ກອງປະຊຸມລັດຖະບານ ສະໄໝສາມັນປະຈຳເດືອນພະຈິກ 2020 ໄດ້ຈັດຂຶ້ນເມື່ອວັນທີ 24 ພະຈິກ 2020 ທີ່ຜ່ານມາ ຢູ່ ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ໃນເດືອນທັນວາ 2020 ນີ້, ຄະນະລັດຖະບານໄດ້ຊີ້ນໍາໃຫ້ກະຊວງແຮງງານ ແລະ ສະຫວັດດີການສັງຄົມ ເປັນເຈົ້າການສົມທົບກັບ ທ້ອງຖິ່ນ ສືບຕໍ່ຊ່ວຍເຫຼືອປະຊາຊົນ ທີ່ໄດ້ຮັບຜົນກະທົບຈາກໄພນໍ້າຖ້ວມ ແລະ ອັກຄີໄພ ໂດຍສະເພາະຢູ່ 8 ເມືອງຂອງແຂວງສະຫວັນນະເຂດ ທີ່ໄດ້ຮັບຜົນກະທົບໜັກຈາກໄພນໍ້າຖ້ວມ ໃນລະຫວ່າງເດືອນກັນຍາ ທິ່ຜ່ານມາ.
ນອກນັ້ນຄະນະລັດຖະບານຍັງຊີ້ນໍາໃຫ້ທຸກໆກະຊວງ-ອົງການ ແລະ ທ້ອງຖິ່ນ ຈົ່ງຍົກສູງສະຕິຄວາມເປັນເຈົ້າ ແລະ ເຮັດວຽກງານແນວຄິດ ໃຫ້ສະມາຊິກພັກ-ພະນັກງານ ທີ່ຢູ່ພາຍໃຕ້ຄວາມຮັບຜິດ ຊອບຂອງຕົນ ໃຫ້ເພີ່ມທະວີຄວາມສາມັກຄີເປັນປຶກແຜ່ນພາຍໃນ, ຕັ້ງໜ້າສູ້ຊົນປະຕິບັດພາລະບົດບາດ, ສິດ ແລະ ໜ້າທີ່ຂອງຂະແໜງ ການຕົນ ລວມທັງການສືບຕໍ່ສ້າງຂະບວນການຕ່າງໆ ເພື່ອຂໍ່ານັບຮັບຕ້ອນວັນສະຖາປະນາ ສປປ ລາວ ຄົບຮອບ 45 ປີ ໃນເດືອນທັນວາ ທີ່ຈະມາເຖິງນີ້ ບົນພື້ນຖານປະຢັດມັດທະຍັດ ແຕ່ມີເນື້ອໃນ, ມີບັນຍາກາດ ແລະ ຮັບປະກັນໄດ້ຄວາມສະຫງົບ, ເປັນລະບຽບຮຽບຮ້ອຍ ຮັບປະກັນບໍ່ໃຫ້ມີສິ່ງທີ່ບໍ່ເພີ່ງປາຖະໜາໃດໆເກີດຂຶ້ນຢ່າງເດັດຂາດ.
ຂໍ້ມູນ: ສນຍ
