ເມື່ອວັນທີ 4 ພຶດສະພາ 2026 ຜ່ານມາ, ພະແນກກະສິກຳ ແລະ ສິ່ງແວດລ້ອມແຂວງຈໍາປາສັກ ໄດ້ລາຍງານການເກັບກໍາຂໍ້ມູນສະພາບປາຕາຍ ຢູ່ສາຍນໍາເຊໂດນ ເຂດບ້ານນາດ່ານ, ບ້ານນາຂາມ ແລະ ບ້ານຄີລີ ເມືອງຊະນະສົມບູນ ແຂວງຈໍາປາສັກ ວ່າ:
ພາຍຫຼັງໄດ້ຮັບແຈ້ງຈາກອົງການປົກຄອງຂັ້ນທ້ອງຖິ່ນ ວ່າ: ມີປາຕາຍຢູ່ສາຍນາເຊໂດນ ເຂດບ້ານນາດ່ານ, ບ້ານນາຂາມ ແລະ ບ້ານຄີລີ ໃນວັນທີ 2 ພຶດສະພາ 2026 ຜ່ານມາ, ຂະແໜງລ້ຽງສັດ ແລະ ການປະມົງ ພະແນກກະສິກໍາ ແລະ ສິ່ງແວດລ້ອມແຂວງແຂວງຈໍາປາສັກ ໄດ້ສົມທົບກັບຂະແໜງການທີ່ກ່ຽວຂ້ອງຂັ້ນພະແນກ ແລະ ຫ້ອງການກະສິກຳ- ສິ່ງແວດລ້ອມເມືອງຊະນະສົມບູນ ຮ່ວມກັບ ອົງການປົກຄອງບ້ານ ດັ່ງກ່າວ ເຂົ້າຮ່ວມ ໄດ້ລົງຕິດຕາມກວດກາສະພາບການຕາຍຂອງປາຕົວຈິງ ເຫັນວ່າປາຕາຍໃນໄລຍະ 2-3 ວັນຜ່ານມາ, ເຮັດໃຫ້ມີກິ່ນເໝັນ ແລະ ນ້ໍາຂຸ້ນ.
ອີງຕາມຄໍາໃຫ້ການຂອງອົງການປົກຄອງບ້ານ ທີ່ໄດ້ລົງຮ່ວມກັນ ໃຫ້ຂໍ້ມູນວ່າ: ປາເລີ່ມຕາຍ ແຕ່ວັນທີ 28 ເມສາ 2026 ຫາ ວັນທີ 2 ພຶດສະພາ 2026 ໂດຍບໍ່ຮູ້ສາເຫດການຕາຍຂອງປາທີ່ຕາຍຟູຢູ່ຕາມແຄມນໍ້າ ໃນເຂດບໍລິເວນ 3 ບ້ານດັ່ງກ່າວ, ໃນບໍລິເວນ 3 ບ້ານ ແລະ ບ້ານໃກ້ຄຽງ ແມ່ນບໍ່ມີໂຮງງານ ອຸດສາຫະກຳ ແລະ ກິດຈະການຕ່າງໆ, ສ່ວນຫຼາຍປະຊາຊົນໃນເຂດດັ່ງກ່າວ ແມ່ນເຮັດກະສິກໍາ ເຊັ່ນ: ປູກເຂົ້າ ແລະ ສວນຄົວຂະໜາດນ້ອຍ.
ໃນການລົງຕິດຕາມກວດກາ ແລະ ເກັບກໍາຂໍ້ມູນຢູ່ພາກສະໜາມຕົວຈິງຄັ້ງນີ້ ທາງວິຊາການໄດ້ນໍາໃຊ້ເຄື່ອງວັດແທກຄຸນນະພາບນໍ້າຂັ້ນພື້ນຖານ ເປັນຕົ້ນແມ່ນຄວາມເປັນກົດ-ດ່າງ, ຄ່າຊັກນໍາໄຟຟ້າຂອງນໍ້າ, ວັດແທກປະລິມານອອກຊີເຈນທີ່ຈໍາເປັນ, ອຸ່ນຫະພູມຂອງນໍ້າ ແລະ ຕະກອນແຂວນລອຍທັງໝົດທີ່ລະລາຍໃນນໍ້າ.
