ຜົນກະທົບຈາກພາຍຸວິພາໄດ້ສ້າງຄວາມເສຍຫາຍຢ່າງໜັກໜ່ວງໃນ 8 ແຂວງຂອງ ສປປ ລາວ, ກໍ່ໃຫ້ເກີດການສູນເສຍທັງຊີວິດ, ຊັບສິນ, ແລະ ຜົນກະທົບຢ່າງໃຫຍ່ຫຼວງຕໍ່ເສດຖະກິດ. ຂໍ້ມູນເບື້ອງຕົ້ນສະແດງໃຫ້ເຫັນເຖິງການສູນເສຍ 4 ຊີວິດ, 4 ຄົນສູນຫາຍ ແລະ 6 ຄົນບາດເຈັບ.
ເມື່ອບໍ່ດົນາມານີ້, ຄະນະກຳມະການຄຸ້ມຄອງໄພພິບັດ ຂັ້ນສູນກາງ (ຄພສ) ໄດ້ຈັດກອງປະຊຸມສຸກເສີນທີ່ກະຊວງປ້ອງກັນປະເທດ ເພື່ອປຶກສາຫາລືວາງແຜນໃນການແກ້ໄຂ ແລະ ໃຫ້ການຊ່ວຍເຫຼືອແຂວງທີ່ຖືກກະທົບ. ກອງປະຊຸມໄດ້ເປັນປະທານໂດຍ ທ່ານ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ ແລະ ປະທານ ຄພສ.
ທ່ານ ວົງຄຳ ພັນທະນຸວົງ, ຫົວໜ້າກົມສັງຄົມສົງເຄາະ ແລະ ຫົວໜ້າກອງເລຂາ ຄພສ, ໄດ້ລາຍງານສະພາບຄວາມເສຍຫາຍເບື້ອງຕົ້ນຕໍ່ກອງປະຊຸມ. ພາຍຸວິພາໄດ້ກະທົບໃສ່ 8 ແຂວງຄື: ວຽງຈັນ, ບໍລິຄຳໄຊ, ຫຼວງພະບາງ, ໄຊຍະບູລີ, ຊຽງຂວາງ, ຫົວພັນ, ບໍ່ແກ້ວ, ແລະ ໄຊສົມບູນ. ໂດຍລວມແລ້ວ, 34 ເມືອງ, 262 ບ້ານ ແລະ ເກືອບ 15,000 ຄອບຄົວ (ປະມານ 14,191 ຄົນ, ໃນນັ້ນຍິງ 9,817 ຄົນ) ໄດ້ຮັບຜົນກະທົບ.
ນອກຈາກການສູນເສຍຊີວິດ ແລະ ການບາດເຈັບແລ້ວ, ພາຍຸຍັງໄດ້ສ້າງຄວາມເສຍຫາຍຢ່າງໜັກຕໍ່ຊັບສິນ ແລະ ພື້ນຖານໂຄງລ່າງ: ເຮືອນຈຳນວນ 2,249 ຫຼັງຄາເຮືອນຖືກເສຍຫາຍ (ໃນນັ້ນ 183 ຫຼັງຖືກທຳລາຍໝົດ 100%). ເນື້ອທີ່ທຳການຜະລິດຖືກກະທົບ 1,753.37 ເຮັກຕາ, ສົ່ງຜົນຕໍ່ຄວາມໝັ້ນຄົງທາງສະບຽງອາຫານຂອງປະຊາຊົນ. ຕາຂ່າຍໄຟຟ້າ 11 ຈຸດ, ໂຮງຮຽນ 5 ແຫ່ງ, ສັດລ້ຽງຈຳນວນໜຶ່ງ, ເສັ້ນທາງ 47 ແຫ່ງ, ຂົວ 5 ແຫ່ງ, ຊົນລະປະທານ 2 ແຫ່ງ, ສຸຂາພິບານ 17 ແຫ່ງ, ຮ້ານຄ້າ, ພາຫະນະ ແລະ ສິ່ງອື່ນໆອີກ 7 ແຫ່ງ/ຄັນ ກໍໄດ້ຮັບຄວາມເສຍຫາຍເຊັ່ນກັນ. ຂໍ້ມູນເຫຼົ່ານີ້ແມ່ນຂໍ້ມູນເບື້ອງຕົ້ນເທົ່ານັ້ນ, ເນື່ອງຈາກນໍ້າຍັງບໍ່ທັນຫຼຸດລົງໃນບາງພື້ນທີ່ ແລະ ຄພສ ຂັ້ນແຂວງພວມປະສານສົມທົບກັບ ຄພສ ຂັ້ນເມືອງ ເພື່ອເກັບກຳຂໍ້ມູນເພີ່ມຕື່ມ.
