ຫ້ອງການສາທາລະນະສຸກ ເມືອງ ສະໜາມໄຊ ຮ່ວມກັບຂະເເໜງຄວບຄຸມພະຍາດຕິດຕໍ່ ແລະ ທີມງານແພດໝໍ ປ້ອງກັນໄຂ້ຍູງຂັ້ນເເຂວງ-ຂັ້ນເມືອງ ໄດ້ລົງຢ້ຽມຢາມ ຜູ້ປະສົບໄພນ້ຳຖ້ວມ ທີ່ເມືອງ ສະໜາມໄຊ, ແຂວງ ອັດຕະປື ໃນບໍ່ດົນມານີ້ ທີ່ອາໃສຢູ່ 5 ສູນພັກຊົ່ວຄາວຄື: ສູນພັກຊົ່ວຄາວບ້ານ ຫາດຍາວ, ບ້ານ ດົງບາກ, ບ້ານ ປີນດົງ, ບ້ານ ດອນບົກ ແລະ ບ້ານ ຕະມໍຢອດ.
ຈຸດປະສົງໃນການລົງຂອງທີມງານແພດໝໍໃນຄັ້ງນີ້ ແມ່ນເພື່ອເຜີຍແຜ່ວິທີການທຳລາຍເເຫຼ່ງເພາະພັນໜອນນໍ້າຍຸງລາຍ ແລະ ວິທີປ້ອງກັນພະຍາດໄຂ້ຍູງລາຍ. ນອກຈາກນັ້ນ, ຍັງໄດ້ເຜີຍແຜ່ວິທີການໃສ່ຜ້າປິດປາກ-ດັງໃຫ້ຖືກວິທີ ແລະ ວິທີການລ້າງມື 07 ຂັ້ນຕອນເພື່ອປ້ອງກັນພະຍາດອັກເສບປອດທີ່ເກີດຈາກເຊື້ອ COVID-19. ໂດຍ ມີ ທ່ານ ນາງ ວຽງເພັດ ສຸດທິເງິນ ຮອງຫົວ ໜ້າຫ້ອງການສາທາລະນະສຸກ ເມືອງ ສະໜາມໄຊ, ທ່ານ ນາງ ພູປະສົງ ສີສຸລາດ ຮອງຫົວໜ້າຂະເເໜງຄວບຄຸມພະຍາດຕິດຕໍ່ ແລະ ທີມງານໄຂ້ຍູງຂັ້ນເເຂວງ-ຂັ້ນເມືອງ ເຂົ້າຮ່ວມໃນການລົງສ້າງຂະບວນການຄັ້ງນີ້.
ຂ່າວ-ພາບ: ພະແນກສາທາລະນະສຸກ ແຂວງອັດຕະປື
