ສະຖິຕິໃນປີ 2019 ຜ່ານມາ ຢູ່ ສປປ ລາວ ມີຄົນເຈັບທີ່ໃຊ້ເລືອດ ເຂົ້າໃນການປິ່ນປົວກວມ ເອົາ 40.587 ເທື່ອຄົນ, ສ່ວນໃຫຍ່ແມ່ນແມ່ຍິງທີ່ໄດ້ຮັບຜົນກະທົບຈາກການເກີດລູກ, ເດັກນ້ອຍທີ່ເປັນພະຍາດເລືອດຈາງຂັ້ນຮ້າຍແຮງ, ພະຍາດໄຂ້ຍຸງ ແລະ ການຜ່າຕັດຊະນິດຕ່າງໆ, ເຊິ່ງການບໍລິຈາກເລືອດ ສາມາດຊ່ວຍເຫລືອຄົນເຈັບ ແລະ ກອບກູ້ຊີວິດຄົນໄດ້.
ທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ໄດ້ກ່າວ ໃນງານຈັດກິດຈະກຳ ບໍລິຈາກເລືອດ ຊ່ວຍເຫຼືອສັງຄົມ ເນື່ອງໃນໂອກາດສະເຫຼີມສະຫຼອງ ວັນຜູ້ບໍລິຈາກເລືອດໂລກ 14 ມິຖຸນາ 2020 ທີ່ ນະຄອນຫຼວງວຽງຈັນເມື່ອບໍ່ດົນມານີ້ ວ່າ: ປີຜ່ານມາ, ບັນດາສູນເລືອດຢູ່ຂອບເຂດທົ່ວປະເທດ ໄດ້ຮ່ວມກັບການຈັດຕັ້ງຕ່າງໆທີ່ກ່ຽວຂ້ອງ ເຮັດການປຸກລະດົມ ແລະ ຮ່ວມຈັດຮັບບໍລິຈາກເລືອດຫຼາຍກວ່າ 1.650 ຄັ້ງ, ເຊິ່ງມີຜູ້ເຂົ້າບໍລິຈາກເລືອດ 96.845 ຄົນ ແລະ ໄດ້ຮັບເລືອດຕົວຈິງ 55.405 ຖົງ ໂດຍສະເພາະ ປີ 2020 ນີ້ ເປົ້າໝາຍໃຫ້ໄດ້ 60.700 ຖົງ, ດັ່ງນັ້ນ ຈຶ່ງຮຽກຮ້ອງປະຊາຊົນລາວບັນດາ ເຜົ່າໃນຂອບເຂດທົ່ວປະເທດ ຈົ່ງສືບຕໍ່ ປະກອບສ່ວນ ບໍລິຈາກເລືອດຊ່ວຍເຫຼືອສັງຄົມ ເພື່ອໃຊ້ເຂົ້າໃນການຮັກສາ ຄົນເຈັບ ແລະ ຜູ້ຕ້ອງການ ເລືອດ ເພື່ອຊ່ວຍຊີວິດຂອງ ເຂົາເຈົ້າ.
ທຸກໆປີ ຢູ່ປະເທດຕ່າງໆໃນ ທົ່ວໂລກ ໄດ້ພ້ອມກັນຈັດ ຕັ້ງສະເຫຼີມສະຫຼອງວັນຜູ້ບໍລິຈາກເລືອດໂລກ ເພື່ອເປັນການສະແດງຄວາມຂອບໃຈ ຕໍ່ຜູ້ບໍລິຈາກເລືອດ ເພື່ອຊ່ວຍເຫຼືອຄົນເຈັບ ເຊິ່ງເລືອດ ແລະ ຜະລິດຕະພັນເລືອດທີ່ໄດ້ຮັບບໍລິຈາກ ໃນແຕ່ລະປີຢູ່ທົ່ວໂລກ ສາມາດຊ່ວຍຊີວິດຄົນເຈັບໄດ້ຫລາຍລ້ານຄົນ.
ຂ່າວ: ວຽງຈັນທາຍ
