການນໍາໃຊ້ມາດຕະການຄວາມປອດໄພທາງຊີວະພາບນັ້ນແມ່ນສໍາຄັນຫຼາຍ.
ກົມລ້ຽງສັດ ແລະ ການປະມົງ ໄດ້ລາຍງານຄັ້ງທໍາອິດກ່ຽວກັບການລະບາດຂອງ ພະຍາດອະຫິວາໝູອາຟຣິກາໃນທຸກແຂວງໃນປີ 2019, ເຊິ່ງເຮັດໃຫ້ມີໝູຕາຍທັງໝົດເຖິງ 20.000 ໂຕ ແລະ ມີໝູ 6.000 ໂຕໄດ້ຖືກຂ້າເພື່ອຈຳກັດການແຜ່ເຊື້ອໃນການຕອບໂຕ້ກັບການລະບາດ. ໃນລະຫວ່າງການລະບາດຂອງ ພະຍາດດັ່ງກ່າວ, ອົງການ FAO ໄດ້ສະໜັບສະໜູນ ກົມລ້ຽງສັດ ແລະ ການປະມົງ ໃນການເພີ່ມຂີດຄວາມສາມາດຂອງຫ້ອງວິໄຈພະຍາດເພື່ອກວດຫາ ພະຍາດອະຫິວາໝູອາຟຣິກາ ແລະ ໃຫ້ການສະໜັບສະໜູນດ້ານວິຊາການ ແລະ ອຸປະກອນການສື່ສານຄວາມສ່ຽງຕ່າງໆ. ໃນປີ 2021, ກົມລ້ຽງສັດ ແລະ ການປະມົງ, ໂດຍໄດ້ຮັບການສະໜັບສະໜູນຈາກອົງການ FAO, ໄດ້ດຳເນີນການຝຶກອົບຮົມຄູຝຶກຂັ້ນແຂວງໃນການກວດຫາພະຍາດອະຫິວາໝູອາຟຣິກາ ແລະ ການໂຕ້ຕອບສຸກເສີນໃນ 17 ແຂວງ.
ຂ່າວ: ວຽງຈັນທາຍ
