ລາວ ແລະ ລັດເຊຍ ໄດ້ເປັນເອກະພາບກັນກ່ຽວກັບທິດທາງເພື່ອສືບຕໍ່ຊຸກຍູ້ການຮ່ວມມືຂອງບັນດາຂະແໜງການໃຫ້ຫຼາຍຂຶ້ນກ່ວາເກົ່າ, ໃນນັ້ນສຳຄັນແມ່ນຂົງເຂດເສດຖະກິດ-ການຄ້າ ແລະ ການລົງທຶນ.
ພ້ອມກັນນັ້ນ ກໍ່ເພີ່ມທະວີຊຸກຍູ້ການແລກປ່ຽນທາງດ້ານວັດທະນາທຳ-ສັງຄົມ, ການທ່ອງທ່ຽວ ແລະ ການໄປມາຫາສູ່ຂອງປະຊາຊົນສອງຊາດ.
ອີງຕາມແຫຼ່ງຂ່າວຈາກກະຊວງການຕ່າງປະ ເທດໄດ້ລາຍງານໃຫ້ຮູ້ວ່າ: ໃນວັນທີ 3-4 ມີນາ 2020 ທີ່ນະຄອນຫຼວງມົດສະກູ ໄດ້ຈັດກອງປະຊຸມປຶກສາຫາລືດ້ານການເມືອງ ລະຫວ່າງ ກະຊວງການຕ່າງປະເທດລາວ ແລະ ລັດເຊຍ, ຊຶ່ງຄະນະຜູ້ແທນຝ່າຍລາວ ນໍາໂດຍ ທ່ານ ທອງສະຫວັນ ພົມວິຫານ ຮອງລັດຖະມົນຕີກະຊວງການຕ່າງປະເທດ ແລະ ຄະນະຜູ້ແທນຝ່າຍລັດເຊຍ ນໍາໂດຍ ທ່ານ ອີກໍຣ ມາກູລົບ (Igor Mogulov) ຮອງລັດຖະມົນຕີກະຊວງການຕ່າງປະເທດ.
ໃນກອງປະຊຸມຄັ້ງນີ້, ສອງຝ່າຍໄດ້ປຶກສາຫາລື ແລະ ລົງເລິກແລກປ່ຽນບັນຫາການພົວພັນຮ່ວມມືສອງຝ່າຍຢ່າງຮອບດ້ານ ແລະ ຕີລາຄາການພົວພັນ ລາວ-ລັດເຊຍ ໃນໄລຍະ ຜ່ານມາ ເຫັນວ່າມີທ່າອ່ຽງຂະຫຍາຍຕົວດີໃນທຸກດ້ານ, ຊຶ່ງໃນນັ້ນອັນພົ້ນເດັ່ນແມ່ນການແລກປ່ຽນການຢ້ຽມຢາມຂອງຄະນະຜູ້ແທນຂອງບັນດາຂະແໜງການຕ່າງໆ, ການຮ່ວມ ມືໃນຂົງເຂດເຕັກນິກການທະຫານ, ການເກັບກູ້ລະເບີດທີ່ຍັງບໍ່ທັນແຕກຢູ່ລາວ, ການສ້າງຊັບພະຍາກອນມະນຸດ, ວຽກງານດ້ານມະນຸດສະທຳ, ດ້ານນິຕິກໍາ, ພະລັງງານ ແລະ ການຮ່ວມມືດ້ານວຽກງານສື່ມວນຊົນ.
ພ້ອມກັນນັ້ນ ຍັງໄດ້ແລກປ່ຽນທັດສະນະຮ່ວມກັນກ່ຽວກັບບັນຫາສາກົນທີ່ພົ້ນເດັ່ນ, ທີ່ຕ່າງຝ່າຍມີຄວາມສົນໃຈໃນຂອບການຮ່ວມມື ອາຊຽນ, ສະຫະປະຊາຊາດ ແລະ ການແຜ່ລະບາດຂອງພະຍາດໂຄວິດ-19.
ສອງຝ່າຍເຫັນວ່າ ໃນປີ 2020 ເປັນປີທີ່ມີຄວາມໝາຍສໍາຄັນ ຕໍ່ການພົວພັນຮ່ວມມື ລາວ-ລັດເຊຍ ໂດຍສະເພາະການກະກຽມສະເຫຼີມສະຫຼອງ 60 ປີ ສ້າງຕັ້ງສາຍພົວພັນການທູດ ແລະ ວັນສ້າງຕັ້ງສະມາຄົມມິດຕະພາບ ລັດເຊຍ-ລາວ, ລາວ-ລັດເຊຍ ຄົບຮອບ 55 ປີ, ລວມທັງການກະກຽມເຂົ້າຮ່ວມການສະເຫຼີມສະຫຼອງ 75 ປີ ແຫ່ງໄຊຊະນະປົກປ້ອງປິຕຸພູມ, ຊຶ່ງຈະຈັດຂຶ້ນໃນ ວັນທີ 9 ພຶດສະພາ 2020 ທີ່ນະຄອນຫຼວງມົດສະກູ.
ຂ່າວ: ວຽງຈັນທາຍ
ພາບ: ກະຊວງການຕ່າງປະເທດ ແຫ່ງ ສປປ ລາວ
