ໂຮງໝໍແຂວງບໍ່ແກ້ວໄດ້ຮັບເຄື່ອງຊ່ວຍເຫຼືອປະເພດຫ້ອງທົດລອງສໍາເລັດຮູບສໍາລັບການກວດພະຍາດໂຄວິດ -19 ແລະ ອຸປະກອນລວມມີເຄື່ອງປັບອາກາດ ໄຟຟ້າ ລະບົບກອງອາກາດ ແລະ ໝູນວຽນຕາມມາດຖານ ເພື່ອຮອງຮັບອຸປະກອນ.
ພິທີມອບຮັບອຸປະກອນດັ່ງກ່າວໄດ້ຈັດຂຶ້ນໃນວັນທີ 28 ພຶດສະພາ 2021 ທີ່ຜ່ານມານີ້, ທີ່ດ່ານຂົວມິດຕະພາບລາວ-ໄທ ແຫ່ງທີ 4 (ຫ້ວຍຊາຍ-ຊຽງຂອງ) ຕາງໜ້າຝ່າຍໄທກ່າວມອບໂດຍ ທ່ານໝໍ ວັດຊະຣະພົງ ຄໍາຫຼ້າ ຫົວໜ້າ ພະແນກສາທາລະນະສຸກ ແຂວງ ຊຽງຣາຍ ຣາຊະອານາຈັກໄທ ແລະ ກ່າວຮັບໂດຍທ່ານ ດຣ ບຸນຍະເວດ ວົງຄໍາຊ່າວ ຫົວໜ້າ ພະແນກສາທາລະນະສຸກແຂວງບໍ່ແກ້ວ.
ນອກນັ້ນ, ພະແນກສາທາລະນະສຸກ ແຂວງ ຊຽງຣາຍ ຈະສືບຕໍ່ມອບອຸປະກອນການແພດ ໃຫ້ໂຮງໝໍແຂວງບໍ່ແກ້ວຕື່ມອືກ ໃນໄວໆນີ້ ລວມມີເຄື່ອງກວດຫາເຊື້ອພະຍາດ ໂຄວິດ -19 ຄົບຊຸດ ຈໍານວນ 10 ລາຍການ ເພື່ອປະກອບເຂົ້າໃນຫ້ອງກວດດັ່ງກ່າວ.
ຂ່າວ: ເງິນຫຼົງ ຈິດພູວົງ
ພາບ:ຄຳພັນ ແກ້ວມະນີ
