ນັກທຸລະກິດ ມີຄວາມພາກພູມໃຈ ເປັນຢ່າງຍິ່ງ ທີ່ໄດ້ຖືກຄັດເລືອກ ມາຮັບລາງວັນນັກທຸລະກິດ ຊັ້ນນຳດີເດັ່ນ ປະຈຳປີ 2019 ໃນ ວັນສຸກ ທີ່ຜ່ານມາ ແລະ ສິ່ງດັ່ງກ່າວກໍ່ກາຍເປັນແຮງບັນດານໃຈທີ່ສຳຄັນໃຫ້ພວກເຂົາເຈົ້າ ພັດທະນາຕົນເອງ ແລະ ທຸລະກິດຕື່ມອີກ ໃນອະນາຄົດ.
ທ່ານ ຄຳເຫຼັກ ເຊິນຈືເຕີ ນັກທຸລະກິດ ມາຈາກ ແຂວງ ຫຼວງນ້ຳທາເຊິ່ງເປັນຜູ້ໜຶ່ງ ໃນ 53 ນັກທຸລະກິດ ຜູ້ທີ່ໄດ້ຢ່າງຂຶ້ນເວທີອັນຊົງກຽດ ຢູ່ຫໍປະຊຸມແຫ່ງຊາດ ຫຼັກ 6 ນະຄອນຫຼວງວຽງຈັນ ເພື່ອຮັບລາງວັນ ເຊິ່ງ ມອບໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງ ການເງິນ.
ທ່ານ ຄຳເຫຼັກ ເປັນຜູ້ອຳນວຍການ ບໍລິສັດ ເຊິນຈືເຕີ ພັດທະນາ ແລະ ບໍລິການ ຈຳກັດ ໄດ້ໃຫ້ສຳພາດ ຕໍ່ນັກຂ່າວ ໜັງສືພິມວຽງຈັນທາຍ ເມື່ອບໍ່ດົນມານີ້ວ່າ: ຂ້າພະເຈົ້າຮູ້ສຶກພາກພູມໃຈທີ່ໄດ້ມາຮ່ວມພິທີດັ່ງກ່າວ ແລະ ຮູ້ສຶກເປັນກຽດທີ່ສຸດທີ່ສະພາການຄ້າ ແລະ ອຸດສາຫະກຳ ແຫ່ງຊາດ ຮ່ວມມືກັບ ໜັງສືພິມວຽງຈັນທາຍ ໄດ້ຈັດງານນີ້ຂຶ້ນ ເພື່ອເປັນກຳລັງໃຈ ໃຫ້ແກ້ພວກຂ້າພະເຈົ້າ.
ທ່ານຍັງໃຫ້ຄຳໝັ້ນສັນຍາວ່າ ຈະສືບຕໍ່ບຸກໜ້າ ບືນຕົວ ພັດທະນາຕົນເອງ ແລະທຸລະກິດ ເຮັດໃຫ້ວຽກງານສຳເລັດຫຼາຍກວ່າເກົ່າ ໃນອະນາຄົດ.
ແຂວງຫຼວງນ້ຳທາ ມີ ນັກທຸລະກິດ 3 ທ່ານ ໄດ້ຖືກຄັດເລືອກ ເພື່ອຮັບລາງວັນ. ຜູ້ທີ່ໜຶ່ງ ແມ່ນ ທ່ານ ຄຳເຫຼັກ, ຜູ້ທີ່ສອງ ແມ່ນ ທ່ານ ບຸນສົງ ແກ້ວມະນີວົງ ເປັນເຈົ້າຂອງ ຫຼາຍກິດຈະການ ລວມທັງ ທຸລະກິດໂຮງແຮມ ດອກຈຳປາ ແຂວງຫຼວງນ້ຳທາ. ສ່ວນຄົນທີ່ສາມ ແມ່ນ ທ່ານ ສົມພອນ ແສງທອງສະຫວ່າງ ອຳນວຍການ ບໍລິສັດ ບົວໄລມັງກອນທອງ ຂຸດຄົ້ນຖ່ານຫີນ ຈຳກັດຜູ້ດຽວ.
ໃນປີ 2010 ບໍລິສັດ ເຊິນຈືເຕີ ພັດທະນາ ແລະ ບໍລິການ ຈຳກັດກໍ່ເຄີຍໄດ້ຮັບລາງວັນ ຍ້ອງຍໍຈາກລັດຖະບານ ທີ່ປະກອບສ່ວນ ເຂົ້າໃນການເຄື່ອນໄຫວກໍ່ສ້າງຫາກຖານ ພັດທະນາຊົນນະບົດ ແລະ ລົບລ້າງຄວາມ ທຸກຍາກ ຢູ່ແຂວງຫຼວງນ້ຳທາ.
ທ່ານ ຄຳເຫຼັກ ໄດ້ດຳເນີນທຸລະກິດຄ້າ-ຂາຍ ມາແຕ່ 1983 -2004. ປີ 2005 ທ່ານ ໄດ້ສ້າງຕັ້ງບໍລິສັດ ເອີ້ນວ່າ: ບໍລິສັດ ເຊິນຈືເຕີ ພັດທະນາ ແລະ ບໍລິການຈຳກັດ.
