ສປປ ລາວ ແລະ ສ. ອິນເດຍ ຍົກລະດັບການຮ່ວມມືສອງຝ່າຍໃຫ້ເລິກເຊິ່ງຂຶ້ນ ໃນໂອກາດທີ່ ທ່ານ ຮອງນາຍົກລັດຖະມົນຕີ ແຫ່ງ ສປປ ລາວ ເຂົ້າຢ້ຽມຂໍ່ານັບ ປະທານາທິບໍດີ ອິນເດຍ ທີ່ນະຄອນຫຼວງນິວແດນລີ ເພື່ອຊຸກຍູ້ ການພັດທະນາຮ່ວມກັນ ແລະ ກຽມສະເຫຼີມສະຫຼອງ 70 ປີ ແຫ່ງການສ້າງຕັ້ງສາຍພົວພັນການທູດ.
ການພົບປະອັນສຳຄັນນີ້ ຈັດຂຶ້ນໃນວັນທີ 3 ມິຖຸນາ 2026 ທີ່ຜ່ານມາ, ເຊິ່ງ ທ່ານ ທອງສະຫວັນ ພົມວິຫານ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະເຂົ້າ ຢ້ຽມຂໍ່ານັບ ພະນະທ່ານ ນາງ ດຣໍປາດີ ເມີມູ (H.E. Droupadi Murmu), ປະທານາທິບໍດີ ແຫ່ງ ສ. ອິນເດຍ. ການເຂົ້າຢ້ຽມຂໍ່ານັບດັ່ງກ່າວ ແມ່ນນອນໃນວາລະການເດີນທາງຢ້ຽມຢາມ ສ. ອິນເດຍ ຢ່າງເປັນ ທາງການ ແລະ ການເປັນປະທານຮ່ວມກອງປະຊຸມຄະນະກຳມາທິການຮ່ວມ ວ່າດ້ວຍການຮ່ວມມື ສອງຝ່າຍ ລາວ-ອິນ ເດຍ ຄັ້ງທີ 10. ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ນໍາເອົາຄວາມຢື້ຢາມຖາມຂ່າວອັນອົບ ອຸ່ນຈາກ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄປຍັງປະທານາທິບໍດີອິນເດຍ ພ້ອມ ທັງແຈ້ງໃຫ້ຊາບເຖິງຈຸດປະສົງຂອງການຢ້ຽມຢາມ ແລະ ລາຍງານສະພາບການພັດທະນາເສດຖະກິດ-ສັງຄົມ ຂອງລາວໂດຍຫຍໍ້ໃຫ້ຊາບ.
ເພື່ອເປັນການສະແດງເຖິງມິດຕະພາບອັນແໜ້ນແຟ້ນ, ຝ່າຍລາວໄດ້ສະແດງຄວາມຂອບໃຈຢ່າງຈິງໃຈຕໍ່ ລັດຖະບານອິນເດຍ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອຢ່າງຕໍ່ເນື່ອງຕະຫຼອດມາ. ການຊ່ວຍເຫຼືອ ດັ່ງກ່າວກວມເອົາຫຼາຍຂະແໜງການທີ່ສຳຄັນ ແລະ ເປັນປະໂຫຍດໂດຍກົງຕໍ່ການພັດທະນາປະເທດ ເຊັ່ນ: ການສະໜອງທຶນການສຶກສາ ແລະ ຝຶກອົບຮົມ, ການຍົກລະດັບພາສາອັງກິດ, ການພັດທະນາຊັບພະຍາກອນ ມະນຸດ, ພະລັງງານ, ກະສິກຳ ແລະ ວຽກງານປ້ອງກັນຊາດ. ສິ່ງທີ່ພົ້ນເດັ່ນ ແລະ ເປັນຮູບປະທຳໃນການອະນຸ ລັກວັດທະນະທຳ ແມ່ນການຊ່ວຍເຫຼືອໃນໂຄງການບູລະນະປະຕິສັງຂອນວັດພູຈຳປາສັກ ໄລຍະປີ 2018-2028 ລວມໄປເຖິງການສະໜອງເງິນກູ້ດອກເບ້ຍຕໍ່າ ເພື່ອຂັບເຄື່ອນການພັດທະນາພື້ນຖານໂຄງລ່າງໃນ ສປປ ລາວ ອີກດ້ວຍ.
ໃນໂອກາດດຽວກັນ, ພະນະທ່ານ ປະທານາທິບໍດີ ນາງ ດຣໍປາດີ ເມີມູ ໄດ້ໃຫ້ການຕ້ອນຮັບຢ່າງອົບອຸ່ນ ພ້ອມທັງ ຕີລາຄາສູງ ຕໍ່ການເດີນທາງມາຢ້ຽມຢາມຂອງຄະນະຜູ້ແທນລາວ ເຊິ່ງປະທານາທິບໍດີອິນເດຍ ຖືເປັນບາດກ້າວ ສຳຄັນໃນການຮັດແໜ້ນສາຍພົວພັນຂອງທັງສອງຊາດໃຫ້ເຂົ້າສູ່ລວງເລິກ ແລະ ໄດ້ຝາກຄວາມຢື້ຢາມຖາມ ຂ່າວສົ່ງຕອບໄປຍັງ ພະນະທ່ານ ປະທານປະເທດ ທອງລຸນ ສີສຸລິດ.
ທັງສອງຝ່າຍຍັງໄດ້ສະແດງຄວາມພາກພູມໃຈຕໍ່ສາຍພົວພັນມິດຕະພາບ ທີ່ໄດ້ຮັບການເສີມຂະຫຍາຍຢ່າງຕໍ່ ເນື່ອງຕະຫຼອດໄລຍະ 70 ປີຜ່ານມາ, ເຊິ່ງສະແດງອອກຜ່ານການແລກປ່ຽນການຢ້ຽມຢາມຂອງການນຳຂັ້ນ ສູງຢ່າງເປັນປົກກະຕິ ເປັນຕົ້ນແມ່ນການເດີນທາງມາຢ້ຽມຢາມ ສປປ ລາວ ຂອງ ພະນະທ່ານ ນາຍົກລັດຖະມົນຕີ ນາເຣນດຣາ ໂມດີ ໃນກອງປະຊຸມສຸດຍອດອາຊຽນ-ອິນເດຍ ເມື່ອເດືອນຕຸລາ 2024. ໃນປີ 2026 ນີ້, ເຊິ່ງເປັນປີຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດລະຫວ່າງ ສປປ ລາວ ແລະ ສ. ອິນເດຍ, ທັງສອງປະເທດໄດ້ຕົກລົງເຫັນດີຈະຮ່ວມກັນຈັດກິດຈະກຳສະເຫຼີມສະຫຼອງຢ່າງມີເນື້ອໃນ ແລະ ຄວາມໝາຍ ສຳຄັນ ພ້ອມທັງຢືນຢັນທີ່ຈະສືບຕໍ່ໃຫ້ການສະໜັບສະໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ບໍ່ວ່າຈະເປັນໃນຂອບການຮ່ວມມື ແມ່ນໍ້າຂອງ-ແມ່ນໍ້າຄົງຄາ, ອາຊຽນ-ອິນເດຍ ແລະ ອົງການສະຫະປະຊາຊາດ ເພື່ອຜົນປະໂຫຍດ ແລະ ການພັດທະນາທີ່ຍືນຍົງຮ່ວມກັນໃນອະນາຄົດ.
(ຂ່າວ: ກຕທ)
