ສຳລັບ ສປປ ລາວ ເດັກອາຍຸຕໍ່າກວ່າ 5 ປີ ປະມານ ໜຶ່ງສ່ວນສາມ ຫຼື (33%) ປະສົບກັບການຂາດສານອາຫານຊໍາເຮື້ອ,ນ້ຳໜັກບໍ່ໄດ້ມາດຕະຖານ, ແບບຈ່ອຍ ຊຶ່ງມາດຕະການໃຫ້ຢາຂ້າແມ່ທ້ອງແມ່ນມີຄວາມສຳຄັນ ເພື່ອການດູດຊຶມສານອາຫານທີ່ຈຳເປັນ, ເຮັດໃຫ້ຮ່າງກາຍ ແລະ ສະໝອງຂອງເດັກ.
ເມື່ອວັນທີ 29 ກັນຍາ 2025 ຜ່ານມານີ້ ທີ່ນະຄອນຫຼວງວຽງຈັນ, ອົງການສຸພານິມິດສາກົນ ປະຈໍາ ສປປ ລາວ ໄດ້ມອບ ຢາຂ້າແມ່ທ້ອງ (Albendazoles) 400 mg ຈໍານວນ 800,000 ເມັດ ໃຫ້ກັບສູນໂພຊະນາການ ກະຊວງສາທາລະນະສຸກ ເພື່ອໄປແຈກຢາຍໃຫ້ແກ່ເດັກໃນກຸ່ມເປົ້າໝາຍໂດຍສະເພາະເດັກລຸ່ມ 5 ປີ ທີ່ມີຄວາມສ່ຽງສູງຕໍ່ການຂາດສານອາຫານ ເພື່ອຮັບປະກັນການ ແຈກຢາຍທີ່ທົ່ວເຖິງ ແລະ ທັນເວລາ ໄປສູ່ສຸກສາລາ ແລະ ຊຸມຊົນ ໃນຂອບເຂດທົ່ວປະເທດ.
ພິທີມອບ-ຮັບຢາ ດັ່ງກ່າວ ແມ່ນໃຫ້ກຽດມອບໂດຍ ທ່ານ ນາງ ເອເດວໄວສ ຊີລານ ຜູ້ອໍານວຍການ ອົງການສຸພານິມິດສາກົນ ປະຈໍາ ສປປ ລາວ ແລະ ກ່າວຮັບໂດຍ ທ່ານ ດຣ. ນາງ ຄຳພູວັນ ພູນສະຫວັດ ຫົວໜ້າສູນໂພຊະນາການ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໂຄງການຂ້າແມ່ທ້ອງແມ່ນເປັນສ່ວນໜຶ່ງຂອງຍຸດທະສາດທີ່ກວ້າງຂວາງຂອງອົງການສຸພະນິມິດ ເພື່ອປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງເດັກນ້ອຍທີ່ມີຄວາມບອບບາງໃນລາວ, ອົງການ ດັ່ງກ່າວ ມີເປົ້າໝາຍທີ່ຈະສ້າງຄວາມເຂັ້ມແຂງໃຫ້ແກ່ຊຸມຊົນ ເພື່ອມີສ່ວນຮ່ວມໃນການສ້າງອະນາຄົດທີ່ມີ “ຄວາມສົມບູນຂອງຊີວິດ” ໃຫ້ກັບເດັກນ້ອຍ ໂດຍການຈັດຕັ້ງປະຕິບັດໂຄງການແບບຄົບວົງຈອນທີ່ສ້າງຄວາມເຂັ້ມແຂງໃຫ້ຄອບຄົວ ແລະ ສົ່ງເສີມການເປັນເຈົ້າການຂອງຊຸມຊົນໃນໄລຍະຍາວ.