ກິດຈະການຫຼັກຂອງບໍລິສັດແມ່ນກ່ຽວກັບ ການບໍລິການເຊັ່ນ: ຕະຫຼາດອຸດສາຫະກຳ ແລະ ກະສິກຳ, ຄິວລົດພາຍໃນ ແລະ ຕ່າງປະເທດ, ເຮືອນພັກ, ໂຮງແຮມ ແລະ ຮ້ານອາຫານທັງໝົດນີ້ແມ່ນຕັ້ງຢູ່ ເມືອງສິງ. ສ່ວນ ທຸລະກິດ ຢູ່ ເມືອງ ຫຼວງນ້ຳທາ ປະກອບມີ ຄິວລົດພາຍໃນ, ພັດຕະຄານ ເຊິ່ງ ຫາກໍ່ເລີ່ມການກໍ່ສ້າງ ແຕ່ປີ 2019 ແລະ ສວນຢາງພາລາ 100 ເຮັກຕາ.
ບໍລິສັດ ໄດ້ປູກຕົ້ນຢາງພາລາໃນປີ 2004 ແລະ ເລີ່ມກິດຢາງ ນັບແຕ່ ປີ 2013 ເປັນຕົ້ນມາ. ແຕ່ລະປີສະໜອງຢາງໄດ້ 200 ກວ່າໂຕນໃຫ້ໂຮງງານຢາງພາລາ ຢູ່ພາຍໃນ ແຂວງ ມີກຳມະກອນເຮັດວຽກຢູ່ສວນ ຢາງພາລາ 39 ກວ່າຄົນ. ສະເລ່ຍລາຍຮັບຂອງກຳມະກອນ ຜູ້ໜຶ່ງໄດ້ຮັບປະມານ 2 ລ້ານກີບ ຕໍ່ ເດືອນ.
ນອກຈາກນີ້ທ່ານ ຄຳເຫຼັກຍັງດຳເນີນ ທຸລະກິດໂຮງຮຽນ ລະດັບ ອະນຸບານ, ປະຖົມ ແລະ ມັດທະຍົມຕົ້ນ ຕັ້ງຢູ່ ແຂວງບໍ່ແກ້ວ.
ທຸລະກິດທັງໝົດຂອງບໍລິສັດ ເຊິນຈືເຕີ ໄດ້ສ້າງວຽກເຮັດງານທຳ ໃຫ້ປະຊາຊົນໃນທອງຖິ່ນ ຈຳນວນ 158 ຄົນ ໃນນີ້ 68 ຄົນແມ່ນເປັນເພດຍິງ.
ທ່ານ ຄຳເຫຼັກ ໄດ້ຍ້າຍຖິ່ນຖານ ບ້ານເກີດ ມາຈາກ ແຂວງຜົ້ງສາລີ ເພື່ອມາດຳລົງຊີວິດ ແລະ ປະກອບອາຊີບ ຢູ່ແຂວງ ຫຼວງນ້ຳທາ ເຊິ່ງເປັນແຂວງໜຶ່ງຂອງ ສປປ ລາວ ທີ່ມີຊາຍແດນຕິດກັບ ແຂວງ ຢຸນນານ ສປ ຈີນ, ມີເສັ້ນທາງຄົມມະນາຄົມ ທີ່ສະດວກ ສະບາຍ ແລະ ມີທົ່ງພຽງກວ້າງຂວາງ ທຽບໃສ່ ແຂວງ ຜົ້ງສາລີ ອັນເປັນເງື່ອນໄຂອຳນວຍຄວາມສະດວກ ໃຫ້ແກ່ການດຳເນີນທຸລະກິດ.
ທ່ານ ຄຳເຫຼັກ ເວົ້າວ່າ: ສິ່ງທ້າທາຍຂອງພາກທຸລະກິດຢູ່ພາຍໃນ ແຂວງ ຫຼວງນ້ຳທາ ແມ່ນຄວາມຊັກຊ້າໃນການຂໍອະນຸມັດດ້ານເອກະສານບໍ່ທັນໃຈຖ້າທຽບໃສ່ເມືອງໃຫຍ່ໆ ເຊິ່ງ ທຸລະກິດ ແມ່ນຕ້ອງການຄວາມວ່ອງໄວ.
ທ່ານ ຄຳເຫຼັກ ໄດ້ວາງແຜນທຸລະກິດໃນ 5 ປີ ຂ້າງໜ້າ ທ່ານ ຈະລົງທຶນສ້າງໂຮງຮຽນສອງພາສາ ລາວ-ຈີນ ແຫ່ງທີ່ສອງ ແລະ ຈະສ້າງໂຮງແຮມຂະໜາດໃຫຍ່ໃຫ້ສາມາດຮັບແຂກໃນຈຳນວນຫຼວງຫູາຍໄດ້ ແລະ ສ້າງຟາມລ້ຽງສັດ ແລະ ການກະເສດ ໜຶ່ງແຫ່ງ.
ທ່ານ ຍັງໄດ້ສະເໜີໃຫ້ພາກລັດ ອຳນວຍຄວາມສະດວກ ໃນການອະນຸມັດເອກະສານ.
ຂ່າວ: ມະນີຈັນ
ພາບ: ບຸນແຝງ
