ຄະນະຊ່ຽວຊານການແພດ ສປ ຈີນ ທີ່ມາຊ່ວຍເຫຼືອ ສປປ ລາວ ໃນການຕ້ານພະຍາດໂຄວິດ-19 ໄດ້ສໍາເລັດໜ້າທີ່ ແລະ ເດີນທາງກັບຄືນປະເທດ ແລ້ວເມື່ອວັນທີ 18 ພຶດສະພາ 2021 ທີ່ຜ່ານມາໂດຍມີ ທ່ານບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ແລະ ທ່ານຈ່ຽງຈ້າຍຕົ່ງ ເອກອັກຄະລັດຖະທູດຈີນປະຈຳລາວ ພ້ອມດ້ວຍຄະນະອອກສົ່ງທີ່ສະໜາມບິນສາກົນວັດໄຕ ນະຄອນຫຼວງວຽງຈັນ.
ຄະນະຜູ້ຊ່ຽວຊານການແພດຈີນຊຸດນີ້ປະກອບມີ 25 ທ່ານ ເຊິ່ງເປັນຊ່ຽວຊານດ້ານລະບາດວິທະຍາ, ການຂ້າເຊື້ອ, ກວດກາຈາກຫ້ອງກວດວິເຄາະ, ການຄຸ້ມຄອງການຕິດເຊື້ອ, ພະແນກມໍລະສຸມ ແລະ ອື່ນໆ ໄດ້ໃຊ້ເວລາ 2 ອາທິດ ທີ່ປະຕິບັດໜ້າທີ່ຢູ່ລາວ, ທິມງານດັ່ງກ່າວໄດ້ສໍາຫຼວດຄົ້ນຄວ້າຢູ່ໂຮງໝໍປິ່ນປົວ, ໂຮງໝໍພາກສະໜາມ, ຫ້ອງທົດລອງກວດພະຍາດ, ສະຖານທີ່ສັກຢາວັກຊິນ, ສະຖານທີ່ຈໍາກັດບໍລິເວນ ແລະອື່ນໆຫຼາຍກວ່າ 40 ໜ່ວຍງານ ເພື່ອເກັບກໍາຂໍ້ມູນ ພ້ອມແລກປ່ຽນຄໍາເຫັນທາງດ້ານວິຊາການ ກັບພາກສ່ວນທີ່ກ່ຽວຂ້ອງ ໂດຍໄດ້ຝຶກອົບຮົມວິຊາສະເພາະໃຫ້ແກ່ບຸກຄະລາກອນດ້ານການແພດ, ສາທາລະນະສຸກ ແລະ ຂະແໜງທີ່ກ່ຽວຂ້ອງຫຼາຍກວ່າ 20 ຄັ້ງ, ເປັນຕົ້ນແມ່ນການ ຄວບຄຸມ ການລະບາດຢູ່ໂຮງໝໍ, ການຈໍາແນກຄົນເຈັບອາການໜັກ ແລະ ອື່ນໆ.
ຂໍ້ມູນ-ພາບ: CRI
