ນະຄອນຫຼວງວຽງຈັນ ຕົກລົງເຫັນດີເປັນເອກະພາບກັນ ໃນການຈັດຕັ້ງປະຕິບັດ 9 ໜ້າວຽກ ເພື່ອກະກຽມຄວາມພ້ອມ ໂດຍສະເພາະແມ່ນເຫັນດີຈະສົ່ງຄູຝຶກ 87 ຄົນ, ນັກກິລາ 523 ຄົນ, ຍິງ 193 ຄົນ ຈາກ 28 ປະເພດກິລາ ເຂົ້າຮ່ວມທວງຕຳແໜ່ງແຊ໋ມເຈົ້າຫຼຽນຄຳ ໃນງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ໃນປີ 2020 ທີ່ຈະຈັດຂຶ້ນລະຫວ່າງ ວັນທີ 22 ມີນາ – 1 ເມສາ 2020.
ສຳລັບ 28 ປະເພດກິລາ ປະກອບມີ: ບານເຕະ, ບານສົ່ງ, ກະຕໍ້+ຊິນລອນ, ເທັນນິດ, ເປຕັງ, ເທັນນິດ, ປິ່ງປ່ອງ, ຍິງທະນູ, ໝາກເສີກ, ລອຍນ້ຳ, ແລ່ນ-ລານ, ມວຍປ້ຳ, ວູຊູ, ມວຍລາວ, ມວຍສາກົນ, ເທຄວນໂດ, ຢູໂດ, ປັນຈັກສີລັດ, ຍິງປືນ, ລົດຖີບ, ໂບລິ້ງ, ກ໋ອບ, ຊວງເຮືອ, ໝາກຂ່າງ, ໜ້າເກັກ, ບານບ້ວງ, ສະນຸກເກີ ແລະ ໝາກແລ້.
ກອງປະຊຸມ ຮອບສອງຂອງສະມາຄົມກິລາ-ກາຍະກຳ ນະຄອນຫຼວງວຽງຈັນ ໃນມື້ວານ ວັນທີ 22 ພະຈິກ 2019 ທີ່ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ສີຫຸນ ສິດທະລືໄຊ ຮອງເຈົ້າຄອງນະຄອນຫຼວງວຽງຈັນ, ມີບັນດາເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າພະແນກ, ຂະແໜງ ແລະ ຄະນະສະຫະພັນກິລາ 28 ປະເພດ ຂອງນະຄອນຫຼວງວຽງຈັນ ເຂົ້າຮ່ວມຢ່າງພ້ອມພຽງ.
ທ່ານ ສົມພອນ ສອນດາລາ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ກໍໄດ້ຂຶ້ນລາຍງານການກະກຽມຄວາມພ້ອມຂອງທັບນັກກິລານະຄອນຫຼວງ ໃນນັ້ນຈະມີຄະນະຄູຝຶກ ແລະ ນັກກິລາໃນເບື້ອງຕົ້ນຄັດໄດ້ 566 ຄົນເປັນຍິງ 266 ຄົນ ພາຍຫຼັງໄດ້ຝຶກຊ້ອມມາໄລຍະໜຶ່ງ ແລະ ຄັດຈ້ອນໄດ້ປັດຈຸບັນ ຄູຝຶກ 87 ຄົນ ແລະ ນັກກິລາ 623 ຄົນ ( ຍິງ 193 ຄົນ ), ສ່ວນປະເພດກິລາທີ່ໄດ້ຝຶກແອບລະບົບຕໍ່ເນື່ອງມີ 18 ກິລາຄື ບານເຕະຊາຍ, ລົດຖີບ, ປິ່ງປ່ອງ, ມວຍລາວ, ວູຊູ, ຍິງປືນ, ເທັນນິສ, ເຮືອຊ່ວງ, ໂບລີ້ງ, ສະນຸກເກີ, ດອກປີກໄກ່, ໜ້າເກັກ, ຍິງທະນູ, ກ໊ອຟ, ໝາກເສິກ, ປັນຈັກສີລັດ, ມວຍສາກົນ, ໝາກຂ່າງ ແລະ ເປຕັງ, ເຊິ່ງທັງໝົດໄດ້ມີການຝຶກຊ້ອມຢູ່ສະໜາມກິລາເຈົ້າອານຸວົງ, ບຶງຂະຫຍອງ ແລະ ບັນດາສະໂມສອນຢູ່ຕາມໂຮງຮຽນຕ່າງໆອ້ອມຂ້າງນະຄອນຫຼວງ. ນອກຈາກ 18 ປະເພດກິລາ ໃນທ້າຍປີນີ້ຈະເລີ່ມດຳເນີນການຝຶກຊ້ອມຢ່າງເປັນທາງການ.
ໃນກອງປະຊຸມດັ່ງກ່າວກໍໄດ້ມີມະຕິຕົກລົງເຫັນດີໃນການຈັດຕັ້ງປະຕິບັດ 9 ໜ້າວຽກ ກໍຄື ເຫັນດີໃຫ້ສົ່ງ 28 ປະເພດກິລາເຂົ້າຮ່ວມ, ເຫັນດີໃຫ້ຝຶກຊ້ອມ 4 ໄລຍະ ສຳລັບໄລຍະທີ 1 ຝຶກຊ້ອມແຕ່ວັນທີ 1 ກັນຍາ 2019 – 31 ພະຈິກ 2019, ໄລຍະທີ 2 ຝຶກຊ້ອມແຕ່ວັນທີ 1 ທັນວາ 2019 – 31 ມັງກອນ 2020 ແລະ ໄລຍະທີ 3 ຝຶກຊ້ອມແຕ່ວັນທີ 1 ເດືອນກຸມພາ 2020 – ວັນທີ 12 ມີນາ 2020.
ຂ່າວ: ວຽງຈັນທາຍ
ພາບ: ສົງການ
