ນະຄອນຫຼວງວຽງຈັນ (ນວ) ເຈົ້າພາບງານມະຫະກຳກິລາແຫ່ງຊາດ ຄັ້ງທີ XII ປີ 2025 ຫຼື ນະຄອນຫຼວງວຽງຈັນ ເກມ 2025 ໄດ້ກໍານົດ 33 ປະເພດກິລາ ເຂົ້າຮ່ວມແຂ່ງຂັນໃນງານຄັ້ງນີ້, ໃນນັ້ນ ມີ 17 ປະເພດກິລາ ຫ້າມນັກກິລາທີມຊາດ ເຂົ້າຮ່ວມແຂ່ງຂັນ: ບານເຕະ, ລອຍນໍ້າ, ມວຍລາວ, ມວຍສາກົນ, ກາຣາເຕໂດ, ຢູໂດ, ດອກປີກໄກ່, ປັນຈັກສີລັດ, ເທຄວັນໂດ, ກະຕໍ້-ຊິນລອນ, ຍິງທະນູ, ມວຍປໍ້າ, ວູຊຸ, ຣັກບີ້, ສະນຸກເກີ, ເພາະກາຍ ແລະ ດຶງເຊືອກ.
ສ່ວນ ປະເພດກິລາທີ່ເປີດກວ້າງ (ບໍ່ຈໍາກັດ) ມີ 11 ປະເພດກິລາ: ເປຕັງ, ປິ່ງປ່ອງ, ເທັນນິດ, ໝາກຂ່າງ, ເຮືອຊ່ວງ, ໜ້າເກັກ, ໝາກເສິກ, ໝາກແລ້, ກັອບ, ຊັອບເທັນນິດ ແລະ ຍົກນໍ້າໜັກ; ປະເພດຈໍາກັດລາຍການ ມີ 7 ປະເພດກິລາ: ບານສົ່ງ, ຍິງປືນ, ອີ-ສະປອດ, ແລ່ນ-ລານ, ດຶງເຊືອກ, ບານບ້ວງ ແລະ ລົດຖີບ.
ພ້ອມນັ້ນ, ນະຄອນຫຼວງວຽງຈັນ ໄດ້ກຳນົດສັນຍາລັກ (Logo) ແມ່ນພຣະທາດຫຼວງວຽງຈັນ ຊຶ່ງການອອກແບບແມ່ນມີຄວາມໝາຍ, ຄວາມສໍາຄັນ ແລະ ອົງປະກອບຂອງສັນຍາລັກງານມະຫາກໍາກິລາແຫ່ງຊາດ ຄັ້ງທີ XII ທີ່ນະຄອນຫຼວງວຽງຈັນ ຄືການປະສົມປະສານ ແລະ ຫຼອມລວມສັນຍາລັກອັນໂດດເດັ່ນຂອງຊາດ ແລະ ທ້ອງຖິ່ນ ຊຶ່ງມີ 3 ອົງປະກອບຫຼັກ ຄື: ພຣະທາດຫຼວງວຽງຈັນ, ສາຍແມ່ນໍ້າງື່ມ ແລະ ເນື້ອໃນທີ່ສະແດງເຖິງ ຄັ້ງໃນການຈັດ ແລະ ຜູ້ທີ່ເປັນເຈົ້າພາບ.
ສ່ວນ ສັດນຳໂຊກ (Mascot ) ແມ່ນ ນົກຍູງ ໃນງານມະຫາກຳກິລາແຫ່ງຊາດ ຄັ້ງທີ XII ຈະແຂ່ງຂັນລະຫວ່າງວັນທີ 15-25 ພະຈິກ 2025 ບາງກິລາເລີ່ມແຂ່ງມາແຕ່ວັນທີ 11 ພະຈິກ 2025.
ສັດນໍາໂຊກ ແມ່ນນົກຍູງ (Mascot ) ຊຶ່ງການອອກແບບກໍໄດ້ສະແດງເຖິງ ນົກຍູງ ທີ່ເຕັມໄປດ້ວຍພະລັງ ແລະ ຄວາມຕັ້ງໝັ້ນ, ຢືນຢ່າງສະຫງ່າຜ່າເຜີຍ, ປີກຂ້າງໜຶ່ງຍົກແຂນຂຶ້ນສູງຢ່າງແຂງແຮງເພື່ອຖື “ທວນໄຟກິລາ” ທີ່ກຳລັງລຸກໂຊດຊ່ວງ. ແປວໄຟສ່ອງແສງເຖິງຈິດວິນຍານແຫ່ງການແຂ່ງຂັນ ແລະ ຄວາມຫວັງ. ໃບໜ້າຂອງນົກສະແດງເຖິງຄວາມມຸ່ງໝັ້ນ ແລະ ພ້ອມທີ່ຈະກ້າວໄປຂ້າງໜ້າ, ທ່າທາງນີ້ສື່ເຖິງການເລີ່ມຕົ້ນຂອງງານກິລາ, ພະລັງຂອງນັກກິລາ ແລະ ຄວາມພາກພູມໃຈໃນການເປັນເຈົ້າພາບ.
ໃນງານມະຫາກຳກິລາແຫ່ງຊາດ ຄັ້ງທີ XII 2025 ຄັ້ງນີ້ ຈະໄດ້ຈັດຂຶ້ນໃນລະຫວ່າງວັນທີ 15-25 ພະຈິກ 2025 ໂດຍຄຳຂວັນປະຈຳງານນີ້ ວ່າ: ສາມັກຄີ ມີວິໄນ ໂປ່ງໃສ ໄດ້ການພັດທະນາ.
