ໂຄງການປັບປຸງເສັ້ນທາງນີ້ ແມ່ນກວມເອົາພາກສ່ວນຕ່າງໆໃນເມືອງໄຊ, ເມືອງແບງ ແລະ ເມືອງຮຸນ, ໂດຍມີເປົ້າໝາຍສ້າງລະບົບຄົມມະນາຄົມເຊື່ອມຕໍ່ຕາເວັນອອກ-ຕາເວັນຕົກ ໃຫ້ມີຄວາມຄ່ອງຕົວ.
ເສັ້ນທາງຫຼວງນີ້ເລີ່ມຕົ້ນຈາກເມືອງເງິນ, ແຂວງໄຊຍະບູລີ, ເຊິ່ງມີຊາຍແດນຕິດກັບແຂວງນ່ານຂອງປະເທດໄທ, ຜ່ານແຂວງອຸດົມໄຊ ແລະ ເຊື່ອມຕໍ່ກັບທາງຫຼວງ 2E, ແລະ ຂ້າມທາງຫຼວງແຫ່ງຊາດ 13 ເໜືອ. ຈາກນັ້ນ, ເສັ້ນທາງກໍ່ຈະຕໍ່ໄປເຖິງເມືອງໃໝ່ ແຂວງຜົ້ງສາລີ ແລະ ຮອດແຂວງດ່ຽນບຽນຂອງປະເທດຫວຽດນາມ.
ເມື່ອສຳເລັດ, ທາງຫຼວງແຫ່ງຊາດ 2W ຈະກາຍເປັນ ເສັ້ນທາງສຳຄັນໃນການພັດທະນາເຄືອຂ່າຍຄົມມະນາຄົມ ແລະ ການຂົນສົ່ງໃນພາກພື້ນ, ລວມທັງທ່າບົກ ແລະ ສູນກະຈາຍສິນຄ້າຕ່າງໆ. ນອກຈາກນັ້ນ, ຍັງຄາດວ່າຈະເຮັດໃຫ້ການຄ້າ ແລະ ການຂົນສົ່ງມີຄວາມຢືດຢຸ່ນຕໍ່ກັບການປ່ຽນແປງຂອງດິນຟ້າອາກາດຫຼາຍຂຶ້ນ, ເພື່ອເປັນການຊ່ວຍສົ່ງເສີມການຂະຫຍາຍຕົວທາງດ້ານເສດຖະກິດ, ທັງພາຍໃນ ແລະ ລະຫວ່າງຊາຍແດນ.
.
ໂຄງການ ປັບປຸງ-ຍົກລະດັບເສັ້ນທາງຫຼວງແຫ່ງຊາດ 2W ຢູ່ເຂດເມືອງໄຊ, ເມືອງແບງ ແລະ ເມືອງຮຸນ ພາຍຫຼັງໄດ້ລົງນາມເຊັນສັນຍາ ແລະ ຈັດຕັ້ງປະຕິບັດມາແຕ່ທ້າຍເດືອນ ກໍລະກົດ 2024 ຈົນເຖິງປັດຈຸບັນ ເຊິ່ງມີສອງສັນຍາໃນນີ້ສັນຍາທີ 2 ແຕ່ກິໂລແມັດ 68 ເມືອງແບງ ຫາ ກິໂລແມັດ 121 ເມືອງຮຸນ ໂດຍແມ່ນບໍລິສັດ ກວາງຕຸງວິສະວະກຳກໍ່ສ້າງໄຟຟ້ານໍ້າຕົກເລກ 2 ຈຳກັດ ແຫ່ງ ສປ ຈີນ ຮັບເໝົາກໍ່ສ້າງ ໃນມູນຄ່າ 22,675,496.42 ໂດລາ ສະຫະລັດ ຄາດວ່າທ້າຍປີ 2025 ຈະໃຫ້ສຳເລັດ 2 ຫຼັກໝາຍ ເທົ່າກັບ 7 ກິໂລແມັດ, ໃນສັນຍານີ້ຈະໃຫ້ສຳເລັດການກໍ່ສ້າງ ທັງໝົດ ພາຍໃນ 3 ປີ ແລະ ບູລະນະຮັກສາ 7 ປີ ຕາມສັນຍາ ໂດຍແມ່ນທຶນກູ້ຢືມຈາກທະນາຄານໂລກ (WB).ສ່ວນສັນຍາ ທີ 1 ແມ່ນ ເລີ່ມແຕ່ກິໂລແມັດທີ 00 ຫາ ກິໂລແມັດ 68 ມູນຄ່າຫຼາຍກວ່າ 30 ລ້ານໂດລາ ເຊິ່ງຄາດວ່າຈະສຳເລັດທ້າຍປີນີ້ເຊັ່ນດຽວກັນ.
