ສປປ ລາວ ຍົກລະດັບລະບົບແກ້ໄຂຂໍ້ຂັດແຍ່ງ ຊື້ຂາຍສິນຄ້າອອນລາຍ 

ສປປ ລາວ ພວມເພີ່ມທະວີຄວາມພະຍາຍາມ ໃນການ ສ້າງຄວາມເຂັ້ມແຂງໃຫ້ແກ່ການແກ້ໄຂຂໍ້ຂັດແຍ່ງທີ່ເກີດຂຶ້ນໃນການຄ້າທາງອີເລັກໂທຣນິກ, ໂດຍຜ່ານການ ນຳໃຊ້ລະບົບອອນລາຍທີ່ຖືກອອກແບບມາເພື່ອປົກປ້ອງຜູ້ບໍລິໂພກ ແລະ ສ້າງຄວາມໄວ້ວາງໃຈໃນຕະຫຼາດ ດີຈິຕອນທີ່ເຕີບໂຕຢ່າງວ່ອງໄວ.

ຂໍ້ລິເລີ່ມນີ້ໄດ້ຮັບການສະໜັບສະໜູນຈາກກອງທຶນພາກພື້ນເພື່ອການຄ້າເພື່ອການພັດທະນາ (RT4D), ເຊິ່ງເປັນການຕອບສະໜອງຕໍ່ຈຳນວນຄຳຮ້ອງທຸກຂອງຜູ້ບໍລິໂພກທີ່ເພີ່ມຂຶ້ນເຊິ່ງກ່ຽວຂ້ອງກັບການຄ້າອອນລາຍ, ລວມທັງການສໍ້ໂກງ ແລະ ສິນຄ້າທີ່ບໍ່ກົງປົກ.

ໂດຍກອງປະຊຸມປິດໂຄງການເພື່ອລາຍງານທົບທວນກ່ຽວກັບຄວາມຄືບໜ້າທີ່ໄດ້ຮັບມາເຖິງປັດຈຸບັນໄດ້ຈັດຂຶ້ນທີ່ນະຄອນຫຼວງວຽງຈັນໃນວັນອັງຄານທີ່ຜ່ານມາ.

ກ່າວຄຳເຫັນໃນກອງປະຊຸມ, ທ່ານ ສັນຕິສຸກ ພູນສະຫວັດ, ຫົວໜ້າກົມການຄ້າພາຍໃນ, ກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ການຄ້າທາງອີເລັກໂທຣນິກແມ່ນປັດໄຈສຳຄັນໃນການຂັບເຄື່ອນການເຕີບໂຕທາງດ້ານເສດຖະກິດ, ເຊິ່ງຊ່ວຍໃຫ້ທຸລະກິດເຂົ້າເຖິງຕະຫຼາດທີ່ກວ້າງຂວາງຂຶ້ນ ແລະ ພ້ອມກັນນັ້ນກໍຍັງສ້າງຄວາມສະດວກ, ຫຼຸດຕົ້ນທຶນ ແລະ ເພີ່ມທາງເລືອກໃຫ້ກັບຜູ້ບໍລິໂພກ. ແຕ່ເມື່ອຕະຫຼາດເຕີບໃຫຍ່ຂຶ້ນ ຄວາມສ່ຽງກໍເພີ່ມຂຶ້ນເຊັ່ນກັນ.

ທ່ານກ່າວວ່າ: “ຄຳຮ້ອງທຸກກຳລັງເພີ່ມຂຶ້ນ, ແຕ່ກົນໄກທີ່ມີຢູ່ຍັງຄົງຊ້າ ຫຼື ມີຂອບເຂດຈຳກັດ. ລະບົບໃໝ່ນີ້ຈະສະໜອງວິທີການແກ້ໄຂຂໍ້ຂັດແຍ່ງທີ່ມີປະສິດທິຜົນກວ່າເກົ່າ ແລະ ປົກປ້ອງສິດທິຂອງຜູ້ບໍລິໂພກ.”

ໃນປີ 2024, ມູນຄ່າການຄ້າທາງອີເລັກໂທຣນິກທົ່ວໂລກບັນລຸເຖິງ 6.33 ພັນຕື້ໂດລາສະຫະລັດ, ເຊິ່ງເປັນການເພີ່ມຂຶ້ນ 89% ຈາກປີ 2019, ເຊິ່ງມູນຄ່າໄດ້ຖືກບັນທຶກໄວ້ທີ່ 3.35 ພັນຕື້ໂດລາສະຫະລັດ.

