ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ -19 (COVID-19) ໄດ້ອອກແຈ້ງການ ໃນມື້ວັນທີ 2 ມີນາ 2020 ນີ້ ເຖິງອໍານາດການປົກຄອງທ້ອງຖິ່ນທຸກພາກສ່ວນ ແລະ ປະຊາຊົນບັນດາເຜົ່າໃນຂອບເຂດທົ່ວປະເທດ ໃຫ້ໂຈະ, ເລື່ອນຊົ່ວຄາວ ແລະ ຈໍາກັດຜູ້ເຂົ້າຮ່ວມການຈັດງານປະເພນີ, ງານສັງສັນ ແລະ ກິດຈະກໍາຕ່າງໆທີ່ມີຈໍານວນຄົນເຂົ້າຮ່ວມຫຼາຍລວມທັງການຈັດກິລາແຂ່ງຂັນຕ່າງໆອອກໄປກ່ອນ.
ແຈ້ງການໄດ້ລະບຸໄວ້ຕື່ມອີກວ່າ: ຖ້າມີຄວາມຈໍາເປັນທີ່ຈະຕ້ອງຈັດງານແມ່ນຕ້ອງໃຫ້ຄະນະຮັບຜິດຊອບ ຫຼື ເຈົ້າພາບປະຕິບັດມາດຕະການການປ້ອງກັນການຕິດເຊື້ອພະຍາດດັ່ງກ່າວ ໂດຍຕ້ອງມີການກວດອຸນຫະພູມ, ຖ້າພົບເຫັນຜູ້ໃດມີອາການໄຂ້, ໄອ ຫຼື ຫາຍໃຈຍາກທີ່ເຂົ້າຄ່າຍກັບນິຍາມຂອງພະຍາດ ໂຄວິດ -19 ແມ່ນບໍ່ໃຫ້ອະນຸຍາດເຂົ້າຮ່ວມງານຢ່າງເດັດຂາດ.
ຂ່າວ: ວຽງຈັນທາຍ
ພາບ ປະກອບ
