ລັດຖະບານລາວກຽມສະໜອງພະລັງງານໄຟຟ້າ ໃຫ້ບັນດາແຂວງພາກເໜືອຕື່ມອີກ ໂດຍມີແຜນທີ່ຈະສ້າງສະຖານນີສາຍສົ່ງ 10 ສະຖານນີ ນັບແຕ່ປີນີ້ ຫາ ປີ 2025.
ປະຈຸບັນລັດເຫັນວ່າບັນດາແຂວງທີ່ຢູ່ພາກເໜືອ ນັ້ນມີຄວາມຕ້ອງການພະລັງງານໄຟຟ້າ 1,800 – 2,000 ເມກາວັດ ເຊິ່ງບໍ່ລວມເຖິງເຂດພັດທະນາ ສະມາດຊີຕີ ທີ່ຢູ່ສອງແຂວງຄື ແຂວງອຸດົມໄຊ ແລະ ແຂວງຫຼວງນ້ຳທາ. ຄວາມຕ້ອງໄຟຟ້າຢູ່ເຂດພັດທະນາດັ່ງກ່າວນັ້ນເຖິງ 300-1.000 ເມກາວັດ, ລວມໄປເຖິງບັນດາຫຼາຍໆ ກິດຈະກຳທີ່ຕ້ອງການພະລັງງານໄຟຟ້າເຊັ່ນ: ເຂດເສດຖະກິດດອກງິ້ວຄຳ, ເຂດເສດຖະກິດ ບໍ່ເຕັນແດນຄຳ, ແຫຼ່ງທ່ອງທ່ຽວຕ່າງໆທີ່ເກີດ ຂຶ້ນຢ່າງຫຼວງຫຼາຍ ໂດຍປີ 2025 ທົ່ວປະເທດມີຄວາມຕ້ອງການພະລັງງານໄຟຟ້າສູງເຖິງ 3,000 – 4,000 ເມກາວັດ.
ທ່ານ ຄຳມະນີ ອິນທິລາດ ລັດຖະມົນຕີ ກະຊວງພະລັງງານ ແລະ ບໍ່ແຮ່ ໄດ້ກ່າວໃນບໍ່ດົນມານີ້ວ່າ : ການທີ່ຈະສະໜອງໄຟຟ້າໃຫ້ພຽງພໍ ຢູ່ເຂດພາກ ເໜືອ ຈຳເປັນຕ້ອງໄດ້ສ້າງສະຖານີສາຍສົ່ງໃໝ່ ອີກ 10 ສະຖານີ, ຈັດສັນສາຍສົ່ງໃຫ້ເປັນລະບົບ ແລະ ຕ້ອງມີການຜະລິດໄຟຟ້າຈາກຫຼາຍຊ່ອງທາງ ບໍ່ວ່າຈະເປັນ ພະລັງ ງານນ້ຳ, ຖ່ານຫີນ, ໂຊຊລາ ລົມ ແລະ ພະລັງງານຈາກແຫຼ່ງອື່ນໆ.
ປັດຈຸບັນ ມີແຫຼ່ງຜະລິດໄຟຟ້າທັງໝົດ 73 ແຫ່ງ ທີ່ມີກຳລັງຕິດຕັ້ງ 9,531 ເມກາວັດ ສາມາດຜະລິດ ພະລັງງານໄຟຟ້າໄດ້ ຫຼາຍກວ່າ 50,000 ລ້ານ ກິໂລວັດໂມງ, ໃນນີ້ ໄດ້ສົ່ງຂາຍໃຫ້ຕ່າງປະເທດ 6,000 ເມກາວັດ ນອກຈາກເຫຼືອນັ້ນແມ່ນຊົມໃຊ້ ພາຍໃນປະເທດ.
ຂ່າວ : ວຽງຈັນທາຍ
