ບໍລິສັດ ສະຕາ ຟິນເທັກ ຈຳກັດຜູ້ດຽວ (Umoney) ແລະ ລັດວິສາຫະກິດ ການບິນລາວ (Lao Airlines) ຮ່ວມມືກັນ ເປີດນໍາໃຊ້ລະບົບປະຕູຊໍາລະເງິນ ທີ່ທັນສະໄໝ (Payment Gateway) ຢ່າງເປັນທາງການ ເພື່ອອຳນວຍຄວາມສະດວກ ໃຫ້ແກ່ລູກຄ້າ ໃນການຈອງ ແລະ ຊຳລະຄ່າປີ້ເຮືອບິນ.
ທຸກໆທ່ານ ທີ່ນໍາໃຊ້ ຢູມັນນີ ຫຼື ບັນຊີຂອງທະນາຄານອື່ນໆ ກໍ່ສາມາດຊື້ປີ້ເຮືອບິນ ຂອງສາຍການບິນລາວ ໄດ້ ໂດຍຜ່ານແອັບພລິເຄຊັນ ແລະ ເວັບໄຊ ຂອງສາຍການບິນລາວໄດ້ຢ່າງສະດວກ, ວ່ອງໄວ ແລະ ປອດໄພ.
ທັງສອງຝ່າຍໄດ້ເຊັນສັນຍາຮ່ວມມື ໃນວັນທີ 13 ມັງກອນ 2026 ທີ່ ສໍານັກງານໃຫຍ່ ຢູນີເທວ. ຕາງໜ້າລົງນາມການຮ່ວມມືໃນຄັ້ງນີ້ແມ່ນ ທ່ານ ຮາ ຈຽນ ຖັງ ຜູ້ອໍານວຍການ ບໍລິສັດ ສະຕາ ຟິນເທັກ ຈໍາກັດຜູ້ດຽວ ແລະ ທ່ານ ສິດທິເດດ ດວງສິດທິ ຮອງຜູ້ອໍານວຍການ ລັດວິສາຫະກິດ ການບິນລາວ.
ການເຊັນສັນຍາດັ່ງກ່າວ ບໍ່ພຽງແຕ່ເປັນການຮ່ວມມືທາງທຸລະກິດເທົ່ານັ້ນ ແຕ່ຍັງຖືເປັນບາດກ້າວສຳຄັນທາງປະຫວັດສາດ ຂ້າມຂີດຈໍາກັດທາງດ້ານການຊໍາລະ ເພາະເປັນຄັ້ງທໍາອິດທີ່ຜູ້ຊົມໃຊ້ Umoney ແລະ ທຸກແອັບພລິເຄຊັ່ນທະນາຄານໃນລາວ ສາມາດ ຊຳລະຄ່າປີ້ເຮືອບິນຜ່ານລະບົບດີຈີຕອນຢ່າງເຕັມ ຮູບແບບ.
ສາຍການບິນລາວແອລາຍ ເປັນສາຍການບິນແຫ່ງຊາດ ແລະ ເປັນຜູ້ໃຫ້ບໍລິການການບິນທີ່ໃຫຍ່ທີ່ສຸດໃນປະເທດລາວ ປັດຈຸບັນໄດ້ໃຫ້ບໍລິການເສັ້ນທາງບິນທັງພາຍໃນ ແລະ ຕ່າງປະເທດ ໂດຍ ມີເປົ້າໝາຍສ້າງປະສົບການການເດີນທາງທີ່ດີທີ່ສຸດໃຫ້ແກ່ຜູ້ໂດຍສານດ້ວຍມາດຕະຖານການບໍລິການທີ່ທຽບເທົ່າກັບສາຍການບິນຊັ້ນນຳລະດັບສາກົນ ພ້ອມທັງຊ່ວຍເຊື່ອມໂຍງການຄົມມະນາຄົມໄປຍັງເຂດຫ່າງໄກສອກຫຼີກ ໃຫ້ມີຄວາມສະດວກສະບາຍຍິ່ງຂຶ້ນ.
Umoney ຫວັງຢ່າງຍິ່ງວ່າ ຈະຊ່ວຍໃຫ້ລູກຄ້າຂອງ ລາວແອລາຍ ກໍ່ຄືຄົນລາວທົ່ວປະເທດ ເຂົ້າເຖິງການບໍລິການ ຊຳລະເງິນທີ່ງ່າຍດາຍ ແລະ ທັນສະໄໝຍິ່ງຂຶ້ນ. ນັບຕໍ່ຈາກນີ້ໄປ ລູກຄ້າທຸກໆທ່ານທີ່ມີບັນຊີ Umoney ຫຼື ບັນຊີທະນາຄານອື່ນໆ ກໍ່ສາມາດດຳເນີນການຈອງ ແລະ ຊຳລະຄ່າປີ້ເຮືອບິນໄດ້ທັນທີ ເຊິ່ງຊ່ວຍເພີ່ມປະສິດທິພາບໃນການວາງແຜນການເດີນທາງ ແລະ ຕອບສະໜອງຄວາມຕ້ອງການຂອງລູກຄ້າໄດ້ຢ່າງຄົບຖ້ວນ.
Umoney – ເພື່ອນຄູ່ໃຈໃນທຸກການເດີນທາງຂອງທ່ານ.
