ລັດຖະບານລາວ, ບໍລິສັດ ເອໄອດີຊີ ການຄ້າ ຈຳກັດຜູ້ດຽວ (AIDC) ແລະ ບໍລິສັດ ລັດວິສາຫະກິດ ສະບຽງ ອາຫານ ຈີນ ສາຂາ ເມືອງ ເຈີງໂຈ, ແຂວງ ເຫີໜານ, ສປ ຈີນ ໄດ້ມີພິທີເຊັນສັນຍາຮ່ວມມື (ແບບທາງໄກ) ເມື່ອບໍ່ດົນມານີ້ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ຄຳແພງ ໄຊສົມແພງ ລັດຖະມົນຕີ ກະຊວງ ອຸດສາຫະກຳ ແລະ ການຄ້າ ແລະ ທ່ານ ເພັດ ພົມພິພັກ ລັດຖະມົນຕີ ກະຊວງກະສິກຳ ແລະ ປ່າໄມ້, ກ່ຽວກັບການຈັດຊື້ສິນຄ້າປຸງແຕ່ງກະສິກຳ 9 ລາຍການຈາກ ສປປ ລາວ ເພື່ອສົ່ງໄປ ສປ ຈີນປະກອບມີ: ຖົ່ວດິນ, ແປ້ງມັນຕົ້ນ, ຊີ້ນງົວແຊ່ແຂງ, ໝາກມ່ວງຫິມມະພານ, ໝາກມ່ວງ, ຖົ່ວລຽນ, ຖົ່ວເຫຼືອງ, ກ້ວຍ ແລະ ນ້ຳຕານ ຊຶ່ງມີມູນຄ່າ 1,5 ຕື້ໂດລາ ໂດຍຈະມີການເລີ່ມສົ່ງອອກພາຍຫຼັງ 5 ປີທີ່ມີການເຊັນສັນຍາດັ່ງກ່າວນີ້.
ສັນຍາການຮ່ວມມືດັ່ງກ່າວເຊັນໂດຍ ທ່ານ ພຶດສະພາ ພູມມະສັກ ປະທານບໍລະສັດ AIDC, ທ່ານ ຈ້າຍ ເຫວີຍ (Dai Wei) ປະທານກຳມະການບໍລິຫານ ລັດວິສາຫະກິດສະບຽງອາຫານ ສປ ຈີນ ແລະ ຕາງໜ້າຂອງລັດຖະບານລາວຮ່ວມລົງນາມເພື່ອເປັນພະຍານໂດຍທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ແລະ ທ່ານ ສີປະໄພ ໄຊສົງຄາມ ຫົວໜ້າຫ້ອງການ ກະຊວງ ກະສິກຳ ແລະປ່າໄມ້.
ຂໍ້ມູນ-ພາບ: ເສດຖະກິດການຄ້າ
