ມີຜູ້ເສຍຊີວິດ 4 ຄົນ, ຫາຍສາບສູນ 3 ຄົນ ແລະ ບາດເຈັບ 1 ຄົນ ເມືອງຊຽງເງິນ, ແຂວງຫຼວງພະບາງ ໃນເວລາປະມານ 8 ໂມງເຊົ້າຂອງວັນທີ 24 ເມສາ 2020 ເນື່ອງຈາກຝົນຕົກໜັກ ຫຼາຍຊົ່ວໂມງຕິດຕໍ່ກັນ.
ທ່ານ ພັນຕີ ວຽງເພັດ ພັນທະວົງ ນັກຂ່າວ ທີ່ປະຈຳຢູ່ກອງບັນຊາການທະຫານເມືອງຊຽງເງິນ ແຂວງຫຼວງພະບາງ ໄດ້ລາຍງານໃຫ້ຮູ້ວ່າ: ປະຊາຊົນບ້ານກີ່ວຕະລຸ່ນ 1 ເຂດ ກີ່ວກະຈຳ, ເມືອງຊຽງເງິນ, ແຂວງຫຼວງພະບາງ ເສຍຊີວິດຍ້ອນນ້ຳປ່າໄຫຼແຮງພັດຊຸ ເອົາປະຊາຊົນທີ່ພັກຢູ່ຕູບໄຮ່ ຈຳນວນ 2 ຄອບຄົວ ລວມມີ 10 ຄົນ ທີ່ໄປນອນໄຮ່ ຖືກນ້ຳປ່າໄຫຼຊຸພັດເອົາຈຶ່ງເກີດເຫດສູນເສຍດັ່ງກ່າວ.
ເຫດດັ່ງກ່າວເຮັດໃຫ້ມີຜູ້ບາດເຈັບ 1 ຄົນ ເປັນເພດຊາຍ, ເສຍຊີວິດ 4 ຄົນ ເປັນເພດຍິງ ແລະ ຫາຍສາບສູນ 3 ຄົນ, ເພດຍິງ 2 ຄົນ ແລະ ເພດຊາຍ 1 ຄົນ. ປະຈຸບັນເຈົ້າໜ້າທີ່ທະຫານທະຫານເມືອງຊຽງເງິນຈຳນວນ 15 ຄົນ ໂດຍການຊີ້ນຳ-ນຳພາຂອງ ທ່ານ ພັນໂທ ທອງພັນ ບຸນທຳ ຮອງຫົວໜ້າການທະຫານກອງບັນຊາການທະຫານເມືອງຊຽງເງິນ ໄດ້ສົມທົມກັບເຈົ້າໜ້າທີ່ກຸ່ມກີ່ວກະຈຳພວມສືບຕໍ່ເລັ່ງຄົ້ນຫາຄົນທີ່ຫາຍສາບສູນດັ່ງກ່າວ.
ຂ່າວ: ວຽງຈັນທາຍ
