ພະແນກກະສິກຳ ແລະ ປ່າໄມ້ ນະຄອນຫຼວງວຽງ ຈັນໃຫ້ຮູ້ວ່າ: ທີມງານສັດຕະວະແພດຈາກ ຂະແໜງ ລ້ຽງສັດ ແລະ ການປະມົງໄດ້ສົມທົບກັບສັດຕະວະແພດ ເມືອງທີ່ກ່ຽວຂ້ອງລົງປິ່ນປົວ ແລະ ເລັ່ງປ້ອງ ກັນພະຍາດຜີວໜັງອັກເສບ ງົວ- ຄວາຍ ແລ້ວໂດຍ ເກີດຢູ່ໃນ 128 ບ້ານຂອງ 7 ເມືອງໃນນະຄອນ ຫຼວງວຽງຈັນ ຊຶ່ງມີງົວ-ຄວາຍຕິດເຊື້ອພະຍາດ ດັ່ງກ່າວແລ້ວຫຼາຍກວ່າ 2.330 ໂຕ ໃນນີ້ໄດ້ປິ່ນປົວ ຫາຍດີແລ້ວ 2.040 ໂຕ ແລະ ຕາຍແລ້ວ 22 ໂຕ. 7 ເມືອງ ທີ່ເກີດເຊື້ອພະຍາດດັ່ງກ່າວນີ້ປະກອບມີ: ເມືອງຫາດຊາຍຟອງ, ສັງທອງ, ນາຊາຍທອງ, ສີໂຄດຕະບອງ, ໄຊທານີ, ໄຊເສດຖາ ແລະ ເມືອງປາກງື່ມ, ຍັງເຫຼືອແຕ່ 2 ເມືອງຄື: ເມືອງສີສັດຕະນາກ ແລະ ເມືອງຈັນທະບູລີທີ່ຍັງບໍ່ມີພະຍາດດັ່ງກ່າວ.
ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກໍາ ແລະ ປ່າໄມ້ນະຄອນຫຼວງວຽງຈັນແຈ້ງໃຫ້ຮູ້ກ່ຽວ ກັບພະຍາດດັ່ງກ່າວວ່າ: ອາການສະແດງອອກ ຂອງສັດຕິດເຊື້ອພະຍາດຜີວໜັງອັກເສບຕິດຕໍ່ງົວ-ຄວາຍ ແມ່ນມີຕຸ່ມທົ່ວຕົນໂຕ ໂດຍສະເພາະບໍລິເວນ ແອບແອ້ຂາຫຼັງ, ສັດຈະເປັນໄຂ້ ແລະ ຈ່ອຍ, ຖ້າຮັກ ສາບໍ່ທັນ ຕຸ່ມຈະແຕກ, ເມື່ອແມງວັນໄປຕອມ ແລະ ໄຂ່ໃສ່ຈະເກີດເປັນໜອນ ແລະ ຊຶມເຊື້ອຈົນເຮັດ ໃຫ້ສັດຕາຍໄດ້.
ທ່ານຫຼ້າສາຍໃຫ້ຮູ້ຕື່ມວ່າ: ພະຍາດຜີວໜັງອັກເສບ ຕິດຕໍ່ ງົວ-ຄວາຍ ບໍ່ສາມາດຕິດຕໍ່ໃສ່ຄົນໄດ້, ສ່ວນ ສັດທີ່ຕິດເຊື້ອເມື່ອປິ່ນ ປົວດີແລ້ວສາມາດບໍລິ ໂພກ ໄດ້. ຢ່າງໃດກໍ່ຕາມ ເພື່ອບໍ່ໃຫ້ສົ່ງຜົນກະທົບຮ້າຍ ແຮງຕໍ່ການສະໜອງຊີ້ນງົວ-ຄວາຍ ຮັບໃຊ້ໃນສັງຄົມ ທາງພະແນກໄດ້ອະນຸຍາດໃຫ້ບັນດາໂຮງຂ້າສັດນໍາເອົາງົວ-ຄວາຍຈາກບັນດາບ້ານ, ຟາມ ຫຼື ເຂດທີ່ໄດ້ ຮັບການຢັ້ງຢືນປອດພະຍາດດັ່ງກ່າວຈາກຂະແໜງກ່ຽວຂ້ອງເຂົ້າມາຂ້າໃນໂຮງງານໄດ້ ເຮັດໃຫ້ປັດຈຸ ບັນ ຕາມທ້ອງຕະຫຼາດໃນນະຄອນຫຼວງວຽງຈັນ ຍັງມີຊີ້ນງົວ-ຄວາຍ ຈຳໜ່າຍພຽງພໍກັບຄວາມ ຕ້ອງການຂອງຜູ້ບໍລິໂພກ.
ຂໍ້ມູນ-ພາບ: ບຸນຕຽງ ຈັນທະວົງ
