ລູກເຂີຍຊື່ທ້າວຄົດ ອາຊີບທະຫານ ມາເປັນເຂີຍຢູ່ບ້ານໂຕນໃຕ້ ເມືອງແປກ ແຂວງຊຽງຂວາງໄດ້ໃຊ້ປືນຍິງພໍ່ເຖົ້າ, ແມ່ເຖົ້າ, ລູກ ແລະ ຕົວເອງເສຍຊີວິດຄາທີ່ ສ່ວນແມ່ຕູ້ໄດ້ຮັບບາດເຈັບໄດ້ນໍາຕົວໄປປິ່ນປົວຢູ່ໂຮງໝໍແຂວງ ແຕ່ເສຍຊີວິດໃນເວລາຕໍ່ມາ ຊຶ່ງເຫດການດັ່ງກ່າວເກີດຂຶ້ນເມື່ອວັນທີ 15 ກໍລະກົດ 2025 ທີ່ຜ່ານມານີ້ຢູ່ບ້ານໂຕນໃຕ້ ເມືອງແປກ ແຂວງຊຽງຂວາງ ລວມມີຜູ້ ເສຍຊີວິດ 5 ຄົນ.
ສາເຫດໃນການຄາດຕະກໍາດັ່ງກ່າວຍ້ອນເມຍຜູ້ກ່ຽວໄດ້ແຊເນື້ອຫາຈາກເພຈໜຶ່ງ ມາລົງເຟດບຸກຂອງຕົນເອງ ເຊີ່ງມີເນື້ອໃນຂຽນວ່າ: “ຜົວທີ່ບໍ່ຫຼິ້ນ ໃຊ້ເວລາກັບຄອບຄົວ ຊ່ວຍເມຍເຮັດວຽກເຮືອນ ບໍ່ຕິດເຫຼົ້າຕິດໄພ້ ຜົວດີໆແບບນີ້ຍັງມີຢູ່ບໍ?” ໄດ້ເຮັດໃຫ້ຜູ້ເປັນຜົວນ້ອຍໃຈຈຶ່ງກໍ່ເຫດໃນຄັ້ງນີ້.
ຜູ້ເສຍຊີວິດ 5 ຄົນປະກອບມີ ທ້າວກິແກ້ວ (ພໍ່ເຖົ້າ) ອາຍຸ 62 ປີ, ນາງທຸມມາ (ແມ່ເຖົ້າ) ອາຍຸ 52 ປີ ແລະ ນາງຕາມົນ (ລູກສາວ) ອາຍຸ 5 ປີ ແລະ ທ້າວຄົດ ອາຍຸ 36 ປີ ຜູ້ກໍ່ເຫດ ແລະ ນາງສີດາ (ແມ່ຕູ້) ອາຍຸ 85 ປີ.
ນາງ ເປ ຜູ້ເປັນເມຍໄດ້ແຈ້ງໃຫ້ຮູ້ວ່າ: ໄດ້ສ້າງຄອບຄົວກັບທ້າວຄົດ ໃນປີ 2016 ແລະ ມີລູກນໍາກັນ 2 ຄົນ, ກ່ອນມື້ເກີດເຫດຕົນເອງໄດ້ແຊເນື້ອຫາຈາກເພຈໜຶ່ງ ມາລົງເຟດບຸກຂອງຕົນເອງ ເຊີ່ງມີເນື້ອໃນຂຽນວ່າ: “ຜົວທີ່ບໍ່ຫຼິ້ນ ໃຊ້ເວລາກັບຄອບຄົວ ຊ່ວຍເມຍເຮັດວຽກເຮືອນ ບໍ່ຕິດເຫຼົ້າຕິດໄພ້ ຜົວດີໆແບບນີ້ຍັງມີຢູ່ບໍ?”. ຫຼັງຈາກນັ້ນຜູ້ເປັນຜົວໄດ້ເຫັນເມຍແຊລົງເຟສເຮັດໃຫ້ຜູ້ກ່ຽວບໍ່ພໍໃຈ.
