ສະພາບນ້ຳຖວ້ມຢູ່ເມືອງສອງຄອນ ແຂວງສະຫວັນນະເຂດ, ນັບແຕ່ວັນທີ 17 ຕຸລາ ມາຮອດປະຈຸບັນ, ນ້ຳເຊບັງຫຽງຍັງສືບຕໍ່ເພີ່ມຂຶ້ນເຊິ່ງນ້ຳໄດ້ ລົ້ນຝັ່ງ ແລະ ໄຫຼເຂົ້າຖ້ວມເຮືອນຊານຂອງປະຊາຊົນ ໃນຫຼາຍພື້ນທີ່ໂດຍສະເພາະໃນເຂດພື້ນທີ່ຕ່ຳ ລວມມີທັງໝົດ 21 ບ້ານ, 2.327 ຄອບຄົວ, ພົນລະເມືອງ 13.455 ຄົນ, ເນື້ອທີ່ນາຖືກຖ້ວມ ທັງໝົດ 4.693 ເຮັກຕາ, ໜອງປາ 289 ໜອງ, ເນື້ອທີ່ສວນ 96 ເຮັກຕາ, ງົວຕາຍ 4 ໂຕ, ວິດຖ່າຍ 814 ໜ່ວຍ, ລະບົບຊົນລະປະທານ 9 ແຫ່ງ, ເຮືອນຊານເປ່ເພ ແລະ ຖືກນໍ້າຍູ້ໄຫຼໄປຈໍານວນໜຶ່ງ, ເສັ້ນທາງ ຫຼາຍຈຸດ ເປ່ເພ, ໂຮງຮຽນຢຸດການຮຽນຊົ່ວຄາວ 22 ແຫ່ງ, ສາຍໄຟຟ້າຂາດ 2 ຈຸດ ມີບ້ານທີ່ບໍ່ມີໄຟຟ້າໃຊ້ 19 ບ້ານ.
ສິ່ງທີ່ປະຊາຊົນຕ້ອງການຄວາມຊ່ວຍເຫຼືອຢ່າງຮີບດ່ວນໃນປັດຈຸບັນນີ້ຄື: ອາຫານ, ເຂົ້າສານ, ອາຫານແຫ້ງ,ນ້ຳດື່ມ, ທຽນໄຕ້ເນື່ອງຈາກລະບົບໄຟຟ້າແມ່ນຖືກຕັດໃນປັດຈຸບັນ, ຢາທາກັນຍຸງ ຊຶ່ງປະຊາຊົນບາງສ່ວນແມ່ນໄດ້ອົບພະຍົບຂຶ້ນໄປຢູ່ປ່າເປັນການຊົ່ວຄາວ ນອກນີ້ກໍ່ແມ່ນຢາປົວພະຍາດຄົນ ແລະ ສັດຊຶ່ງປັດຈຸບັນປະຊາຊົນບາງຄົນແມ່ນຕີນເປື່ອຍ ແລະ ສັດຍຶ່ງທ້ອງຕາຍ.
ຂ່າວ-ພາບ: ອັກສອນສິນ ພົມມະຈັນ