ຜ່ານຈາກການສັງເກດຄ່າວັດແທກນ້ໍາທັງ 3 ຈຸດ ເຫັນວ່າ ຄ່າຄວາມເປັນກົດ-ດ່າງ ທັງ 3 ຈຸດ ແມ່ນຂຶ້ນສູງກວ່າເກນມາດຕະຖານ ສະແດງໃຫ້ເຫັນວ່າ ມີຄວາມເປັນດ່າງສູງຫຼາຍ ເຊິ່ງຄ່າຄວາມເປັນນ້ໍາປົກກະຕິແມ່ນຢູ່ປະມານ 5-9, ສາເຫດທີ່ຄ່າຄວາມເປັນດ່າງສູງ ອາດເກີດຈາກຫຼາຍປັດໄຈ ເຊັ່ນ: ມີສານລະລາຍດ່າງເຂັ້ມຂຸ້ນເຈື່ອປົນ, ນໍ້າ ຫຼື ສານລະລາຍນັ້ນ ມີສ່ວນປະສົມສານເຄມີທີ່ມີຄວາມເປັນດ່າງສູງ ເຊັ່ນ: ໂຊດຽມໄດຣອກໄຊ (ໂຊດາໄຟ), ແຄຊຽມໄດຣອກໄຊ (ປູນຂາວ) ຫຼື ໂຊດຽມຄາບໍເນດ; ຈາກຂະບວນການທາງເຄມີ/ ອຸດສາຫະກໍາຈາກນ້ໍາເປື້ອນທີ່ບໍ່ໄດ້ຜ່ານການບໍາບັດ ຈາກໂຮງງານ ຫຼືການຟອກຍ້ອມ, ອຸນຫະພູມນໍ້າ ຈຸດບ້ານນາຂາມ ແລະ ຈຸດບ້ານຄີລີ ແມ່ນຂ້ອນຂ້າງສູງ ແຕ່ກໍບໍ່ສາມາດເຮັດໃຫ້ປາຕາຍໄດ້ ເພາະວ່ານໍ້າເລິກເປັນບໍລິເວນກວ້າງ, ຄ່າວັດແທກປະລິມານອອກຊີເຈນທີ່ຈໍາເປັນ ຕ້ອງໃຊ້ໃນການລະລາຍສານອິນຊີ ດ້ວຍວິທີການທາງເຄມີ ເຫັນວ່າ ຈຸດບ້ານນາດ່ານ ແລະ ຈຸດບ້ານຄີລີ ແມ່ນມີຄ່າຕໍ່າກວ່າ ແລະ ຢູ່ໃນເງື່ອນໄຂປົກກະຕິ, ແຕ່ຈຸດບ້ານນາຂາມ ເຫັນວ່າສູງກວ່າ 120 mg/1 ຫຼື ສູງປະມານ 32.6 mg/1 ແຕ່ກໍບໍ່ສູງເກີນໄປ ຍັງເປັນຄ່າທີ່ຮອງຮັບໄດ້.
ພະແນກກະສິກຳ ແລະ ສິ່ງແວດລ້ອມແຂວງຈໍາປາສັກ ລາຍງານຕື່ມວ່າ: ຜ່ານການກວດກາຕົວຈິງ ເຫັນວ່າ ສະພາບການດັ່ງກ່າວ ມີຄວາມສ່ຽງຕໍ່ສຸຂະພາບຂອງຄົນ ແລະ ສັດ, ດັ່ງນັ້ນ, ຄະນະກຳມະການປົກຄອງເມືອງຊະນະສົມບູນ ໄດ້ອອກແຈ້ງການລົງໃນວັນທີ 4 ພຶດສະພາ 2026 ໂດຍແນະນໍາໃຫ້ຄະນະພັກຮາກຖານຕາແສງ, ນາຍບ້ານ ແຈ້ງຕໍ່ພໍ່ແມ່ປະຊາຊົນໃນຂອບເຂດບໍລິເວນດັ່ງກ່າວຢຸດການນໍາໃຊ້ນໍ້າ ແລະ ບໍ່ໃຫ້ເອົາປາ ແລະ ສັດນໍ້າ ມາບໍລິໂພກ ຈົນກວ່າເຫດການດັ່ງກ່າວ ຄືນສູ່ສະພາບປົກກະຕິ.
ປະຈຸບັນ, ພະແນກກະສິກໍາ ແລະ ສິ່ງແວດລ້ອມແຂວງ ຍັງສືບຕໍ່ປະສານສົມທົບກັບ ກົມລ້ຽງສັດ ແລະ ການປະມົງ ແລະ ຂະແໜງການຕ່າງໆທີ່ກ່ຽວຂ້ອງ ຂັ້ນແຂວງ, ຂັ້ນເມືອງ ເພື່ອລົງຕິດຕາມກວດກາ-ເກັບຕົວຢ່າງນໍ້າ, ປາ ແລະ ສັດນໍ້າ ສົ່ງເຂົ້າໄປວິໄຈ ຢູ່ສູນວິໄຈຂອງສູນກາງ ເພື່ອຢັ້ງຢືນສາເຫດການຕາຍຂອງປາ ໃຫ້ລະອຽດຈະແຈ້ງ ເພື່ອແກ້ໄຂໃຫ້ເຫດການດັ່ງກ່າວຄືນສູສະພາບປົກກະຕິ.
ຂ່າວ: ແຂວງຈໍາປາສັກ