ການຈັດງານສະເຫຼີມສະຫຼອງບຸນປີໃໝ່ລາວ 2563 ຢູ່ ນະຄອນຫຼວງພະບາງ ປີນີ້ອາດຈະບໍ່ຄຶກຄື້ນຄືທຸກໆ ປີທີ່ຜ່ານມາຍ້ອນພະຍາດຈຸລະໂລກສາຍພັນໃໝ່ 2019 ກໍາລັງລະບາດຢູ່ຫຼາຍປະເທດໃນທົ່ວໂລກ.
ທ່ານ ໄຊຍະແສງ ພັນທະວົງ ຫົວໜ້າໜ່ວຍງານຄົ້ນຄວ້າວຽກລັດ ຂອງນະຄອນຫຼວງພະບາງ ໄດ້ກ່າວຕໍ່ທີມງານວຽງຈັນທາຍ ມື້ເຊົ້າວັນທີ 10 ມີນາ 2020 ນີ້ ວ່າ: ການຈັດງານສະເຫຼີມສະຫຼອງບຸນປີໃໝ່ລາວ 2563 ຢູ່ ນະຄອນຫລວງພະບາງປີນີ້ ອາດຈະບໍ່ຄຶກຄື້ນຄືທຸກໆປີທີ່ຜ່ານມາ ເພາະຈະມີການປ່ຽນແປງບາງກິດຈະກໍາ ຍ້ອນໄດ້ຮັບຜົນກະທົບຈາກພະຍາດຈຸລະໂລກສາຍພັນໃໝ່ 2019 ຢູ່ປະເທດຕ່າງໆ ສ່ວນວ່າຈະຈັດໃຫຍ່ຄືທຸກໆປີທີ່ຜ່ານມາ ຫຼື ບໍ່ນັ້ນ ຍັງບໍ່ທັນມີຄໍາຕອບ ເພາະຍັງຖ້າຄໍາເຫັນ ຫຼື ຄໍາຕອບຈາກຫ້ອງວ່າການລັດຖະບານ, ທາງອໍານາດການປົກຄອງນະຄອນຫຼວງພະບາງຈະມີພິທີຖະແຫຼງຂ່າວກ່ຽວກັບການຈັດງານດັ່ງກ່າວໃນວັນສຸກທີ່ຈະມາເຖີງນີ້ ຫຼື ອາທິດໜ້າຖ້າໄດ້ຄໍາຕອບຈາກຫ້ອງວ່າການລັດຖະບານ.
ທ່ານ ໄຊຍະແສງ ໄດ້ກ່າວຕື່ມວ່າ: ສໍາລັບປີນີ້ການຈັດງານອາດຈະໄດ້ຕັດບາງກິດຈະກຳທີ່ບໍ່ຈຳເປັນ ແລະ ມີຄວາມສ່ຽງຕໍ່ກັບພະຍາດເຊື້ອຈຸລະໂລກສາຍພັນໃໝ່ 2019 ໂດຍສະເພາະງານທີ່ມີການຊຸມນຸມ ເຊັ່ນ: ງານຕະຫຼາດນັດ, ຈັດຮ້ານ ຫລື ເວທີຄອນເສີດ, ງານຫາລາຍໄດ້ ແລະ ອື່ນໆ, ສ່ວນການສົງພະຢູ່ຕາມວັດວາອາຮາມຕ່າງໆແມ່ນມີປົກກະຕິ.
ທຸກໆປີທີ່ຜ່ານມາແຂວງຫຼວງພະບາງແມ່ນໄດ້ຈັດການການສະເຫຼີມສະຫຼອງບຸນປີໃໝ່ລາວຢ່າງຄຶກຄື້ນ ໂດຍມີຂະບວນແຫ່ຕ່າງໆ ເຊັ່ນ: ຂະບວນແຫ່ຜູ້ເຖົ້າຜູ້ແກ່, ພະສົງ, ພະພຸດທະຮູບ, ນາງສັງຂານ, ປູ່ເຍີ ຍ່າເຍີ, ຂະບວນມວນຊົນ ແລະ ອື່ນໆ ນອກນັ້ນຍັງມີການຈັດງານຕະຫຼາດນັດ, ງານຄອນເສີດ ແລະ ອື່ນໆ.
ຂ່າວ: ວຽງຈັນທາຍ
ພາບ: ພູນຊັບ
