ການຄັດເລືອກຄັ້ງທີໜຶ່ງຂອງງານແຂ່ງຂັນສຽງແຄນເຊື້ອຊາດລາວກັບຮຸ່ນສືບທອດ 9 ຕົວເມືອງ ໃນນະຄອນຫຼວງວຽງຈັນ ໄດ້ຈັດຂຶ້ນໃນ ວັນພຸດ ວັນທີ 11 ມີນາ ທີ່ຜ່ານມາ ຢູ່ທີ່ສະຖານີໂທລະພາບແຫ່ງຊາດລາວ.
ທ່ານ ບຸນເຈົ້າ ພິຈິດ ຜູ້ອຳນວຍການໂທລະພາບແຫ່ງຊາດລາວ ແລະ ໄດ້ເປັນປະທານໃນພິທີເປີດງານໄດ້ກ່າວວ່າ: ຈຸດປະສົງຂອງການແຂ່ງຂັນດັ່ງກ່າວແມ່ນເພື່ອເປັນການກະຕຸ້ນ, ຊຸກຍູ້, ສົ່ງເສີມ ແລະ ເປີດໂອກາດໃຫ້ເຍົາວະຊົນແລະ ຊາວໜຸ່ມໃນ 9 ຕົວເມືອງ ພາຍໃນນະຄອນຫລວງວຽງຈັນ ໄດ້ສະແດງຄວາມສາມາດໃນການຫຼິ້ນດົນຕີພື້ນເມືອງລາວ ໂດຍສະເພາະແມ່ນການເປົ່າແຄນ. ນອກຈາກນີ້ ກໍ່ເພື່ອປູກຈິດສຳນຶກໃຫ້ເຍົາວະຊົນ, ຊາວໜຸ່ມກໍ່ຄືຄົນຮຸ່ນໃໝ່ໄດ້ມີສ່ວນຮ່ວມໃນການປົກປັກຮັກສາຄຸນຄ່າຂອງສຽງແຄນເຊື້ອຊາດລາວ.
ທ່ານ ບຸນເຈົ້າ ກ່າວອີກວ່າ ການແຂ່ງຂັນຄັ້ງນີ້ ຍັງເປັນການຊຸກຍູ້ປຸກລະດົມຂະບວນການສ້າງຜົນງານຄໍານັບຮັບຕ້ອນວັນສຳຄັນຕ່າງໆຂອງພັກ-ຂອງຊາດ ເຊັ່ນ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 65 ປີ, ວັນສ້າງຕັ້ງສື່ມວນຊົນ ແລະ ພິມຈຳໜ່າຍຄົບຮອບ 70 ປີ, ວັນສ້າງຕັ້ງ ສປປ ລາວ ຄົບຮອບ 45 ປີ ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກທັງເປັນບິດາແຫ່ງສຽງແຄນຄົບຮອບ 100 ປີ ໃຫ້ມີເນື້ອໃນເຕັມໄປດ້ວຍຄວາມໝາຍຄວາມສຳຄັນ ແລະ ມີຄວາມຄຶກຄື້ນ, ຟົດຟື້ນມ່ວນຊື່ນ.
ການຄັດເລືອກຄັ້ງທີສອງຈະໄດ້ຈັດຂຶ້ນໃນວັນທີ 20 ມີນານີ້. ຄະນະຈັດງານແຂ່ງຂັນຂໍເຊີນເຍົາວະຊົນ, ຊາວໜຸ່ມ ແລະ ນັກຮຽນນັກສຶກສາທັງຄົນລາວ ແລະ ຕ່າງປະເທດທີ່ຢູ່ພາຍໃນ 9 ຕົວເມືອງ ໃນນະຄອນຫຼວງວຽງຈັນ ອາຍຸລະຫວ່າງ 7 ຫາ 18 ປີທີ່ມີຄວາມສາມາດເປົ່າແຄນ ແລະ ມີຄວາມສົນໃຈເຂົ້າຮ່ວມການປະກວດ.
ຄະນະກຳມະການຈະຄັດເລືອກເອົາ 50 ຄົນ ເພື່ອເຂົ້າແຂ່ງຂັນໃນຮອບຮອງຊະນະເລີດໃນເດືອນຕຸລາ ແລະ ຮອບຊິງຊະນະເລີດໃນເດືອນທັນວາ. ການແຂ່ງຂັນແບ່ງເປັນ 2 ລຸ້ນຄື ອາຍຸ 7 ຫາ 14 ປີ ແລະ 15 ຫາ 18 ປີ.
ຂ່າວ-ພາບ: ວິສິດ ເທບປະຫລັດ
