ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ກຸ່ມບໍລິສັດກະສິກຳ ຢຸນນານ ໃນຕອນເຊົ້າມື້ວານນີ້ວັນທີ 9 ມັງກອນ 2020 ຊຶ່ງເປັນມື້ສຸດທ້າຍໃນການຢ້ຽມຢາມ ສປ ຈີນ ນັບແຕ່ວັນທີ 5 ມັງກອນ ທີ່ຜ່ານມາ.
ກຸ່ມບໍລິສັດດັ່ງກ່າວໄດ້ສ້າງຕັ້ງແຕ່ປີ 1951ແລະ ກໍໄດ້ຮັບການພັດທະນາປັບປຸງການຄຸ້ມຄອງບໍລິຫານມາໂດຍຕະຫຼອດ. ເລີ່ມແຕ່ປີ 2014 ກຸ່ມບໍລິສັດນີ້ໄດ້ແຍກອອກຈາກກຸ່ມບໍລິສັດໃຫຍ່ເຂົ້າສູ່ລະບົບເສດຖະກິດຢ່າງເປັນເອກະລາດ ແລະ ໄດ້ດຳເນີນກິດຈະການທາງດ້ານກະສິກຳຢູ່ແຂວງຢຸນນານ ໂດຍໄດ້ເປັນບໍລິສັດວິສາຫະກິດລະດັບຊາດໃນຂົງ ເຂດກະສິກຳເຊັ່ນ: ການພັດ ທະນາຜະລິດຕະພັນສີຂຽວ, ຊັບພະຍາກອນກະສິກຳ-ປ່າ ໄມ້ ແລະ ການບໍລິການດ້ານກະສິກຳ. ຈາກນັ້ນ, ຄະນະໄດ້ ສືບຕໍ່ຢ້ຽມຢາມສະຖາບັນວິຊາຊີບ ແລະ ເຕັກນິກທາງລົດໄຟຄຸນໝິງ ຊຶ່ງເປັນສະຖາບັນແຫ່ງດຽວຂອງລັດໃນແຂວງຢຸນນານ. ສະຖາບັນດັ່ງກ່າວໄດ້ສ້າງເປັນສູນສ້າງບຸກຄະລາກອນຂັ້ນວິຊາຊີບກ່ຽວກັບທາງລົດໄຟ ແລະ ລົດໄຟທີ່ນຳໃຊ້ພາຍໃນຕົວເມືອງຄຸນໝິງ ໂດຍໄດ້ຮັບການຊີ້ນຳໂດຍກົງຈາກພະແນກສຶກສາຂອງແຂວງຢຸນນານ. ສະຖາບັນແຫ່ງນີ້ໄດ້ແບ່ງອອກເປັນ 16 ສາຂາວິຊາຮຽນ ແລະ ໄດ້ແບ່ງອອກເປັນ 4 ກຸ່ມໃຫຍ່ເຊັ່ນ: ການຂົນສົ່ງທາງລົດໄຟ, ຫົວລົດໄຟ, ການສ້ອມແປງລົດໄຟ ແລະ ລະບົບໄຟຟ້າ. ນອກນັ້ນຄະນະຜູ້ແທນລາວ ກໍໄດ້ສືບຕໍ່ຢ້ຽມຢາມກຸ່ມບໍລິສັດລົງທຶນ ແລະ ກໍ່ສ້າງແຂວງຢຸນນານຫຸ້ນສ່ວນ ຈຳກັດ ທີ່ໄດ້ມີການລົງທຶນໃນ ສປປ ລາວ ເຊັ່ນ: ໂຄງການທາງດ່ວນ ວຽງຈັນ-ວັງວຽງ, ໂຄງການເຂດເສດຖະກິດພິເສດໄຊເສດຖາກວມລວມ ແລະ ສູນການຄ້າວຽງຈັນເຊັນເຕີ.
ຂ່າວ-ພາບ : ກົມຂ່າວ, ກະຊວງການຕ່າງປະເທດ