ມາຮອດເວລາ 15:00 ໂມງ ຜູ້ເປັນຜົວໄດ້ໂທຫາເມຍ ເວົ້າວ່າ ເຈົ້າຄິດດີແລ້ວບໍ ທີ່ແຊໂພສດັ່ງກ່າວລົງເຟສບຸກ, ຮອດເວລາ 17:00 ໂມງ ຜູ້ກ່ຽວໄດ້ກັບມາຮອດເຮືອນ ຫຼັງຈາກນັ້ນທັງສອງໄດ້ຜິດຖຽງກັນ, ຜູ້ເປັນແມ່ເຖົ້າໄດ້ມາຫ້າມ ແຕ່ທ້າວຄົດໄດ້ຊີ້ໜ້າແມ່ເຖົ້າພ້ອມທັງເວົ້າວ່າ ເຈົ້າບໍ່ຕ້ອງມາຫຍຸ້ງ ບໍ່ແມ່ນເລື່ອງຂອງເຈົ້າ, ຜູ້ເປັນແມ່ເຖົ້າເວົ້າວ່າ ເຈົ້າເຮັດແບບນີ້ຂ້ອຍກໍບໍ່ພໍໃຈ ໃຫ້ບອກພີ່ນ້ອງມາລົມກັນ. ຈາກນັ້ນ, ທ້າວຄົດໄດ້ຂີ່ລົດຈັກອອກເຮືອນໄປ ມາຮອດ 22:00 ຈຶ່ງກັບມານອນຢູ່ເຮືອນ.
ຮອດເວລາ 04:00 ໂມງເຊົ້າ ຂອງວັນທີ 15 ກໍລະກົດ 2025 ທ້າວຄົດໄດ້ເວົ້າໃຫ້ເມຍອີກວ່າ ມຶງແຊເນື້ອຫາແບບນີ້ເຮັດໃຫ້ກູເສຍຫາຍ ກູຊິເຮັດໃຫ້ມຶງເສຍໃຈໄປຕະຫຼອດຊີວິດ, ຈາກນັ້ນ ຮອດເວລາ 7:00 ໂມງ ທ້າວຄົດໄດ້ເອົາງົວໄປກິນຫຍ້າແລ້ວກັບມາເຮືອນ. ໃນຕອນເຊົ້າເຫັນແມ່ຕູ້ນັ່ງຢູ່ທາງເຂົ້າປະຕູເຮືອນ, ແມ່ເຖົ້ານັ່ງຢູ່ລະບຽງເຮືອນ ແລະ ພໍ່ເຖົ້າກໍາລັງຈູງລົດຈັກອອກຈາກປະຕູຮົ້ວ ທ້າວຄົດຈຶ່ງໄດ້ເຂົ້າໄປໃນເຮືອນ ແລ້ວຈັບເອົາປືນຂອງພໍ່ເຖົ້າ ມາຍິງໃສ່ແມ່ຕູ້, ຍິງໃສ່ແມ່ເຖົ້າ, ຍິງໃສ່ພໍ່ເຖົ້າ ຍິງໃສ່ລູກ ພ້ອມທັງຍິງໃສ່ແມ່ເຖົ້າອີກ 1 ນັດ ແລະ ພໍ່ເຖົ້າອີກ 1 ນັດ ແລ້ວຈັບປືນຍ່າງມາຫາເມຍແລ້ວເວົ້າວ່າ: ກູບໍ່ຍິງມຶງດອກ ປະໄວ້ໃຫ້ມຶງດູແລລູກ.
ຫຼັງຈາກນັ້ນ, ໄດ້ຈັບປືນຫຼົບໜີເຂົ້າປ່າ ຜູ້ກ່ຽວຍັງໄດ້ໄລ້ສົດລົງເຟສບຸກຕົນເອງ ແລະ ສາລະພາບ ຄວາມຜິດຕໍ່ຄອບຄົວ, ຈາກນັ້ນປະມານ 30 ນາທີ, ໄດ້ຍິນສຽງປືນແຕກດັງ 2 ນັດ ຢູ່ແຖວປ່າຊ້າບ້ານໂຕນໃຕ້ ເມືອງແປກ, ເຈົ້າໜ້າທີ່ຈຶ່ງເຂົ້າໄປໃນປ່າພົບເຫັນ ຜູ້ກ່ຽວນອນເສຍຊີວິດ.
ທີ່ມາ: ປກສ ແຂວງຊຽງຂວາງ
