ຈາກກໍລະນີທີ່ມີຝົນຕົກປານກາງ ຫາໜັກຕິດຕໍ່ກັນຫຼາຍວັນນັບແຕ່ວັນທີ 11 ຫາ 13 ມິຖຸນາ 2021 ຢູ່ເກືອບທຸກແຂວງໃນຂອບເຂດທົ່ວປະເທດ ລວມທັງນະຄອນຫຼວງວຽງຈັນໄດ້ເຮັດໃຫ້ເກີດນ້ຳຖວ້ມຊູກະທັນຫັນເມື່ອວັນທີ 13 ມິຖຸນາ 2021 ທີ່ຜ່ານມາ ຊຶ່ງນ້ຳໄດ້ໄຫຼຖ້ວມເທດສະບານແຂວງບາງແຂວງ, ເນື້ອທີ່ນາ, ສວນຂອງປະຊາຊົນ ແລະ ນ້ຳປ່າໄຫຼຫຼາກພັດເຮືອນປະຊາຊົນຈຳນວນໜຶ່ງ ໂດຍສະເພາະບັນດາບ້ານ ແລະ ເມືອງທີ່ຢູ່ຕິດແຄມແມ່ນ້ຳຕ່າງໆທີ່ເປັນສາຂາຂອງແມ່ນ້ຳງື່ມ ແລະ ແມ່ນ້ຳຂອງ.
ອີງຕາມຂໍ້ມູນເບື້ອງຕົ້ນໃຫ້ຮູ້ວ່າ: ເຂດນ້ຳຖ້ວມກະທັນຫັນດັ່ງກ່າວແມ່ນຢູ່ເມືອງວັງວຽງ ແລະ ເມືອງໂພນໂຮງ ແຂວງວຽງຈັນ, ຢູ່ເມືອງຜາໄຊ ແລະ ເມືອງຄູນ ແຂວງຊຽງຂວາງ, ຢູ່ເມືອງໄຊຍະບູລີ ແຂວງໄຊຍະບູລີ, ເມືອງຜາອຸດົມ ແຂວງບໍ່ແກ້ວ ແຕ່ຍັງບໍ່ທັນມີລາຍງານຜົນເສຍຫາຍຈາກອຳນາດການປົກຄອງຂອງບັນດາເມືອງດັ່ງກ່າວ. ນອກນັ້ນຢູ່ຫຼາຍແຂວງ, ນ້ຳໃນແມ່ນ້ຳຕ່າງໆກໍ່ເລີ່ມມີການຍຶ່ງຂຶ້ນເຊັ່ນກັນໂດຍສະເພາະຢູ່ເມືອງຕ່າງໆຂອງແຂວງສະຫວັນນະເຂດ, ບໍລິຄຳໄຊ, ຄຳມ່ວນ ແລະ ແຂວງອື່ນໆ ແຕ່ຍັງຂຶ້ນບໍ່ເຖິງເຂດອັນຕະລາຍ ເທື່ອ ແຕ່ຖ້າຝົນຍັງສືບຕໍ່ຕົກກໍ່ອາດຈະເກີດນ້ຳຖ້ວມເຊັ່ນກັນ.
ສ່ວນຜົນເສຍຫາຍຂອງການເກີດນ້ຳຖ້ວມດັ່ງກ່າວຈະລາຍງານຕາມພາຍຫຼັງ.
ອີງຕາມແຈ້ງການຂອງກົມອຸຕຸນິຍົມ ແລະ ອຸທົກກະສາດໃຫ້ຮູ້ວ່າ: ຝົນຍັງຈະສືບຕໍ່ຕົກຢູ່ຫຼາຍແຂວງ ຈົນຮອດວັນທີ 14 ມິຖຸນານີ້.
