ທ່ານ ບຸນເລື່ອມ ມະນີວົງ ເລຂາຄະນະບໍລິຫານງານພັກແຂວງ ພ້ອມດ້ວຍຄະນະ ຕ້ອນຮັບການເຂົ້າພົບປະ ຂອງຄະນະຜູ້ແທນແຂວງທ້າຍຫງວຽນ ສສ ຫວຽດນາມ, ນຳໂດຍ ທ່ານ ຫງວຽນ ແທ່ງ ຍີງ ຮອງເລຂາພັກແຂວງ, ຮອງປະທານຄະນະກຳມະການປົກຄອງແຂວງ, ໃນວັນທີ 18 ພະຈິກ 2025 ຜ່ານມາທີ່ຫ້ອງວ່າການແຂວງ ຫຼວງພະບາງ.
ທ່ານ ບຸນເລື່ອມ ມະນີວົງ ໄດ້ກ່າວສະແດງຄວາມຕ້ອນຮັບ ແລະ ຕີລາຄາສູງຕໍ່ຄວາມສໍາຄັນໃນການຮ່ວມມືລະຫວ່າງ ລາວ-ຫວຽດນາມ ໂດຍສະເພາະ ແຂວງ ທ້າຍຫງວຽນ ກັບແຂວງ ຫຼວງພະບາງ ທີ່ໄດ້ມີການພົວພັນຮ່ວມມືນຳກັນ ຫຼາຍດ້ານ ຕາມບົດບັນທຶກສອງຝ່າຍໃນໄລຍະຜ່ານມາ, ຊຶ່ງການນຳຂອງແຂວງ ຫຼວງພະບາງ ແຕ່ລະສະໄໝໄດ້ມີ ການຊຸກຍູ້ໃຫ້ບັນດາຂະແໜງການຂອງທັງສອງແຂວງ ໄດ້ມີການແລກປ່ຽນບົດຮຽນ ຮ່ວມກັນເປັນປົກກະຕິ ແລະ ການນຳແຂວງທ້າຍຫງວຽນ ໄດ້ໃຫ້ການຊ່ວຍເຫຼືອແຂວງ ຫຼວງພະບາງ ໃນການປັບປຸງ-ກໍ່ສ້າງພື້ນຖານໂຄງລ່າງ ດ້ານການສຶກສາຫຼາຍໂຄງການ, ພ້ອມນັ້ນ ທ່ານ ບຸນເລື່ອມ ມະນີວົງ ໄດ້ລາຍງານສະພາບ ການພັດທະນາເສດຖະ ກິດ-ສັງຄົມຂອງແຂວງ ໃນໄລຍະຜ່ານມາ ໃຫ້ຄະນະຜູ້ແທນຮັບຮູ້ ພ້ອມທັງສະເໜີໃຫ້ຄະນະນຳ ແຂວງ ທ້າຍຫງວຽນ ສືບຕໍ່ເສີມຂະຫຍາຍການຮ່ວມມືລະຫວ່າງສອງແຂວງ ໃຫ້ກວ້າງຂວາງ-ເລິກເຊິ່ງຫຼາຍຂຶ້ນກວ່າເກົ່າ, ທັງສືບຕໍ່ໃຫ້ ການຊ່ວຍເຫຼືອແຂວງ ຫຼວງພະບາງ ໃນການພັດທະນາວຽກງານໂຄສະນາທ້ອງຖິ່ນ ໃຫ້ນັບມື້ມີປະສິດທິພາບ ແລະ ປະ ສິດທິຜົນຂຶ້ນຢ່າງບໍ່ຢຸດຢັ້ງ.
ທ່ານ ຫງວຽນ ແທ່ງ ຍີງ ກໍໄດ້ສະແດງຄວາມຂອບໃຈຕໍ່ ທ່ານ ບຸນເລື່ອມ ມະນີວົງ ເລຂາຄະນະບໍລິຫານງານພັກ ແຂວງ ຫຼວງພະບາງ ພ້ອມຄະນະ ທີ່ໃຫ້ກຽດຕ້ອນຮັບຢ່າງອົບອຸ່ນ ພ້ອມລາຍງານຈຸດປະສົງໃນການມາຢ້ຽມຢາມ ໃນຄັ້ງນີ້ ແລະ ເຫັນດີຕໍ່ຄໍາສະເໜີ ໃນການສືບຕໍ່ການພົວພັນ-ຮ່ວມມືລະຫວ່າງ ແຂວງ ທ້າຍຫງວຽນ ກັບແຂວງ ຫຼວງພະບາງ ໃຫ້ກວ້າງຂວາງ-ເລິກເຊິ່ງຂຶ້ນຕື່ມໃນຕໍ່ໜ້າ.
ແຫຼ່ງຂ່າວຈາກ: ແຂວງ ຫຼວງພະບາງ