ໃນການແກ້ໄຂບັນຫາສຸກເສີນ, ອົງການປົກຄອງແຂວງໄດ້ເອົາໃຈໃສ່ຊີ້ນຳຄະນະກຳມະການຄຸ້ມຄອງໄພພິບັດແຕ່ລະຂັ້ນໃນການຕິດຕາມ, ເຝົ້າລະວັງ ແລະ ຊຸກຍູ້ຂັ້ນເມືອງ, ຂັ້ນບ້ານ ເພື່ອຮັບມືກັບໄພພິບັດທີ່ເກີດຂຶ້ນ. ມີການຈັດຕັ້ງສູນບັນຊາການຂັ້ນແຂວງ, ຂັ້ນເມືອງ ເພື່ອຕອບໂຕ້ກັບໄພພິບັດ ພ້ອມທັງປະສານງານ ແລະ ລະດົມທຸກພາກສ່ວນເພື່ອສະໜັບສະໜູນການຊ່ວຍເຫຼືອສຸກເສີນເບື້ອງຕົ້ນ. ແຂວງຊຽງຂວາງໄດ້ຮັບເງິນຊ່ວຍເຫຼືອ 140 ລ້ານກີບ, ແລະ ແຂວງຫຼວງພະບາງໄດ້ມອບເງິນ 80 ລ້ານກີບ ໃຫ້ເມືອງຊຽງເງິນ ແລະ ເມືອງນານ ເພື່ອຕິດຕາມເຝົ້າລະວັງ, ພ້ອມດ້ວຍເຄື່ອງອຸປະໂພກ-ບໍລິໂພກຈຳນວນໜຶ່ງ. ພ້ອມກັນນີ້, ຍັງໄດ້ມີການກອບກູ້ປະຊາຊົນຜູ້ທີ່ຕົກຄ້າງ ແລະ ຜູ້ເສຍຊີວິດກັບຄືນສູ່ຄອບຄົວ, ທັງໄດ້ເລັ່ງແກ້ໄຂເສັ້ນທາງບາງເສັ້ນເພື່ອໃຫ້ການສັນຈອນເປັນປົກກະຕິ.
ຄພສ ຂັ້ນສູນກາງກໍໄດ້ມີມາດຕະການຊ່ວຍເຫຼືອສຸກເສີນໂດຍການອະນຸມັດເງິນກອງທຶນນໍ້າມັນ 50 ລ້ານກີບໃຫ້ແຂວງໄຊຍະບູລີ, ໂອນເງິນເຂົ້າກອງທຶນຄຸ້ມຄອງໄພພິບັດແຂວງ ໃຫ້ໄຊຍະບູລີ ແລະ ຊຽງຂວາງ ແຂວງລະ 200 ລ້ານກີບ ແລະ ໃຫ້ແຂວງວຽງຈັນ 100 ລ້ານກີບ.
