ກະຊວງສາທາລະນະສຸກໃຫ້ຮູ້ວ່າ: ໃນໄລຍະທີ່ມີການລະບາດຂອງພະຍາດໂຄວິດ-19, ທຸກຄົນຕ້ອງໄດ້ມີສະຕິຕື່ນຕົວຊ່ວຍກັນ, ຢຸດການເດີນທາງໄປມາຊຸມແຊວຕ່າງໆໄວ້ກ່ອນ ແລະ ຫາກທ່ານພົບວ່າຕົນເອງໄດ້ເດີນທາງໄປຈຸດສ່ຽງ ຫຼື ສໍາຜັດໃກ້ຊິດກັບຜູ້ຕິດເຊື້ອແລ້ວມີອາການ ຕ້ອງຮີບຮ້ອນເຂົ້າໄປຮັບການກວດຫາເຊື້ອພະຍາດທັນທີ, ສໍາລັບໃຜທີ່ໄດ້ໄປກວດແລ້ວ ກໍ່ຕ້ອງໄດ້ສືບຕໍ່ຈໍາກັດບໍລິເວນຕົນເອງໃຫ້ຄົບ 14 ມື້ ເຖິງວ່າຜົນກວດຈະອອກມາເປັນລົບກໍ່ຕາມ.
ການແຜ່ລະບາດຂອງພະຍາດໂຄວິດ-19 ຮອດປັດຈຸບັນ ໃນໂລກຍັງໜ້າເປັນຫ່ວງເຖິງແມ່ນວ່າຫຼາຍປະເທດຈະມີການຜະລິດ ວັກຊີນປ້ອງກັນພະຍາດດັ່ງກ່າວ ແລະ ມີການສັກໃຫ້ປະຊາຊົນແລ້ວກໍ່ຕາມແຕ່ຕົວເລກຜູ້ຕິດເຊື້ອ ແລະ ຜູ້ເສຍຊີວິດຈາກພະຍາດດັ່ງກ່າວນີ້ຍັງເພີ່ມຂຶ້ນໃນແຕ່ວັນໂດຍສະເພາະຢູ່ປະເທດສະຫະລັດອາເມລິກາ, ອີນເດຍ ແລະ ບຣາຊິນ.
ສະເພາະຢູ່ບັນດາປະເທດອ້ອມຂ້າງ ສປປ ລາວໄດ້ມີການແຜ່ລະບາດຂອງພະຍາດໂຄວິດ-19 ຮອບໃໝ່ໂດຍສະເພາະຢູ່ປະເທດໄທ, ກຳປູເຈຍ, ມຽນມາ, ຫວຽດນາມ ແລະ ສປ ຈີນ ຊຶ່ງການພົບຜູ້ຕິດເຊື້ອເພີ່ມຂຶ້ນໃນແຕ່ລະວັນຢູ່ບັນດາປະເທດດັ່ງກ່າວໄດ້ສ້າງຄວາມກັງວົນໃຫ້ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂອງລາວຍ້ອນວ່າຍັງພົບຜູ້ຕິດເຊື້ອຈາກແຮງງານລາວທີ່ກັບຄືນປະເທດ ແລະ ຍ້ອນອາດຈະມີແຮງງານລາວຜູ້ຕິດເຊື້ອລັກລອບກັບຄືນປະເທດແບບຜິດກົດໝາຍມາແຜ່ເຊື້ອໃນຊຸມຊົນໂດຍບໍ່ຮູ້ຕົວ.
ສະເພາະເຂດບ້ານແດງ ຢູ່ ນະຄອນຫຼວງວຽງຈັນ ຊຶ່ງເປັນເຂດລະວັງສູງສຸດໃນການປ້ອງກັນພະຍາດໂຄວິດ-19 ຮອດວັນທີ 28 ພຶດສະພາ 2021 ນີ້ ມີແລ້ວ 25 ບ້ານຢູ່ 7 ເມືອງ.
