ກະຊວງອຸດສາຫະກຳ ແລະ ການຄ້າ ໄດ້ອອກແຈ້ງການໃນວັນທີ 23 ເມສາ 2020 ເລື່ອງປັບລົງລາຄາຂາຍຍ່ອຍນ້ຳມັນເຊື້ອໄຟລົງ 400 ກີບ/ລິດ ທຸກຊະນິດ ເລີ່ມມື້ເຊົ້ານີ້.
ແຈ້ງການດັ່ງກ່າວ ໄດ້ລະບຸເຖິງສະມາຄົມ ນ້ຳມັນເຊື້ອໄຟ ແລະ ອາຍແກ໊ດ, ບັນດາບໍລິສັດນ້ຳມັນເຊື້ອໄຟ ແລະ ປ້ຳຂາຍຍ່ອຍນ້ຳມັນເຊື້ອໄຟ ໃນຂອບເຂດທົ່ວປະເທດໃຫ້ປັບລົງລາຄາຂາຍຍ່ອຍນ້ຳມັນເຊື້ອໄຟລົງ 400 ກີບທຸກຊະນິດ ເລີ່ມປະຕິບັດໃນວັນທີ 24 ເມສາ 2020 ເລີ່ມແຕ່ເວລາ 6 ໂມງເຊົ້າ.
ການປະກາດປັບລົງລາຄານໍ້າມັນໃນຄັ້ງນີ້ ເຮັດໃຫ້ນ້ຳມັນແອັດຊັງຢູ່ນະຄອນຫຼວງວຽງຈັນ ລົງມາຢູ່ທີ່ 7.680 ກີບຕໍ່ລິດ ແລະ ກາຊວນລົງມາຢູ່ທີ່ 7.040 ກີບຕໍ່ລິດ ແລະ ການປັບລາຄາຄັ້ງນີ້ ແມ່ນໄດ້ເພີ່ມຄັງແຮ 500 ກີບທຸກຊະນິດ. ການຄິດໄລ່ເສຍພັນທະ ແລະ ຄ່າທຳນຽມຕ່າງໆ ແມ່ນໃຫ້ພາກສ່ວນກ່ຽວຂ້ອງ ຄິດໄລ່ຕາມທີ່ໄດ້ກຳນົດໄວ້ໃນໂຄງສ້າງລາຄານ້ຳມັນເຊື້ອໄຟສະບັບເລກທີ 0301 ລົງວັນທີ 23 ເມສາ 2020 ຈົນກວ່າຈະມີການປ່ຽນແປງ.
ພາຍໃນເດືອນເມສານີ້, ກະຊວງອຸດສາຫະກຳ ແລະ ການຄ້າໄດ້ແຈ້ງປັບລາຄານໍ້າມັນລົງເປັນເທື່ອທີ 2 ຄື ວັນທີ 2 ເມສາ ທີ່ຜ່ານມາໄດ້ປັບ ລາຄານໍ້າມັນລົງທຸກຊະນິດ 300 ກີບ/ລິດ ແລະ ຄັ້ງນີ້ແມ່ນ 400 ກີບ/ລິດ.
ຂ່າວ: ວຽງຈັນທາຍ
