ພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ ໄດ້ສົມທົບກັບ ເຈົ້າໜ້າທີ່ຕຳຫຼວດ ລົງກວດກາ ແລະ ຮື້ຖອນອຸປະກອນທວນສັນຍານ ຈາກຕ່າງປະເທດ (Repeater), ຊຶ່ງມີກຸ່ມບຸກຄົນບໍ່ຫວັງດີ ໄດ້ລັກລອບເອົາອຸປະກອນດັ່ງກ່າວເຂົ້າມາຕິດຕັ້ງແບບຜິດກົດໝາຍ ໃນ ສປປ ລາວ.
ອຸປະກອນດັ່ງກ່າວ ແມ່ນອຸປະກອນທີ່ນໍາໃຊ້ ຮັບ-ສົ່ງ ສັນຍານເຄື່ອຂ່າຍໂທລະສັບ ແລະ ສັນຍານອິນເຕີເນັດ ຈາກຕ່າງປະເທດ ມານໍາໃຊ້ຢູ່ ສປປ ລາວ, ເຊິ່ງເປັນອຸປະກອນທີ່ຫ້າມນໍາເຂົ້າ, ຫ້າມຈໍາໜ່າຍ, ຫ້າມຕິດຕັ້ງ ແລະ ຫ້າມນໍາໃຊ້ຢູ່ໃນ ສປປ ລາວ.
ເປັນອຸປະກອນທວນສັນຍານ ທີ່ກຸ່ມຄົນບໍ່ດີ ລັກລອບນໍາໃຊ້ເຂົ້າໃນການຫຼອກລວງທາງໂທລະສັບ ແລະ ທາງສື່ສັງຄົມອອນລາຍ, ເຊິ່ງຜິດຕໍ່ກົດໝາຍ ແລະ ລະບຽບການ ຂອງ ສປປ ລາວ.
ກະຊວງ ເຕັກໂນໂລຊີ ແລະ ການສື່ສານ ອອກຄຳສັ່ງຫ້າມບຸກຄົນ, ນິຕິບຸກຄົນ ຫຼື ການຈັດຕັ້ງ ລັກລອບນໍາໃຊ້ ແລະ ຕິດຕັ້ງ ອຸປະກອນ Repeater ດັ່ງກ່າວນີ້, ເພາະຈະກໍ່ໃຫ້ເກີດຄື້ນຄວາມຖີ່ລົບກວນລະບົບໂທລະສັບເຄື່ອນທີ່ 2G/3G/4G ແລະ 5G ໃນ ສປປ ລາວ ແລະ ສົ່ງຜົນໃຫ້ການເຊື່ອມຕໍ່ລະບົບມີຄວາມຫຼ້າຊ້າ ຫຼື ບໍ່ສາມາດເຊື່ອມຕໍ່ໄດ້ປົກກະຕິ.
ວັນທີ 19 ສິງຫາ 2025, ກະຊວງເຕັກໂນໂລຊີ ແລະ ການສື່ສານ ລາຍງານວ່າ: ໃນລະຫວ່າງເດືອນ ມິຖຸນາ ຫາ ກໍລະກົດ 2025 ກົມຄື້ນຄວາມຖີ່ວິທະຍຸສື່ສານ, ກະຊວງເຕັກໂນໂລຊີ ແລະ ການສື່ສານ ໄດ້ລົງເກັບກໍາຂໍ້ມູນການລັກລອບນຳໃຊ້ອຸປະກອນທວນສັນຍານ ຈາກຕ່າງປະເທດ (Repeater) ເຂົ້າມານຳໃຊ້ຢູ່ໃນຂອບເຂດນະຄອນຫຼວງວຽງຈັນ.
ພະແນກເຕັກໂນໂລຊີ ແລະ ການສື່ສານ ນະຄອນຫຼວງວຽງຈັນ ໄດ້ສົມທົບກັບ ເຈົ້າໜ້າທີ່ຕຳຫຼວດ ລົງກວດກາ ແລະ ຮື້ຖອນອຸປະກອນທວນສັນຍານ ຈາກຕ່າງປະເທດ (Repeater) ຈໍານວນ 4 ຊຸດ.
ຕໍ່ກັບການລົງກວດກາ ແລະ ຮື້ຖອນໃນຄັ້ງນີ້, ທາງຄະນະຮັບຜິດຊອບ ໄດ້ຍຶດເອົາອຸປະກອນດັ່ງກ່າວ, ພ້ອມທັງຕັກເຕືອນ ແລະ ສຶກສາອົບຮົມ ຜູ້ນໍາໃຊ້ອຸປະກອນທວນສັນຍານ ຈາກຕ່າງປະເທດ (Repeater), ຖ້າຫາກກວດພົບເຫັນການນໍາໃຊ້ອຸປະກອນ ດັ່ງກ່າວນີ້ອີກ ແມ່ນຈະໄດ້ດໍາເນີນການຕາມກົດໝາຍ ແລະ ລະບຽບການ.
