ບໍລິສັດ ລາວໂທລະຄົມມະນາຄົມ ມະຫາຊົນ ໄດ້ໃຫ້ການສະໜັບສະໜູນດ້ານໂທລະຄົມ ເພື່ອທໍາການຖ່າຍທອດສົດການແຂ່ງຂັນບານເຕະ ໃຫ້ກັບສະຫະພັນບານເຕະແຫ່ງຊາດລາວ ໄລຍະເວລາ 3 ປີ.
ພິທີເຊັນສັນຍາການສະໜັບສະໜູນດ້ານໂທລະຄົມ ຄັ້ງນີ້ ໄດ້ຈັດຂຶ້ນໃນວັນທີ 14 ສິງຫາ 2025 ທີ່ນະຄອນຫຼວງວຽງຈັນ ລະຫວ່າງ ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ແລະ ທ່ານ ລັດຖະປັນຍາ ຂຽວວົງພະຈັນ ຮອງຜູ້ອຳນວຍການໃຫຍ່ ຂະແໜງເຕັກນິກ ປະທານກິລາ ບໍລິສັດ ລາວໂທລະຄົມມະນາຄົມ ມະຫາຊົນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ໄດ້ກ່າວວ່າ: ຖືເປັນວາລະໂອກາດອັນດີ ທີ່ ສຕລ ແລະ ບໍລິສັດ ລາວໂທລະຄົມມະນາຄົມ ມະຫາຊົນ ໄດ້ເພີ່ມທະວີການຮ່ວມມືກັນທັງສອງຝ່າຍ ຊຶ່ງໄດ້ສະແດງ ໃຫ້ເຫັນເຖິງຄວາມມຸ້ງໝັ້ນປາດຖະໜາ ທີ່ຈະພັດທະນາກິລາບານເຕະ ໃນສປປ ລາວ, ດ້ວຍການສືບຕໍ່ເຊັນສັນຍາສະໜັບສະໜູນດ້ານໂທລະຄົມ ເປັນໄລຍະເວລາ 3 ປີ, ຊຶ່ງຈຸດປະສົງຂອງການສະໜັບສະໜູນດ້ານໂທລະຄົມຄັ້ງນີ້ ເພື່ອໃຫ້ ສະຫະພັນບານເຕະແຫ່ງຊາດລາວ ໄດ້ນໍາໃຊ້ເຂົ້າໃນວຽກງານຖ່າຍທອດສົດການແຂ່ງຂັນບານເຕະ ທັງພາຍໃນປະເທດ ແລະ ການແຂ່ງຂັນລະດັບສາກົນ ທີ່ທາງສະຫະພັນບານເຕະແຫ່ງຊາດລາວ ໄດ້ຮັບກຽດເປັນເຈົ້າພາບຈັດການແຂ່ງຂັນຢູ່ ສປປ ລາວ.
ພ້ອມນັ້ນ, ທ່ານ ລັດຖະປັນຍາ ຂຽວວົງພະຈັນ ກໍໄດ້ກ່າວວ່າ: ການເຊັນສັນຍາ ລະຫວ່າງ ສະຫະພັນບານເຕະແຫ່ງຊາດລາວ ແລະ ບໍລິສັດ ລາວໂທລະຄົມ ມະຫາຊົນ ແມ່ນເປັນການສະໜັບສະໜູນດ້ານພື້ນຖານໂຄງລ່າງດ້ານໂທລະຄົມມະນາຄົມ ເພື່ອພັດທະນາກິລາ ໂດຍສະເພາະການຖ່າຍທອດສົດ ງານແຂ່ງຂັນຕ່າງໆ ໃນໄລຍະ 3 ປີ ຊຶ່ງລາວໂທລະຄົມ ແມ່ນຈະໄດ້ໃຫ້ບໍລິການທາງດ້ານອິນເຕີເນັດຄວາມໄວສູງ INTERNET LEASED LINE ທຸກສະໜາມທີ່ມີການແຂ່ງຂັນ, ນອກຈາກນັ້ນ ລາວໂທລະຄົມ ກໍຍັງມີລາງວັນພິເສດກັບນັກກິລາ ທີ່ມີຜົນງານດີເດັ່ນໃນແຕ່ລະນັດອີກດ້ວຍ ຊຶ່ງຈະເປັນຜະລິດຕະພັນຂອງລາວໂທລະຄົມ ເພື່ອເຮັດໃຫ້ນັກກິລາມີກຳລັງໃຈ ເພື່ອພັດທະນາຕົນເອງ ກ້າວສູ່ລະດັບສາກົນ.
ທີ່ມາ: ສຕລ
