ບໍລິສັດຄູນມີໄຊກໍ່ສ້າງ ແລະ ສ້ອມແປງຂົວທາງ (KMX) ປະເທດລາວ ແລະ ບໍລິສັດລົງທຶນພະລັງງານເອໂວລູຊັ່ນ (EPIC) ປະເທດສິງກະໂປ ສົນໃຈລົງທຶນສ້າງໂຮງງານຜະລິດໄຟຟ້າ ພະລັງຄວາມຮ້ອນຈາກຖ່ານຫີນ ທີ່ສາມາດຜະລິດໄຟຟ້າໄດ້ຂະໜາດ 1.000 ເມກາວັດ ຢູ່ ເມືອງດາກຈຶງ ແຂວງເຊກອງ ເພື່ອສົ່ງອອກໄປປະເທດໄທ, ຫວຽດນາມ, ກໍາປູເຈຍ ແລະ ສະໜອງໃຫ້ພາຍໃນ.
ປັດຈຸບັນນີ້ ສອງບໍລິສັດດັ່ງກ່າວໄດ້ຮ່ວມມືກັນໃນການສຶກສາຄວາມເປັນໄປ ໂດຍສະເພາະດ້ານເສດຖະກິດ-ສັງຄົມ ແລະ ສິ່ງແວດລ້ອມ ຖ້າສໍາເລັດການສໍາຫຼວດໃນດ້ານຕ່າງໆ ຈະສົ່ງຜົນການສໍາຫຼວດ ບໍ່ວ່າຈະເປັນດ້ານບວກ ຫຼື ດ້ານລົບໃຫ້ລັດຖະບານເພື່ອພິຈາລະນາ ແລະ ຖ້າລັດຖະບານອະນຸຍາດໃຫ້ມີການກໍ່ສ້າງໂຮງງານດັ່ງກ່າວ ສອງບໍລິສັດຈະມີການລົງທຶນຫຼາຍກວ່າ 15 ຕື້ກີບ (1,7 ຕື້ໂດລາ) ແລະ ຄາດວ່າຈະມີການສ້າງໃຫ້ສໍາເລັດໃນປີ 2027.
ພິທີເຊັນສັນຍາກ່ຽວກັບການເລີ່ມສຶກສາຄວາມເປັນໄປໄດ້ຂອງໂຄງການດັ່ງກ່າວໄດ້ຈັດຂຶ້ນໃນບໍ່ດົນມານີ້ ຢູ່ກະຊວງແຜນການ ແລະ ການລົງທຶນ ໂດຍການເຂົ້າຮ່ວມຂອງ ທ່ານ ນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ຈັນສອນ ແສນບຸດຕະລາດ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ຄຳຕັນ ພົມມະທັດ ຮອງປະທານ KMX ຕາງໜ້າໃຫ້ບໍລິສັດຮ່ວມທຶນ EPIC-KMX.
ຂ່າວ: ວຽງຈັນທາຍ
ພາບ: ສະບາໄພ