ນອກນີ້, ຍັງໄດ້ອະນຸມັດເຄື່ອງອຸປະໂພກ-ບໍລິໂພກ ລວມມູນຄ່າ 2.994 ລ້ານກີບ ໃຫ້ແຂວງໄຊຍະບູລີ ແລະ ຊຽງຂວາງ ເຊັ່ນ: ເຂົ້າສານ 53 ໂຕນ, ເຄື່ອງໃຊ້ຄົວເຮືອນ 700 ແກັດ, ເຄື່ອງສຸຂະອະນາໄມ 330 ແກັດ, ມຸ້ງ 700 ດາງ, ສາດຢາງ 700 ຜືນ, ຜ້າຫົ່ມ 600 ຜືນ, ແລະ ນໍ້າດື່ມຫົວເສືອ 3,200 ແພັກ. ເພື່ອຊ່ວຍເຫຼືອພື້ນທີ່ຫ່າງໄກສອກຫຼີກ, ໄດ້ອະນຸມັດນໍາໃຊ້ຍົນ 2 ລຳ ໃນການຂົນສົ່ງເຄື່ອງບັນເທົາທຸກຢູ່ແຂວງຊຽງຂວາງ.
ໃນຕອນທ້າຍຂອງກອງປະຊຸມ, ທ່ານຮອງນາຍົກລັດຖະມົນຕີ ໄດ້ຊີ້ນໍາໃຫ້ກອງເລຂາ ຄພສ ປະສານສົມທົບກັບພາກສ່ວນກ່ຽວຂ້ອງ ແລະ ອົງກອນຮ່ວມ IASC ເພື່ອຈັດຕັ້ງທີມງານລົງປະເມີນສະພາບຜົນກະທົບ ແລະ ຜົນເສຍຫາຍຕົວຈິງໃນແຂວງທີ່ຖືກກະທົບໜັກ ເປັນຕົ້ນແມ່ນ ຊຽງຂວາງ, ຫົວພັນ, ໄຊຍະບູລີ, ວຽງຈັນ ແລະ ຫຼວງພະບາງ ເພື່ອລາຍງານລັດຖະບານ ແລະ ສະເໜີແກ້ໄຂໃຫ້ທັນສະພາບການ. ພ້ອມກັນນີ້, ໄດ້ເນັ້ນໃຫ້ກະກຽມແຜນລົງຕິດຕາມຊຸກຍູ້ການແກ້ໄຂສຸກເສີນໂດຍໄວ, ອອກແຈ້ງການປຸກລະດົມສັງຄົມເພື່ອປະກອບສ່ວນຊ່ວຍເຫຼືອຜູ້ປະສົບໄພ ແລະ ປະກອບທຶນເຂົ້າກອງທຶນຄຸ້ມຄອງໄພພິບັດ, ມອບໃຫ້ກະຊວງແຮງງານ ແລະ ສະຫວັດດີການສັງຄົມ ເປັນໃຈກາງໃນການຮັບບໍລິຈາກ.
ນອກຈາກນີ້, ຍັງໄດ້ເນັ້ນໃຫ້ກົມອຸຕຸນິຍົມ ແລະ ອຸທົກກະສາດ ສືບຕໍ່ແຈ້ງເຕືອນສະພາບອາກາດ ແລະ ການປ່ອຍນໍ້າອອກຈາກເຂື່ອນໃຫ້ທັນການ, ເພື່ອໃຫ້ກອງເລຂາ ຄພສ ຕິດຕາມຢ່າງໃກ້ຊິດ ແລະ ຮັບປະກັນການແຈ້ງຂໍ້ມູນເຖິງປະຊາຊົນໃຫ້ກຽມພ້ອມຢ່າງທັນການ. ການຊ່ວຍເຫຼືອສຸກເສີນແກ່ບັນດາແຂວງທີ່ຖືກຜົນກະທົບຈາກນໍ້າຖ້ວມສາເຫດຈາກພາຍຸວິພາໃນໄລຍະວັນທີ 21-24 ກໍລະກົດກໍຈະສືບຕໍ່. ການປະສານສົມທົບກັນໃນການຕອບໂຕ້ສຸກເສີນໃຫ້ວ່ອງໄວທັນການຕາມກົນໄກຂອງຄພສ ແຕ່ລະຂັ້ນ (ສູນກາງ, ແຂວງ, ເມືອງ, ບ້ານ) ແມ່ນມີຄວາມສຳຄັນຢ່າງຍິ່ງ.