ກອງປະຊຸມຄັ້ງນີ້ເປັນປະທານຮ່ວມໂດຍທ່ານ ສັນຕິສຸກ ພູນສະຫວັດ, ທ່ານນາງ ສີອານົງ ພົມກອງ, ຜູ້ຈັດການພາກພື້ນຂອງ RT4D ແລະ ທ່ານ Cameron Allan, ຜູ້ຕາງໜ້າຈາກສະຖານທູດອົດສະຕຣາລີປະຈໍາ ສປປ ລາວ. ບັນດາຜູ້ຕາງໜ້າຈາກອົງການຂອງລັດຖະບານ, ທຸລະກິດພາກເອກະຊົນ, ຄູ່ຮ່ວມພັດທະນາ ແລະ ພາກສ່ວນສັງຄົມພົນລະເຮືອນໄດ້ເຂົ້າຮ່ວມ.

ເປົ້າໝາຍຂອງໂຄງການນີ້ແມ່ນເພື່ອພັດທະນາລະບົບອອນລາຍສໍາລັບການຮັບຄຳຮ້ອງທຸກ ແລະ ແກ້ໄຂຂໍ້ຂັດ ແຍ່ງທີ່ກ່ຽວຂ້ອງກັບການຄ້າທາງອີເລັກໂທຣນິກ.

ຈຸດປະສົງຫຼັກແມ່ນເພື່ອຮັບປະກັນການແກ້ໄຂບັນຫາຢ່າງມີປະສິດທິພາບ, ເພີ່ມຄວາມເຊື່ອໝັ້ນໃຫ້ແກ່ຜູ້ບໍລິໂພກ ແລະ ສະໜັບສະໜູນວິສາຫະກິດຂະໜາດນ້ອຍ, ຂະໜາດກາງ ແລະ ຂະໜາດຍ່ອຍ, ໂດຍສະເພາະວິສາຫະກິດທີ່ນໍາພາໂດຍແມ່ຍິງ.

ຜົນທີ່ຄາດວ່າຈະໄດ້ຮັບປະກອບມີ: ການເຂົ້າເຖິງຂໍ້ມູນກ່ຽວກັບການຄ້າອອນລາຍ ແລະ ລະບຽບການທີ່ກ່ຽວຂ້ອງໄດ້ດີຂຶ້ນ, ການເສີມສ້າງຄວາມສາມາດໃຫ້ແກ່ບັນດາອົງການທີ່ກ່ຽວຂ້ອງ, ການພັດທະນາຄູ່ມືພາກປະຕິບັດຕົວຈິງ, ແລະ ການປັບປຸງການຮ່ວມມືລະຫວ່າງພາກລັດ ແລະ ພາກເອກະຊົນ.

ຫົວໃຈຫຼັກຂອງຂໍ້ລິເລີ່ມນີ້ແມ່ນລະບົບການແກ້ໄຂຂໍ້ຂັດແຍ່ງອອນລາຍ (Online Dispute Resolution – ODR), ເຊິ່ງເປັນຮູບແບບທີ່ມີການນໍາໃຊ້ແລ້ວໃນຫຼາຍປະເທດ. ກົນໄກນີ້ຈະຊ່ວຍຫຼຸດຜ່ອນຕົ້ນທຶນ, ເລັ່ງການແກ້ໄຂຄຳຮ້ອງທຸກ ແລະ ສ້າງສະພາບແວດລ້ອມທີ່ປອດໄພກວ່າສໍາລັບທັງຜູ້ຊື້ ແລະ ຜູ້ຂາຍ.

ລະບົບ ODR ສໍາລັບ ສປປ ລາວ ຈະອີງໃສ່ຕົວຢ່າງສາກົນທີ່ປະສົບຜົນສໍາເລັດ, ລວມທັງລະບົບທີ່ພັດທະນາໂດຍຄະນະກໍາມະການສະຫະປະຊາຊາດວ່າດ້ວຍກົດໝາຍການຄ້າສາກົນ, Alibaba ແລະ eBay.

ຍຸດທະສາດຂອງລັດຖະບານໃນການພັດທະນາລະບົບ ODR ແມ່ນອີງໃສ່ 4 ເສົາຄ້ຳ: ການພັດທະນາເວທີດີຈິຕອນ, ການປະຕິຮູບກົດໝາຍ ແລະ ລະບຽບການ, ການສ້າງຄວາມເຂັ້ມແຂງໃຫ້ແກ່ອົງກອນ ແລະ ການສ້າງຄວາມເຂັ້ມແຂງໃຫ້ແກ່ຜູ້ບໍລິໂພກ.

ແຜນດັ່ງກ່າວຈະຖືກຈັດຕັ້ງປະຕິບັດເປັນໄລຍະໆ, ເລີ່ມຈາກລະບົບ Trustmark ໃນປີ 2027, ລະບົບ ODR ຂັ້ນພື້ນຖານໃນປີ 2028-2029, ແລະ ການເປີດໂຕລະບົບ ODR ຢ່າງເຕັມຮູບແບບໃນປີ 2030.

ໃນໄລຍະໂຄງການ 4 ເດືອນ, ຜູ້ຊ່ຽວຊານຂອງ RT4D ແລະ ກົມການຄ້າພາຍໃນໄດ້ເຮັດວຽກຮ່ວມກັນຢ່າງໃກ້ຊິດກັບບັນດາກະຊວງ, ຫ້ອງການອຸດສາຫະກຳ ແລະ ການຄ້າແຂວງ, ພາກເອກະຊົນ ແລະ ພາກສັງຄົມພົນລະເຮືອນ.

ໂຄງການໄດ້ສ້າງຜົນສຳເລັດທີ່ສຳຄັນຫຼາຍຢ່າງ, ລວມທັງການແປພາສາລາວຂອງບົດຂໍ້ຂັດແຍ່ງກ່ຽວກັບການຄ້າທາງອີເລັກໂທຣນິກໃນສົນທິສັນຍາຄູ່ຮ່ວມເສດຖະກິດຮອບດ້ານໃນພາກພື້ນ (RCEP), ຄູ່ມື ແລະ ແຜນວຽກສໍາລັບການແກ້ໄຂຂໍ້ຂັດແຍ່ງດ້ານການຄ້າທາງອີເລັກໂທຣນິກ, ການເຂົ້າເຖິງລາຍງານໂຄງການແບບອອນລາຍຟຣີຜ່ານເວັບໄຊຂອງກະຊວງ ແລະ ການປຶກສາຫາລືຢູ່ ນະຄອນຫຼວງວຽງຈັນ, ຫຼວງພະບາງ ແລະ ປາກເຊ ເພື່ອເກັບກໍາຄວາມຄິດເຫັນຈາກອົງການຂອງລັດ, ທຸລະກິດ, ຜູ້ປະກອບການແມ່ຍິງ ແລະ ກຸ່ມຜູ້ພິການ.

ນອກຈາກນັ້ນ ຍັງໄດ້ມີການສ້າງຕັ້ງຄະນະກໍາມະການສະເພາະເພື່ອເບິ່ງແຍງການພັດທະນາກົນໄກການແກ້ໄຂຂໍ້ຂັດແຍ່ງໃນໄລຍະຍາວ.

ທ່ານນາງ ສີອານົງ ພົມກອງ ກ່າວວ່າ: ຄວາມສໍາເລັດຂອງໂຄງການແມ່ນຜົນມາຈາກການຮ່ວມມືທີ່ເຂັ້ມແຂງລະຫວ່າງກະຊວງອຸດສາຫະກຳ ແລະ ການຄ້າ, ຄູ່ຮ່ວມພັດທະນາ ແລະ ຊຸມຊົນລາວ. ທ່ານນາງ ສີອານົງ ກ່າວອີກວ່າ: ກົນໄກການແກ້ໄຂຂໍ້ຂັດແຍ່ງທາງອີເລັກໂທຣນິກທີ່ມີປະສິດທິພາບຈະຊ່ວຍສ້າງຄວາມໄວ້ວາງໃຈ, ປົກປ້ອງຜູ້ບໍລິໂພກ ແລະ ສ້າງຄວາມໝັ້ນໃຈໃຫ້ແກ່ທຸລະກິດໃນເສດຖະກິດດີຈິຕອນ.

ທ່ານ Allan ໄດ້ກ່າວຕື່ມວ່າ: ອົດສະຕຣາລີມຸ່ງໝັ້ນທີ່ຈະສະໜັບສະໜູນ ສປປ ລາວ ໃນການສ້າງຄວາມເຂັ້ມແຂງໃຫ້ແກ່ຂອບເຂດການຄ້າທີ່ກ່ຽວຂ້ອງ ແລະ ຮັບປະກັນວ່າຜົນປະໂຫຍດຂອງການເຕີບໂຕທາງດ້ານດີຈິຕອນຈະໄດ້ຮັບການແບ່ງປັນຢ່າງກວ້າງຂວາງ.

ໃນອະນາຄົດ, ກົມການຄ້າພາຍໃນມີແຜນທີ່ຈະສ້າງເວທີການລາຍງານ ແລະ ການແກ້ໄຂບັນຫາອອນລາຍ ເພື່ອເລັ່ງການແກ້ໄຂຂໍ້ຂັດແຍ່ງ, ຫຼຸດຜ່ອນຕົ້ນທຶນ ແລະ ເພີ່ມຄວາມໂປ່ງໃສ. ນອກຈາກນັ້ນ, ຍັງຈະໃຫ້ຄວາມສໍາຄັນຕໍ່ການສ້າງຄວາມສາມາດໃຫ້ແກ່ເຈົ້າໜ້າທີ່ ແລະ ການສ້າງຄວາມຮັບຮູ້ໃຫ້ແກ່ຜູ້ບໍລິໂພກ ແລະ ທຸລະກິດຂະໜາດນ້ອຍອີກດ້ວຍ.